2 Cyjaꞌtzun akine Dios cxel nmaꞌne jlu: Tzul tkꞌijlalil oc cybiꞌ aj Amón, akeju najl tuj tnam Rabá, tkꞌajkꞌajel cywi soldad in che schꞌin oc cypon kꞌojlel cyiꞌj, ex aju tnam biꞌx cbel xitj ex cꞌoquel kꞌoꞌn cykꞌakꞌal tnam ateꞌ tiꞌjele. Entons che elex cylajoꞌn aj Israel ke aj Amón ex che oquel juntl maj tajwil cytanmi, aju otok tzꞌel cyiꞌn aj Amón tnejel. Akine Dios in chin kꞌmante jlu.

3 Che okꞌe akeye aj Hesbón, porque ma cub xitj tnam Hai. Che okꞌe akeye xuꞌj aj Rabá. Cykꞌon oque cyxbalune chꞌiꞌx twitz ex che wuyine, cyjaw keline ic tzaꞌn jun xjal loc, porque cxel kꞌiꞌn tilbilal dios Milcom tuj juntl nasyon, cyucꞌix ke pal in che ajben te ex ke xjal maꞌ cyoclen. 4 ¿Tikuꞌn in jaw cyniman cyibe tuꞌnju at cytxꞌotxꞌe chkꞌajlaj tbanilxix wen? Akeye xjal miban che bine, oꞌcx nnoꞌc keꞌ cycꞌuꞌje tiꞌj cykꞌinumable ma baj cychmoꞌne ex in cymaꞌne: ¿Alcye baꞌn toc tzokpaj kꞌojlel kiꞌj? 5 Cyjaꞌtzun tuj tcyakil part ctzajel nsamaꞌne xobajil cyiꞌje. Akine Dios Tajaw Tcyakil in chin kꞌmante jlu. Teylex te junjun cxel tiꞌn tbe oc cyel ok ex mi aꞌl jun cꞌoquel chmonte cye. 6 Pero te tibajxi che ajetz wiꞌne juntl maj aj Amón tuꞌn cyul tuj cytanmi. Akine Dios in chin kꞌmante jlu.

7 Atzun tkanil lu cyiꞌj aj Edom, tuꞌn Kman aju Tajaw Tcyakil.

¿Mintiꞌtlpetzun xjal at cynabl tuj tnam Temán? ¿Mintiꞌtlpetzun jun consej cyuꞌn ke xjal at cynabl? ¿Mapetzun naj tcyakil cyojtzkibl? 8 Akeye najl tuj Dedán cyex oke, cyxiꞌye ewal cyibe cyuj toyꞌ jul maꞌ cyxeꞌ, porque cbel nxitune cytanmi ke tiyjil Esaú oc tpon tkꞌijlalil oc tcub cycastiw wuꞌne. 9 Oc in jaw chmet twitz uva, in cyaj ten junjun pnuj twitz, oc in che pon ke elekꞌ konicꞌan, oꞌcx in xi cyiꞌn aju at tajben cye, 10 atzun weye cꞌelel wiꞌne tcyakilju at cye tiyjil Esaú, cyjel kꞌanchaꞌlin cyewbil wuꞌne ex mlayx bant txi cyewan cyib, che bajel naj cycyakil cycꞌwaꞌl, cyucꞌix cyerman ex cyvesin, ex mi jun cyjel ten. 11 Che cykꞌoncje ke meba cꞌwaꞌl wucꞌile, jacu che oc ncwentine, ex baꞌn tuꞌn toc keꞌ cycꞌuꞌj meba xuꞌj wiꞌje.

12 Chi Kman: Akeju mintiꞌtok tcubil cycastiw, ma cub cycastiw, yajtzun cyeye, ¿Miꞌnpetzun cub cycastiwoye? Il tiꞌj cbel cycastiwoye, mlay tzicꞌx tiꞌj. 13 Akine Dios cxel nmaꞌne jun yol axix toc wuꞌnx wibe: Cbel xitj tnam Bosra ex cꞌoquel te jun tzkij txꞌotxꞌ, che oquel ten xjal xmayil cyiꞌj ex ctzajel cykanin mya baꞌn cyibaj, ax icx cycyakil mastl tnam ateꞌ tuj tcwent, nok ttxꞌakan che cyjel ten te jumajx, chi Kman.

14 Ma tzul jun tkanil wucꞌile tuꞌn Kman. At jun t-sanjel Dios ma tzul t-smaꞌn kꞌmalte cye nasyon cyjaꞌ: Cychmon oc cyibe tuꞌn cyoc tzokpaje tiꞌj tnam Edom. Cybincham cytene tuꞌn toc kꞌoj, chi t-sanjel Dios. 15 Akeye aj Edom che oquel nkꞌoꞌne te jun nasyon mas chꞌin cywitz mastl nasyon ex che elel icꞌune cyuꞌn xjal. 16 Aju cynimbil cyibe ma cub sbunte cyeye porque in che xobtzane cyiꞌj mastl tnam. Najl keye cyxol ke toyꞌ pic ex cywiꞌ ke witz maꞌ cywaꞌl, pero masque cub cykꞌoꞌne cyjaye cywiꞌ ke nmak witz ic tzaꞌn ke tꞌiw, maxtzun che tzajel tzꞌake wuꞌne. Akine Dios in chin kꞌmante jlu.

17 Tzul xitbil xobajilxix tibaj tnam Edom. Cycyakil keju che icꞌel bet ttxlaj che jawil secꞌpaj ex che oquel ten xmayil tiꞌj oc cylonte aju otok baj tiꞌj. 18 Ic cꞌoquel ic tzaꞌn tej cynaj tnam Sodoma ex Gomorra ex ke mastl tnam cyvesin cyib cyucꞌil; mi jun xjal cnajal tuj ex milpe jun xjal cpol tuꞌn tten nok chꞌin tuj. Akine Dios ma chin kꞌmante jlu. 19 Nok minaben chin tzajele tiꞌj, ic tzaꞌn jun balun nneꞌtz tjakꞌ chcꞌul ttzi nima Jordán ex in tzaj ojkelan tuj chaꞌx cꞌul jatum in che waꞌn alumaj. Biꞌx che elel ok ke aj Edom wuꞌne, ex wuꞌne cjawil nscꞌoꞌne jun xjal tuꞌn tbant jlu tuꞌn, porque ¿alcye jun jacu pon ic tzaꞌn weye? ¿Alcye jun jacu chin oque tuj xtis tuꞌn? ¿Alcye jun pastor ẍneꞌl jacu cub weꞌ nwitze tuꞌn tkꞌojin wucꞌile? 20 Cybintze aju ma baj nnacꞌuꞌne tiꞌj tuꞌn nbinchanteye tiꞌj Edom, ex aju ma baj nximane tuꞌn tbant cyiꞌj ke xjal najl tuj tnam Temán: Twitz txꞌotxꞌ che xel jawoꞌn ic tzaꞌn ke ẍneꞌl mintiꞌ cyipun, ex che bajel xitun xjal aj Edom cyucꞌil ke cyja. 21 Oc tcub xitj tnam Edom, ckꞌajtel cyuwxix wen, biꞌx ctzajel luꞌlun txꞌotxꞌ tuꞌn, ex aju tkꞌajkꞌajel cywi xjal cbinjtzel max ttzi mar Cyak Queꞌyin. 22 Che oquel tzokpaj aj kꞌoj tiꞌj tnam Bosra ic tzaꞌn in tzaj lipan jun tꞌiw cyucꞌil ke tkꞌab licꞌun cyten, ex tuj kꞌij lu, akeju soldad cyuw cycꞌuꞌj tuj kꞌoj te Edom, ic che oquel ic tzaꞌn jun xuꞌj oc nnuꞌl itzꞌj tal, chi Dios.

23 Atzun tkanil lu tiꞌj tnam Damasco: Ma tzaj cychꞌixwi xjal najl tuj tnam Amat ex Arfad, porque ma pon jun tkanil mya baꞌn cyucꞌil, ma tzaj cyxobil ex mintiꞌtl tumel tuꞌn cyten tuj txubtxaj. 24 Mintiꞌtl cyipun aj Damasco, ma cub cyximan tuꞌn cyel ok. Ma tzaj nim cyxobil, ma tzaj taꞌw cyiꞌj ic tzaꞌn jun xuꞌj oc nnuꞌl itzꞌj tal. 25 Ma cyaj colin aju tnam baꞌn yolbil te, jatum in che tzalaj xjal wen. 26 Ax toc, tuj kꞌij lu akeju cuꞌxun at cyxol che cyjel paleꞌ cyuj ke cay, ex cycyakil xinak cyuw cycꞌuꞌj tuj kꞌoj che cymel. Akine Dios Tajaw Tcyakil in chin kꞌmante jlu. 27 Cꞌoquel nkꞌoꞌne tkꞌakꞌal muro toc tiꞌjele tnam Damasco, ex aju kꞌakꞌ lu che bel tzꞌeꞌy ke tja rey Ben-adad tuꞌn.

28 Atzun tkanil lu tuꞌn Kman cyiꞌj ke tiyjil Cedar ex cyiꞌj ke cawbil tuj txꞌotxꞌ Hazor, akeju cub cyiꞌj tuꞌn Nabucodonosor aju rey te Babilonia: Cyxiꞌye tuꞌn cyoc tzokpaje cyiꞌj ke tiyjil Cedar ex cybyoꞌn baje ke xjal najl tuj tjawitz kꞌij. 29 Cyetzan ele cyja ex cyoque te tajwil cyalun, cyetzan ele cycyakil cymacbil ex ke xbalun in che ajben te makbil ttzi cyja, cyiꞌn ele ke cychej camey, ex che schꞌine cyjaꞌ: At xobajil tuj tcyakil part. 30 Cyex oke akeye najl tuj tnam Hazor, cyxiꞌye ewal cyibe, chi Kman, porque ma bant tiꞌj tuꞌn Nabucodonosor aju rey te Babilonia tuꞌn toc tzokpaj cyiꞌje.

31 Akine Dios cxel nmaꞌne cye: Cyxiꞌye ex cyoc tzokpaje tiꞌj tnam lu aju najl tuj txubtxaj ex mintiꞌ in baj tcꞌuꞌj, mintiꞌ tlamel toc ex mintiꞌ pasador tiꞌj, tjunalx tcub. 32 Cyelkꞌamele ke cychej camey ex cycyakil ke cyalun. Tuj tcyakil part che bajel nsputune ke xjal lu ex tuj tcyakil part ctzajel wiꞌne mya baꞌn cyibaj. Akine Dios in chin kꞌmante jlu. 33 Te jumajx cꞌoquel txꞌotxꞌ Hazor te tzkij txꞌotxꞌ ex te cynajbil xoꞌj. Mi jun cpol najal juntl maj tuj txꞌotxꞌ lu ex milpe jun xjal cpol tuꞌn tten nok chꞌin tuj.

34 Tej ttzyet tcawin Sedequías tuj tnam Judá, tzaj tmaꞌn Kman tkanil lu te Jeremías, tiꞌj nasyon Elam: 35 Akine Dios aju Tajaw Tcyakil cxel nmaꞌne jlu: Cbel ntokine cyxobl plech aj Elam, aju cykꞌojbil nimxix in ajben. 36 Tuj tcyajil pacꞌ t-xe cyaꞌj ctzajel wiꞌne cykꞌikꞌ cyuwxix wen tiꞌj tnam lu, tuꞌntzun cybaj sputj aj Elam tuj tcyakil part, ex cyuj cycyakil nasyon che pol clolte cyib. 37 Che tzajel luꞌlun aj Elam wuꞌne cywitz aj kꞌoj cyiꞌj, akeju nnoꞌc tilil cyuꞌn tuꞌn cycub byonte cye, ctzajel nsamaꞌne nimxix ntxꞌuꞌjile ex cꞌixbisabl cyibaj, ex che xel nsamaꞌne soldad kꞌojlel cyiꞌj ocxi cynaj cycyakil. Akine Dios in chin kꞌmante jlu. 38 Cymel cyrey wuꞌne, cyucꞌix ke nejenel ateꞌ cyxol, ex cbel nkꞌoꞌne nkꞌukbile te cawbil tuj tnam Elam. Akine Dios in chin kꞌmante jlu. 39 Pero te tibajxi che ajetz wiꞌne juntl maj aj Elam tuꞌn cyul tuj cytanmi. Akine Dios in chin kꞌmante jlu.