6 Cyex oke tuj Babilonia, cyclom cyibe alcye jacu bant tclonte tib, tuꞌntzun miꞌn cycyime tuꞌn tlaj cyil aj Babilonia. Ma pon tkꞌijlalil tuꞌn t-xelin tuꞌn Kman tiꞌj cybinchben mya baꞌn ex tuꞌn tcub cycastiw ic tzaꞌnx cybinchben. 7 Ic tten Babilonia tuj nkꞌabe ic tzaꞌn jun tal copa kꞌan pwak ttxꞌotxꞌil tcuꞌx vin tuj, in chyoꞌn cywiꞌ cycyakil xjal twitz txꞌotxꞌ tuꞌn, cyjaꞌtzun biꞌx tzacj cynabl xjal najl cyuj cycyakil nasyon, akeju xi cycꞌaꞌn vin lu. 8 Te jurat naj ma cub tzꞌak tnam Babilonia ex biꞌx ma baj xitj. Cyoc tene okꞌel tiꞌj, cyiꞌntze remey te kꞌanbil te ẍil tiꞌj, aver ka jacu banix. 9 Ma tzꞌoc kkꞌoꞌne remey tiꞌj Babilonia pero mintiꞌ ma banix, cycolin cyaje, ko ex tzalu, cu taj teylex te junjun tuj ttanmi, porque maꞌxix ju tcastiw ma cub ex biꞌx ma naj te jumajx.

10 Ma txi tbinchaꞌn Kman kiꞌj; chux keye, koꞌ kꞌmalte tuj tnam Sión aju ma tbincha Kman aju Kdios. 11 Ma cub t-ximan Kman tuꞌn tcub t-xitun tnam Babilonia, ex ma txi tmaꞌn cye ke rey te tnam Media tuꞌn cykꞌojin tiꞌj tuꞌntzun t-xelin tuꞌn Kman cyiꞌj, ex tuꞌn t-xelin tuꞌn tiꞌj ju o cybincha tiꞌj tja. Cyjakuꞌn baje cywiꞌ ke plech ex cytzyume ke makbil in che ajben tuj kꞌoj, 12 Cyyecꞌun jawe bander tuꞌn cyoc tzokpaje tiꞌj muro toc tiꞌjele tnam Babilonia, cykꞌoncuye mas nim cyajlal soldad, cykꞌoncuye txkan soldad te xkꞌukil, ex cycub ten txkantl tuj ewaj nok list cyten, porque cbantel tuꞌn Kman aju o cub t-ximan tuꞌn tbinchante cyiꞌj ke xjal najl tuj tnam Babilonia. 13 Aya tnam Babilonia tcuba cyxol ke nima matijxix ex nimxix tkꞌinumabla at, ya ma pon kꞌij tuꞌn tnaja, ma pon baj kꞌij tuꞌn ttena. 14 Ate Kman aju Tajaw Tcyakil ma txi tmaꞌn jun yol axix toc tuꞌnx tib: Che ul nim aj kꞌoj tiꞌja wuꞌne ic tzaꞌn cybaj ẍplon, ex cxel cybitzan bitz te cambabl tiꞌja.

20 Aya tnam Babilonia ic ttena tuj nkꞌabe ic tzaꞌn jun martiy, ex ic tzaꞌn ke nmacbile in che ajben tuj kꞌoj, ajbena wuꞌne tuꞌn cycub xitj ke nasyon ex ke cawbil. 21 Ajbena wuꞌne tuꞌn cynaj ke chej, cyucꞌix ke xjal cyjax cyibaj, cyucꞌix ke carwaj ex ke yucul cye. 22 Ajbena wuꞌne tuꞌn cynaj ke xinak ex ke xuꞌj, ke tij xjal ex ke kꞌa, ke cuꞌxun ex ke kꞌapoj, 23 ajbena wuꞌne tuꞌn cynaj ke pastor cyucꞌix ke cyẍneꞌl, ke chꞌoquil txꞌotxꞌ cyucꞌix ke cywacẍ, ke cawil ex ke xjal at cyoclen cytxlaj.

24 Pero cywitzxe cbel nkꞌoꞌne tcastiw tnam Babilonia ex cycyakil aj Caldey, tuꞌn tlaj tcyakil mya baꞌn cybincha tiꞌj tnam Sión. Akine Dios in chin kꞌmante jlu. 25 Aj kꞌoj kine tiꞌja aya tnam Babilonia. Ic ttena ic tzaꞌn jun witz xitul tcyakil. Ma baj t-xituna tcyakil twitz txꞌotxꞌ. Akine Dios cxel nmaꞌne jlu: Cxel nnukpiꞌne nkꞌabe tuꞌn tcub tcastiwoya wuꞌne, ctzajel ntolina twitz jun pic maꞌ twaꞌl ex cꞌoquela wuꞌne ic tzaꞌn jun witz otok baj tzꞌeꞌy. 26 Mi jun abj ctzajel kꞌiꞌn tiꞌj ttxꞌakan tnam Babilonia tuꞌn cyjaw binchet ke ja juntl maj tzalu, te jumajx cꞌoquel tnam te tzkij txꞌotxꞌ. Akine Dios in chin kꞌmante jlu.

27 Cyyecꞌun jawe bander twitz cyaꞌj, cykꞌajtzan oque chun cyuj ke nasyon, cybinchame cyten ke nasyon tuꞌn cyoc tzokpaj kꞌojlel tiꞌj tnam Babilonia, cychmon oque ke nasyon Ararat, Mini ex Askenaz tuꞌn cyoc tzokpaj tiꞌj, cykꞌoꞌnque jun nejenel tuꞌn tcub nej tuj kꞌoj. Che ojkelinx ke chej cyuꞌne ic tzaꞌn in cheꞌx lipan ke ẍplon nimxix cyajlal. 28 Cybinchame cyten ke nasyon tuꞌn cyoc tzokpaj tiꞌj; akeju rey te Media cyucꞌix ke gobernador ex ke nejenel at cyxol ex cycyakil ke xjal jatum in che cawin.

29 Ma tzaj luꞌlun txꞌotxꞌ ex in yucch wen, porque ma japun tuꞌn Kman aju ximamaj tuꞌn tiꞌj Babilonia, tuꞌn toc te jun lugar tzkij txꞌotxꞌ mintiꞌ xjal tuj. 30 Ke soldad te Babilonia ma txi cycolin tuꞌn cykꞌojin ex ma tzꞌocx cylamon cyib cyuj ke ja te cycolbil cyib, ya mintiꞌtl cyipun, ma che oc ic tzaꞌn ke xuꞌj. Ma tzꞌoc kꞌoꞌn tkꞌakꞌal cyja ex ma che baj piẍj ke pasador toc cyiꞌj tlamel tnam. 31 Tcyakil ttxaꞌnile tnam in che tzaj ke sanjel kꞌmalte tkanil te rey te Babilonia ka otok cub tiꞌj enter tnam. 32 Ma che tzyet ke xajbil aꞌ cyuꞌn aj kꞌoj, ma tzꞌoc cykꞌoꞌn tkꞌakꞌal tkan ajlaj in chꞌiy tuj soban ex ma tzaj nim cyxobil ke soldad te Babilonia. 33 Porque ate Kman aju Tajaw Tcyakil ex Cydios aj Israel in tmaꞌn cyjaꞌ: Ic tten Babilonia ic tzaꞌn jun peꞌn jatum in cub wabat triw tuꞌn tel ttxcꞌomil, ex chꞌix tul canun tkꞌijlalil tuꞌn toc chmet twitz awal.

34-35 Che chi aj Jerusalén, akeju najl tuj tnam Sión: Ma ko baj tpaẍuꞌn Nabucodonosor aju rey te Babilonia, ex ma koꞌx tchyoꞌn; ma ko cyaj tkꞌoꞌn ic tzaꞌn jun lak mintiꞌ tuj. Ic tten ic tzaꞌn jun nintz txcup, ma koꞌx tbalkꞌuꞌn, ma noj tcꞌuꞌj tuꞌn kkꞌinumabl ma tzꞌel tiꞌn ke ex ma ko etz tlajoꞌn tuj ktanmi. E t-xi cychjoꞌn aj Babilonia aju mya baꞌn o cybincha kiꞌj ex e t-xi cychjoꞌn aj Caldey tuꞌnju nim xjal cub cybyoꞌn.

36 Chi Kman cyjaꞌ: Akine chin xel binchante cyiꞌje, cxelil wuꞌne cyiꞌj aj kꞌoj cyiꞌje, biꞌx che ajel tzkij ke nima wuꞌne ex ke twi aꞌ at tuj Babilonia. 37 Nok ttxꞌakan tnam Babilonia cyjel ten; te cynajbil xoꞌj cꞌoquel ex mintiꞌ xjal cnajal tuj. Cycyakil xjal che jawil secꞌpaj tiꞌj ex che xmayil tiꞌj. 38 Cycyakil aj Babilonia che jawil wuyin ic tzaꞌn ke balun, ex che jawil tzanun ic tzaꞌn ke tal balun. 39 Octzun ttzaj el cycꞌuꞌj wen, cbel nkꞌoꞌne jun nintz waꞌn cywitz tucꞌix cycꞌa vin tuꞌntzun cytzalaj ex tuꞌn tchyoꞌn cywiꞌ; entons ctzajel cywatl ex miꞌn tzul cynabl te jumajx. Akine Dios in chin kꞌmante jlu. 40 Che xel wiꞌne ic tzaꞌn in cheꞌx kꞌiꞌn ke tal ẍneꞌl, ke tman chip ex ke tman ẍneꞌl tuj biybil cye.

41 Ma cub xitj ex ma cub tiꞌj tnam Babilonia aju puro baꞌn yolbilte tuj tcyakil twitz txꞌotxꞌ. Biꞌx in che jaw secꞌpaj ke nasyon oc cylonte aju otok baj tiꞌj. 42 Ma tzꞌocx mar tuj tnam Babilonia ex ma cyaj mulkꞌaj tjakꞌ aꞌ. 43 Ke tnam at tuj tcwent ma che oc te jun tzkij txꞌotxꞌ xobajilxix, jun txꞌotxꞌ jumajx tzkij jatum mi jun xjal cnajal tuj, ex milpe jun xjal tuꞌn tten nok chꞌin tuj.

44 Cbel tcastiw Bel wuꞌne, aju tilbilal cydios xjal at tuj Babilonia, cꞌelel wiꞌne te tcyakilju otok tzꞌel tiꞌn cye xjal nej, ex mlayx che pon juntl maj ke xjal te mastl nasyon tuj. Cbel xitj muro toc tiꞌjele tnam Babilonia. 45 Cyetze tuj tnam Babilonia akeye xjal etzan wuꞌne, ex teylex te junjun clom tib tuꞌn miꞌn tcyim, porque nimxix ntxꞌuꞌjile ma tzaj. 46 Miꞌn che jaw secꞌpaje ex miꞌn tzaj cyxobile tuꞌnju yol in bet cyxol xjal tuj txꞌotxꞌ lu; junxitl tten yol in bet cyxol xjal junjun abkꞌi, at yol ka in che kꞌojin xjal tuj tnam ex ka in che kꞌojin ke cawil cyxolx. 47 Cyjaꞌtzun tzul tkꞌijlalil che bajel nxitune ke tilbilal ateꞌ tuj Babilonia. Ctzajel tchꞌixwi tcyakil txꞌotxꞌ Babilonia ex cycyakil cyimni che bel paleꞌ tuj tnam. 48 Che tzalajel cyaꞌj ex txꞌotxꞌ tucꞌix tcyakilju at cywitz oc tcub xitj tnam Babilonia, porque tuj txꞌotxꞌ tuj tbankꞌab kꞌij che tzajel aj kꞌoj xitul te. Akine Dios in chin kꞌmante jlu. 49 Cbel xitj tnam Babilonia tuꞌn tlaj tcublen cybyoꞌn aj Babilonia ke aj Israel ex tuꞌn cylaj ke xjal cub cybyoꞌn tuj enter twitz txꞌotxꞌ.

50 Cyel oke ex miꞌn che weꞌye akeye ma che tzokpaj ex mintiꞌ ma che cyime; che ximane tiꞌj Kman oc cylakꞌeꞌye najchak ex cynaꞌntze tnam Jerusalén. 51 Cyeye in cymaꞌne cyjaꞌ: Ma tzaj kchꞌixwiye tuꞌnju in che yasun xjal kiꞌje, nimxix kchꞌixwiye ma tzaj, porque ma che ocx stranjer xjal cyuj Lugar Xjan te tja Kman, che chiye. 52 Cyjaꞌtzun chi Kman cyjaꞌ: Tzul tkꞌijlalil che bajel nxitune ke tilbilal ateꞌ tuj Babilonia, ex tuj tcyakil txꞌotxꞌ te Babilonia che ayayal xjal tuꞌn ẍil toc cyiꞌj. 53 Masque che jax aj Babilonia max twitz cyaꞌj tuꞌn tjaw cybinchaꞌn ke ja maꞌ cywaꞌl te cycolbil cyib, pero che xel nsamaꞌne aj kꞌoj cyiꞌj tuꞌn cybaj xitun. Akine Dios in chin kꞌmante jlu.

54 Cybinxe tkꞌajkꞌajel cywi xjal tuj Babilonia in che schꞌin tuꞌn taꞌw cꞌixcꞌoj ex in che wuyin tuj txꞌotxꞌ cye aj Caldey, 55 porque ma cub xitun tnam Babilonia tuꞌn Kman ex biꞌx ma weꞌ tkꞌajkꞌajel cywi xjal tuj tnam. Ic cyten aj kꞌoj cyiꞌj ic tzaꞌn mar in pulin wen. 56 Ma che ul aj kꞌoj xitulte tnam Babilonia, ma che tzyet ke soldad cyuꞌn ex ma baj cytokin ke cyxobl plech. Porque in cub tkꞌoꞌn Kman Dios cycastiw xjal ic tzaꞌnx cybinchben. 57 Ate Rey, aju toc tbi Kman Tajaw Tcyakil, in tmaꞌn cyjaꞌ: Cchyoꞌl cywiꞌ ke nejenel te Babilonia wuꞌne, icx ke aj nabl ex ke cawil at cyxol, cyucꞌix ke xjal maꞌ cyoclen ex ke soldad, ex oc ttzaj cywatl, ya miꞌn tzul cynabl te jumajx. 58 Akine Dios aju Tajaw Tcyakil in nmaꞌne jlu: Che bel xitj cycyakil muro maꞌ cywitz toc tiꞌj tnam Babilonia ex cꞌoquel cykꞌakꞌal ke tlamel tnam maꞌ cywaꞌl; nokx gan otok che akꞌnan tnam xjal ex otok che sict ke nasyon tiꞌj akꞌuntl lu, nok tuꞌn tajben te twa kꞌakꞌ.

59 Tuj tcyajin abkꞌi ttzyetlen tcawin Sedequías aju rey te Judá, xi t-samaꞌn Jeremías jun tkanil tuꞌn t-xi tiꞌn Seraías aju tcyꞌajal Nerías ex tal tchman Maasías, tej t-xiꞌ tuj Babilonia tucꞌil rey Sedequías, como atzun Seraías binchalte tiꞌj jatum tuꞌn ttan rey Sedequías. 60 Cuꞌxtzun ttzꞌiban Jeremías tuj jun libro tcyakil tkanil tiꞌj cꞌixbisabl attok ttzajel tibaj tnam Babilonia ex tcyakilju kꞌmamaj tiꞌj tnam lu. 61 Ex xi tmaꞌn Jeremías te Seraías cyjaꞌ: Oc tpona tuj tnam Babilonia, nok tzicꞌ tnaꞌl tuꞌna tuꞌn tjaw t-schꞌiꞌna tcyakil tkanil lu. 62 Ex cxel tmaꞌna cyjaꞌ: Aya Nman, o tmaya tuꞌn tcub t-xituna lugar lu ex mi jun cyjel ankꞌin tuj, mi ke xjal ex mi ke alumaj, porque cꞌoquel tuꞌna te tzkij txꞌotxꞌ te jumajx. 63 Octzun tbaj t-schꞌiꞌna libro lu, cꞌaloꞌnca tiꞌj jun abj ex xoꞌnxa tuj nima Éufrates, 64 ex bix txi tmaꞌna cyjaꞌ: Cyjaꞌxtzun cyjel mulkꞌaj tnam Babilonia tjakꞌ aꞌ, ex mlay jaw binchet juntl maj tuj xitbilte ctzajel t-samaꞌn Kman. Ke xjal najl tuj biꞌx che najel.

Atzun in pon baj ke tyol Jeremías tzalu.