4 Biꞌx cbel xitj tnam Moab, ex che jawil schꞌin ke tal cycꞌwaꞌl tuꞌn taꞌw cꞌixcꞌoj. 5 Che okꞌel oc cyjax tcꞌuꞌj witz Luhit ex cbinjtzel tkꞌajkꞌajel cywiꞌ in che schꞌin wen tuꞌn taꞌw cꞌixcꞌoj oc cycuꞌx tibaj tnam Horonaim. 6 Cyel oke, cyclom cyibe, cyoque ic tzaꞌn jun wiꞌ tal tzeꞌ retama tbi at tuj tzkij txꞌotxꞌ.

7 Tuꞌnju oc keꞌ cycꞌuꞌje tiꞌj cyipune ex tiꞌj cykꞌinumable, ax icx cyeye cbel cyiꞌje cyuꞌn aj kꞌoj. Cxel kꞌiꞌn cydiose Quemos tuj juntl nasyon, cyucꞌix ke pal in che ajben te ex mastl xjal maꞌ cyoclen. 8 Cycyakil tnam che bel xitj ex mi jun cyjel ten; ax icx cbajel naj mlaj txꞌotxꞌ ex tiwitz txꞌotxꞌ. Akine Dios in chin kꞌmante jlu. 9 Cykꞌonxe cyxicꞌ aj Moab tuꞌntzun cyel lipan; che bel xitun cytanmi ex mi jun xjal ctel cyuj.

10 Tzajxwit mya baꞌn tibaj ju xjal mintiꞌ in tbinchaꞌn tuꞌn tcyakil tanmi aju akꞌuntl ctzajel tmaꞌn Kman te. Tzajxwit mya baꞌn tibaj ju xjal tcꞌiꞌ biyan tuꞌn spad.

11 Tuj txubtxaj ma che ankꞌin aj Moab atxix ttzajlen ojtxi, naꞌnx tcanun jun maj tuꞌn cyxi kꞌiꞌn pres tuj juntl tnam. Ic cyten ic tzaꞌn taꞌl twitz uva in cyaj kꞌoꞌn tuj jun tcubil ex mintiꞌ in baj chꞌexpuꞌn tcubil, cyjaꞌtzun, mintiꞌ in baj tchyaꞌl ex tcꞌocꞌjal.

12 Pero chi Kman cyjaꞌ: Cpol tkꞌijlalil tuꞌn cyxi nsamaꞌne xjal tuꞌn tcuꞌx cykoꞌn taꞌl twitz uva lu cyuj junxitl tcubil ex tuꞌn tcub cybuchin tnejel tcubil. 13 Entons ctzajel cychꞌixwi aj Moab tiꞌj cydios Quemos tbi, ic tzaꞌn tzaj cychꞌixwi aj Israel tej toc keꞌ cycꞌuꞌj tiꞌj Betel.

14 ¿Tzaꞌntzun tten in cymaꞌn aj Moab cyjaꞌ: At kipune ex cyuw kcꞌuꞌje tuj kꞌoj? 15 Cbel xitj Moab cyucꞌix ke tnam ateꞌ tuj tcwent, ex che cymel ke cuꞌxun tbanilxix at cyxol, chi Rey aju toc tbi Kman Tajaw Tcyakil. 16 Chꞌix tul lakꞌeꞌ tkꞌijlalil tuꞌn cynaj aj Moab ex nok tuꞌn tulcu canun mya baꞌn ctzajel cyiꞌj. 17 Akeye tnam cyvesin cyib tucꞌil Moab, ex cycyakil keju biꞌn tkanil cyuꞌn tiꞌj, che okꞌe tiꞌj ex cymanxe cyjaꞌ: Cyqueꞌyinxe tzaꞌn tten ma naj tcawbil aju at nimxix tipun ex maꞌ toclen.

18 Cycuꞌtze tuj cykꞌukbile akeye in jaw cyniman cyibe tuj tnam Dibón, ex che keꞌcuye twitz tzkij txꞌotxꞌ, porque aju ma cub xitunte Moab, lu in ojkelan ttzaj tuꞌn toc tzokpaj cyiꞌje ex ma baj t-xitun ke ja maꞌ cywaꞌl te cycolbil cyibe. 19 Akeye najl tuj tnam Aroer, che weꞌcuye ttxlaj be ex cyqueꞌyinxe, cykaninxe cye keju ma che el ok ex ma che tzokpaj: ¿ti ma baj? Che chicuye. 20 Ma cub cychꞌixwi aj Moab tuꞌnju ma cub xitj cytanmi. Che okꞌe ex che ayayane tiꞌj tnam; cymanxe tkanil lu cye keju najl ttzi nima Arnón: Ma cub xitj tnam Moab, che chicuye.

21 Ma tzaj jwisi cyibaj tnam ateꞌ tuj tiwitz txꞌotxꞌ, ex atzun ke jlu: Holón, Jahaza, Mefaat, 22 Dibón, Nebo, Bet-diblataim, 23 Quiriataim, Bet-gamul, Bet-meón, 24 Queriot, Bosra ex cycyakil ke tnam te Moab, akeju ateꞌ nikayin ex najchak. 25 Ma naj tipumal Moab ex ma baj xitj tcawbil, chi Kman.

26 E tchyoꞌn twiꞌ Moab cyuꞌne, porque ma jaw tniman tib twitz Kman. Tol cꞌicꞌel Moab tuj t-xaꞌw, ex cycyakil xjal che xmayil tiꞌj. 27 Akeye aj Moab: ¿Mintiꞌpetzun o che xmayine cyiꞌj aj Israel ex cycyakil maj e yoline cyiꞌj tucꞌil icꞌbil mer ic tzaꞌn elekꞌ keꞌ? 28 Cycolin cyaje cytanmiye akeye aj Moab, cyxiꞌye najal cyuj ke toyꞌ pic ic tzaꞌn ke paloma in bant cykꞌuꞌ twitz pic. 29 Ojtzkiꞌn ke aj Moab kuꞌne, nim in jaw cyniman cyib, txꞌuꞌj cywiꞌ ex jawni cywitz. 30 Chi Kman: Ojtzkiꞌn wuꞌne txꞌuꞌj cywiꞌ aj Moab, in jaw cyniman cyib pero nokx gan jlu.

31 Cyjaꞌtzun, chin okꞌele ex chin bisule cyiꞌj cycyakil aj Moab ex cyiꞌj ke xjal te tnam Kir-hares. 32 Mas nim chin okꞌele tiꞌj tkan uva te tnam Sibna, ic tzaꞌn in okꞌe cyiꞌj aj Jazer. Aju twi ttxaꞌn uva ponin baj max tiꞌjxi mar ex ponin ke max tuj tnam Jazer. Atzun jaꞌlo ma naj twitz cy-uvaye kꞌan cyuꞌn ke xitul te. 33 Ya mintiꞌtl in che schꞌin xjal tucꞌil tzalajbil cyuj ke tkan awal tbanilxix cye aj Moab. Wuꞌne ya mintiꞌtl taꞌl twitz uva jatum nneꞌl yatzꞌet taꞌl, ya mi aꞌl jun in bitzan tucꞌil tzalajbil oc tcub twaban twitz uva tjakꞌ tkan tuꞌn tel yatzꞌet taꞌl. Aju tkꞌajkꞌajel cywi xjal in binjtz ya mya bitz te tzalajbil, nok oꞌcx te kꞌoj. 34 Ke xjal najl tuj tnam Hesbón in che schꞌin tuꞌn taꞌw, ex max in pon tkꞌajkꞌajel cywiꞌ tuj tnam Eleale ex tuj tnam Jahaza, in xi tkꞌajkꞌajel cywiꞌ tuj tnam Zoar, in pon max tuj tnam Horonaim ex tuj tnam Eglat-selisiya, porque ke twi aꞌ in che bet tuj tkꞌab xak Nimrim ma che aj tzkij.

35 Chi Kman: Che najel aj Moab wuꞌne, akeju in che jax cywiꞌ ke witz tuꞌn t-xi cykꞌoꞌn chojbil cye ke tilbilal nnoꞌc cydiosin ex tuꞌn tcub cypatun storac cywitz.

36 Cyjaꞌtzun, ic tzaꞌn in kꞌajt chkitzꞌ oc in cyim jun xjal, ictzun in bisun wanmiye cyiꞌj aj Moab ex cyiꞌj xjal te tnam Kir-hares, porque ma baj naj cykꞌinumabl otok baj cychmoꞌn. 37 Cycyakil xjal ma tzꞌel cymatzoꞌn ttzmal cywiꞌ ex cyxmatz, ex cycyakil ma baj cykesin tuj cykꞌab, ex ma tzꞌoc cykꞌoꞌn cyxbalun chꞌiꞌx twitz.

38 In binjtz okꞌel cywiꞌ cycyakil cyja aj Moab ex cyuj cycyakil cay, porque ma che baj naj aj Moab ic tzaꞌn in baj buchit jun tal ẍokꞌ mintiꞌ tajben. Akine Dios in chin kꞌmante jlu.

39 Che okꞌe cyiꞌj aj Moab porque ma che baj naj. Ma tzꞌajtz cykꞌoꞌn ttzal cyiꞌj tuꞌn cychꞌixwi. Ma che oc te cyxmaybil xjal cyvesin cyib cyucꞌil, ex ma tzaj cyxobil xjal tuꞌn tlaj aju ma baj cyiꞌj aj Moab.

40 Chi Kman cyjaꞌ: Ma che oc tzokpaj aj kꞌoj cyiꞌj aj Moab ic tzaꞌn jun tꞌiw in tzaj lipan cyucꞌil tkꞌab licꞌun tten. 41 Che tzyetel ke tnam ex ke ja maꞌ cywaꞌl te cycolbil cyib cyuꞌn aj kꞌoj. Tuj tkꞌijlalil lu, akeju cysoldad aj Moab cyuw cycꞌuꞌj tuj kꞌoj che tzajel luꞌlun tuꞌn cyxobil, ic tzaꞌn jun xuꞌj oc nnuꞌl itzꞌj tal. 42 Biꞌx cbel xitj tnam Moab ex cꞌelel kꞌiꞌn toclen te nasyon, porque ma jaw tniman tib twitz Kman. 43 Cyjaꞌtzun akine Dios cxel nmaꞌne jlu: Ke xjal najl tuj tnam Moab che oquel ic tzaꞌn ke jil lajoꞌn cyuꞌn ke cambal, in che xob tuꞌn cycuꞌx tzꞌak tuj jun toyꞌ jul ex ka tuꞌn cytzyet tuꞌn jun cꞌobil. 44 Aju xjal nneꞌl ok twitz xobajil, cbelex tzꞌak tuj toyꞌ jul, ex alcye ma jatz tuj toyꞌ jul, ctzyetel tuꞌn cꞌobil, porque tzul tkꞌijlalil tuꞌn tcub cycastiw aj Moab wuꞌne. Akine Dios in chin kꞌmante jlu.

45 Ke xjal ma baj cyipun ma che el ok tuꞌn tpon cyclon cyib tuj tnam Hesbón jatum o cawin rey Sehón, pero ma tzꞌoc tkꞌakꞌal tnam Hesbón, ex aju kꞌakꞌ ma tzꞌel lakꞌeꞌ ex ma che baj tzꞌeꞌy ke witz te Moab tuꞌn, jatum najl ke xjal jawni cywitz. 46 Ay becꞌbil cywitze akeye aj Moab. Akeye in che cꞌulune twitz tilbilal Quemos ma che najxe, ke cycyꞌajale ex ke cymeꞌjele ma cheꞌx kꞌiꞌn pres tuj juntl nasyon. 47 Pero tuj tkꞌijlalil tzul, che ajetz wiꞌne juntl maj aj Moab tuꞌn cyul tuj cytanmi. Akine Dios in chin kꞌmante jlu.

Oꞌcxtzun jlu in yolin tiꞌj cysentens aj Moab cub tuꞌn Kman.