2 Cymanxe tkanil tiꞌj jlu, cychicꞌbanxe cye nasyon, cyiꞌn jawe jun techal twitz cyaꞌj tuꞌn tyecꞌunjtz tkanil lu, miꞌn cub cyewane, cymanxe cyjaꞌ: Ma cub tiꞌj Babilonia, ma tzaj tchꞌixwi cydios xjal, Bel tbi, ex ma tzaj t-xobil cydios xjal, Merodac tbi, ma tzaj cychꞌixwi ex cyxobil ke tilbilal nnoꞌc cydiosin. 3 Porque tuj txꞌotxꞌ tuj tbankꞌab kꞌij in ojkelan ttzaj jun nasyon tuꞌn toc tzokpaj tiꞌj, ex cꞌoquel Babilonia tuꞌn te jun tzkij txꞌotxꞌ. Mi jun cpol najal juntl maj tuj, mi xjal ex mi alumaj, porque cycyakil che elex ok.

4 Chi Kman: Tuj tkꞌijlalil tzul che tzajel aj Israel ex aj Judá in che okꞌ wen jyolte weye, akine Cyman ex Cydios. 5 Cxel cykanin alcye be in xiꞌ tuj tnam Sión, ex atzun che xeꞌl in cymaꞌn cyjaꞌ: Koꞌke tucꞌil Kman, kjunan oc kib tucꞌil tuꞌn tbant tiꞌj jun kyol tucꞌil te jumajx, aju mlayx tzicꞌ tnaꞌnjtz kuꞌn, che chi.

6 Ke xjal etzan wuꞌne ic cyten ic tzaꞌn ke ẍneꞌl tzpetni ke; ma che el tzpet tiꞌj cybe cyuꞌn ke pastoril cye ex ma che cyaj colin twi witz. Nok cyjaꞌ cyicꞌ twiꞌ junjun witz ex ma tzicꞌ tnaꞌl cypeꞌn cyuꞌn. 7 Cycyakil aj kꞌoj e oc noj cyiꞌj biꞌx e jeꞌx chyoꞌn cyuꞌn, ex cyma aj kꞌoj cyjaꞌ: Mya akoꞌye at kile, porque ma che binchan il twitz Cydios aju tzꞌaklxix, aju oc keꞌ cycꞌuꞌj ktzan cyxeꞌchel tiꞌj.

8 Cyetz oke tuj tnam Babilonia, cyetze tuj cytxꞌotxꞌ aj Caldey, cyoque ic tzaꞌn ke tman chip in che cub nej cywitz ke ẍneꞌl. 9 Porque ctzajel nsamaꞌne nimcu cꞌloj soldad tuj txꞌotxꞌ tuj tbankꞌab kꞌij, mojl cyyol tuꞌn cyoc tzokpaj tiꞌj tnam Babilonia, cbajel cytxolban cyib tiꞌj ex cbel tiꞌj cyuꞌn. Akeju kꞌojlel lu nim cynabl, oc t-xi cyxoꞌn plech mintiꞌ in txalpuj chꞌin cykꞌab. 10 Cxel cyiꞌn aju at cye aj Caldey, cxel cyiꞌn tcyakilju in pon cycꞌuꞌj tiꞌj. Akine Dios in chin kꞌmante jlu.

11 Akeye aj Caldey e oque elekꞌ tiꞌj ju at cye ke xjal etzan wuꞌne, e jaw tzalaje nimxix, e jaw tꞌicpaje ic tzaꞌn jun tal vac tuj chaꞌx cꞌul, ex e jaw wijine ic tzaꞌn ke chej. 12 Pero ctzajel tchꞌixwi cytanmiye jatum e itzꞌje, ex cꞌoquel te mas chꞌin toclen cyxol mastl nasyon. Cꞌoquel te tzkij txꞌotxꞌ, puro tzꞌlaꞌj cyjel ten ex mi jun xjal cnajal tuj. 13 Mi aꞌl jun xjal cyjel ten tuj tuꞌn tlaj tkꞌoj Kman tiꞌj; oꞌcx cꞌoquel tcyakil te jun tzkij txꞌotxꞌ. Cycyakil keju che icꞌel bet tuj, che jawil secꞌpaj tiꞌj ex che xmayil tiꞌj oc cylonte aju castiw otok tzaj cyibaj.

14 Cybincham cytene akeye kꞌiꞌn xobl plech cyuꞌne, cytxolin baj cyibe tiꞌjele tnam Babilonia. Miꞌn tzaj cylasmiye cyiꞌj plech, cyxoꞌnxe cycyakil plech cyiꞌj, porque o che binchan il twitz Dios. 15 Che schꞌine tiꞌjele oc cyoc tzokpaje tiꞌj. Ma txi cykꞌon cyib aj Babilonia tuj cycwente, ma che cub xitj ke ja maꞌ cywaꞌl te cycolbil cyib, ma che cub xitj ke muro toc tiꞌjele tnam, porque atzun kꞌij lu ma xelin tuꞌn Kman tiꞌj cybinchben mya baꞌn; e t-xelin cyuꞌne cyiꞌj, cybinchame cyiꞌj ic tzaꞌn cye o cybincha cyiꞌj mastl tnam. 16 Miꞌn cyaj cykꞌoꞌne jun xjal tuj Babilonia tuꞌn tcub tkꞌoꞌn tawal ex ka tuꞌn tjaw tchmoꞌn twitz. Oc cylonte xjal akeju otok che pon kꞌiꞌn pres tuj Babilonia, oc tcub xitj tnam tuꞌn tlaj kꞌoj, che ajel meltzꞌaj tuj cytanmi, teyle junjun cꞌajel ok tuj ttanmi jatum tzajni.

17 Ic cyten aj Israel ic tzaꞌn jun peꞌn ẍneꞌl tzpetni ke, ma che baj sputj cyuꞌn balun. Nej ma cheꞌx chyoꞌn tuꞌn rey te Asiria, te tibajxi ma baj tokin cybakil tuꞌn Nabucodonosor aju rey te Babilonia. 18 Cyjaꞌtzun akine Dios aju Tajaw Tcyakil ex Cydios aj Israel cxel nmaꞌne jlu: Cbel tcastiw rey te Babilonia wuꞌne, cyucꞌix ke tnam in cawin cyibaj, ic tzaꞌn o nbinchaye tiꞌj rey te Asiria. 19 Che pol meltzꞌaj juntl maj aj Israel tuj cytxꞌotxꞌ wuꞌne, ic che oquel ic tzaꞌn ke ẍneꞌl, ctel nim cywa twi witz Carmelo, tuj txꞌotxꞌ Basán, tuj tiwitz txꞌotxꞌ cye aj Efraín ex tuj Galaad, ex cnojel cycꞌuꞌj wuꞌne. 20 Akine Dios cxel nmaꞌne jlu: Tuj tkꞌijlalil tzul cbajel jyet cyil aj Israel ex aj Judá pero mlay cnet, porque cbel nnajsaꞌne cyil keju otok che cyaj ankꞌin.

21 Cyoc tzokpaje cyiꞌj xjal najl tuj txꞌotxꞌ Merataim ex cyiꞌj keju najl tuj txꞌotxꞌ Pecod, cyoc tzokpaje cyiꞌj ex che cybyoncuye. Cybinchame tcyakil ic tzaꞌnx ma txi nmaꞌne cyeye. Akine Dios in chin kꞌmante jlu. 22 In binjtz tkꞌajkꞌajel kꞌoj tuj txꞌotxꞌ ex ma tzaj jun matij xitbil. 23 Ic tten Babilonia ic tzaꞌn jun martiy, o che baj cꞌixbisaꞌn cycyakil nasyon tuꞌn, pero ma cub tokj ex ma cub buchj. Ma che jaw secꞌpaj cycyakil nasyon tej ma cyil aju ma baj tiꞌj Babilonia. 24 Ma cub nkꞌoꞌne jun cꞌobil tiꞌja aya Babilonia, ex mintiꞌ ma tnaꞌya ma cub tzꞌaka tuj. Ma tzyeta tuꞌn porque ma jaw tiꞌn tiba wiꞌje, akine Dios. 25 Ma jaket tja Kman jatum cꞌuꞌn ke tmacbil in che ajben tuj kꞌoj, ex ma che etz tiꞌn tuꞌn cyajben te tuꞌnju at ttxꞌuꞌjil, porque at jun ttarey Kman aju Tajaw Tcyakil tuꞌn tbant tuj nasyon cye aj Caldey. 26 Cytzaje tuj tcyakil part tuꞌn cyoc tzokpaje cyiꞌj, cyjakoꞌncxe cytxꞌutxꞌ, cychmon baje tcyakil tiꞌxti at tuj tnam ex cyxitun baje; mi jun tuꞌn tcyaj ten. 27 Cybyoncuye cycyakil cysoldad, cysamanxe jatum taꞌ biybil cye. Ay becꞌbil cywitz, ma pon tkꞌijlalil tuꞌn tcub cycastiw.

28 In binjtz tkꞌajkꞌajel cywiꞌ keju ma che tzokpaj tuj tnam Babilonia, ma che pon tuj tnam Sión tuꞌn t-xi cychicꞌbaꞌn tzaꞌn tten ma xelin tuꞌn Kman Dios, tuꞌn tlaj cybinchben aj Babilonia mya baꞌn, tuꞌnju cub cyxitun tja Dios.

29 Cytxcontze cycyakil keju baꞌn che xoꞌn plech tuꞌn cyoc tzokpaj tiꞌj tnam Babilonia, cytxolbanx cyibe tiꞌjele tuꞌntzun mi jun tuꞌn tex tzokpaj; e tchjet cyuꞌn ic tzaꞌnx cybinchben. Cybinchame cyiꞌj ic tzaꞌnx cye o cybincha cyiꞌj mastl xjal, porque ma jaw cyniman cyib nwitze, akine Dios xjan cye aj Israel. 30 Cyjaꞌtzun, akeju cuꞌxun at cyxol, che bel byoꞌn cyuj ke cay, ex che cymel cycyakil cysoldad tuj kꞌij lu. Akine Dios in chin kꞌmante jlu. 31 Ate Kman aju Tajaw Tcyakil in tmaꞌn cyjaꞌ: Aya nasyon jawni twitz, ma tzaj nkꞌoje tiꞌja, ma pon tkꞌijlalil tuꞌn tcub tcastiwoya. 32 Cjawil tolj ex cbel tzꞌak aju nasyon jawni twitz, ex mi jun cjawil wabante te. Cꞌoquel nkꞌoꞌne tkꞌakꞌal cycyakil tnam ateꞌ tuj, ex tuꞌnju kꞌakꞌ lu, cbajel tzꞌeꞌy tcyakil cytxaꞌnile tnam.

33 Ate Kman aju Tajaw Tcyakil in tmaꞌn cyjaꞌ: Nnicꞌx yajbil cyuꞌn aj Israel ex aj Judá. Tzyuꞌn ke cyuꞌn aj kꞌoj cyiꞌj ex cycꞌiꞌ tuꞌn t-xi cytzokpiꞌn. 34 Pero aju tzokpilte cye nimxix tipun, ex atzun tbi jlu: Kman aju Tajaw Tcyakil. Axix toc atzun teju ccolil cyiꞌj cywitz aj kꞌoj tuꞌn cyten aj Israel tuj txubtxaj, atzun cye aj Babilonia ctzajel cyxobil tuꞌn.

35 Chi Kman cyjaꞌ: Che ul soldad kꞌojlel tiꞌj tnam Babilonia ex cyiꞌj keju najl tuj, cyiꞌj ke nejenel cye xjal ex cyiꞌj keju at cynabl. 36 Che ul soldad kꞌojlel cyiꞌj ke aj kꞌij ex che oquel te mintiꞌ cynabl. Che ul soldad kꞌojlel cyiꞌj cysoldad ex che tzajel luꞌlun tuꞌn cyxobil. 37 Che najel cychej ex cycarwaj in che ajben te cykꞌojbil; ke soldad otok che tzaj cytxcoꞌn tuj juntl nasyon te onil cye, che oquel mintiꞌ cyipun ic tzaꞌn ke xuꞌj. Che ul soldad kꞌojlel tiꞌj cykꞌinumabl ex cxel cyelkꞌaꞌn. 38 Che tzkijel ke toma in che pon tuj cytanmi; che ajel tzkij porque tuj tnam Babilonia at nim tilbilal cydios xjal icꞌbilxix ke, ex cyuꞌntzun ke jlu ma tzpet cynabl xjal.

39 Cyjaꞌtzun cꞌoquel tnam Babilonia te cyjul ke jil najl tuj tzkij txꞌotxꞌ ex te cyjul xoꞌj, ex tuj lugar lu che najal ke chyuꞌj avestrús cybi; te jumajx mlayx tzꞌoc juntl maj te cynajbil xjal. 40 Cbel xitj ic tzaꞌn e tenba ke tnam Sodoma ex Gomorra ex ke tnam cyvesin cyib cyucꞌil. Mi jun xjal cnajal juntl maj tuj tnam lu, ex milpe jun xjal tuꞌn tten nok chꞌin tuj. Akine Dios in chin kꞌmante jlu.

41 Tuj tbankꞌab kꞌij tzul jun nasyon nimxix tipumal, ex nimxix cybaj rey in bant cyten tuꞌn cytzaj max ttxaꞌnpun txꞌotxꞌ. 42 Ma bant cyten tucꞌil cyxobl plech ex tucꞌil cylans; txꞌuꞌj ke ex mintiꞌ in tzaj kꞌakꞌan chꞌin cycꞌuꞌj, aju tkꞌajkꞌajel cywiꞌ oc in che schꞌin ic tten ic tzaꞌn tkꞌajkꞌajel twi mar, ex cyjax ke cyibaj chej. Banin cyten tuꞌn cyoc tzokpaj kꞌojlel tiꞌja aya tnam Babilonia. 43 Oc tbinte rey te Babilonia tkanil lu, biꞌx che bel bakj ke tkꞌab tuꞌn t-xobil, ctzajel taꞌw cꞌixcꞌoj tiꞌj ic tzaꞌn jun xuꞌj oc nnuꞌl itzꞌj tal.

44 Nok minaben chin tzajele tiꞌj, ic tzaꞌn jun balun nneꞌtz tjakꞌ chcꞌul ttzi nima Jordán ex in tzaj ojkelan tuj chaꞌx cꞌul jatum in che waꞌn alumaj. Biꞌx che elel ok aj Babilonia wuꞌne, ex wuꞌne cjawil nscꞌoꞌne jun xjal tuꞌn tbant jlu tuꞌn, porque, ¿alcye jun jacu pon ic tzaꞌn weye? ¿Alcye jun jacu chin oque tuj xtis tuꞌn? ¿Alcye jun pastor ẍneꞌl jacu cub weꞌ nwitze tuꞌn tkꞌojin wucꞌile? 45 Cybintze aju ma baj nnacꞌuꞌne tiꞌj tuꞌn nbinchanteye tiꞌj Babilonia ex aju ma baj nximane tuꞌn tbant cyiꞌj ke xjal aj Caldey: Twitz txꞌotxꞌ che xel jawoꞌn ic tzaꞌn ke ẍneꞌl mintiꞌ cyipun, che bel byoꞌn ex che bajel xitun ke cyja. 46 Oc tcub xitj Babilonia ckꞌajtel cyuwxix wen, biꞌx ctzajel luꞌlun txꞌotxꞌ tuꞌn ex aju tkꞌajkꞌajel cywi xjal cbinjtzel cyuj mastl nasyon.