Ke tilbilal nnoꞌc cydiosin xjal ex aju cꞌulbil te Dios axix toc
10
Cybintze akeye aj Israel aju yol in tmaꞌn Kman cyeye: 2 Chi cyjaꞌ: Miꞌn tzꞌel cycanoꞌne cyiꞌj txkantl nasyon, ex miꞌn che jaw secꞌpaje cyiꞌj ke techal at twitz cyaꞌj, ic tzaꞌn in bant cyuꞌn txkantl nasyon. 3 Aju cyocslabl ke xjal lu mintiꞌ tajben. In jaw cytxꞌemin jun tzeꞌ tjakꞌ chcꞌul ex in baj xpeꞌlin tuꞌn tzꞌkab tuꞌn jun calpinter, 4 nnoꞌc cyloꞌtzin sak pwak ex kꞌan pwak tiꞌj, in baj cycyuwsaꞌn tuꞌn clavo ex tuꞌn martiy tuꞌntzun mi ticꞌ tzꞌak. 5 Akeju tilbilal cydios xjal lu ic cyten ic tzaꞌn poẍ in xi cykꞌaꞌcj xjal tuj tkan sandiy, miban che yolin, ex il tiꞌj tuꞌn cyxi iket porque miban che bet. Miꞌn che xobe cywitz ke tilbilal lu, porque mintiꞌ cyipumal tuꞌn cybinchante jun mya baꞌn ex ka jun baꞌn cyiꞌje.6 Aya Nman, mintiꞌ juntl ic tzaꞌn teya maꞌxix toclena, aju tbiya maꞌxix toclen ex nimxix tipumal. 7 ¿Atpe jun mya il tiꞌj tuꞌn t-xob twitza, aya rey cye cycyakil nasyon? Il tiꞌj tuꞌn tten tchiylala cye cycyakil xjal, porque cyxol cycyakil xjal at cynabl cyuj cycyakil cawbil tuj tcyakil twitz txꞌotxꞌ, mintiꞌ juntl ic tzaꞌn teya. 8 Cycyakil xjal lu mintiꞌ cynabl, mintiꞌ chꞌin in pon tuj cyximbetz, mintiꞌ chꞌin xnakꞌtzbil in tzaj kꞌoꞌn cye tuꞌn jun piẍ tzeꞌ. 9 Tuj tnam Tarsis in tzaj kꞌiꞌn sak pwak txꞌinoꞌmaj, ex tuj tnam Ufaz in tzaj kꞌan pwak. Tiꞌjtzun jlu in che baj binchaꞌn ke tilbilal cyuꞌn ke xjal baꞌn che akꞌnan tiꞌj kꞌan pwak ex sak pwak; nnoꞌc kꞌoꞌn cyxbalun ẍkꞌilin queꞌyin, tucꞌix juntl wik xbalun ẍjulin queꞌyin tbanilxix wen. Tcyakil jlu in baj binchaꞌn cyuꞌn ke xjal at cynabl tuꞌn cybinchante. 10 Atzunte Kman axix toc Dioste, ate Dios itzꞌ ex ate Rey te jumajx; oc in tzaj tkꞌoj, biꞌx in tzaj luꞌlun txꞌotxꞌ tuꞌn, ex aju tkꞌoj mlay tzicꞌx cyuꞌn ke nasyon. 11 Kꞌmanxa cye xjal cyjaꞌ: Che bel naj twitz txꞌotxꞌ akeju dios mya cyuꞌn o bant cyaꞌj ex txꞌotxꞌ, mi jun cyjel ten tuj tcyakil twitz txꞌotxꞌ.
Bitz te nimsabl tbi Dios
12 Tuꞌn tipumal Kman o bant txꞌotxꞌ; tuꞌn tnabl cub tkꞌukbaꞌn, ex tuꞌn tojtzkibl xi tlicꞌpuꞌn cyaꞌj.
13 Oc tkꞌajt Dios in tzaj julin aꞌ twitz cyaꞌj, ex in tzaj tiꞌn muj ttxaꞌnpun twitz txꞌotxꞌ tuꞌn tjapun twitz cyaꞌj, in tzaj koptzꞌaj tkan kꞌancyok tuꞌn tuj tmijil tkan jbal, ex nneꞌtz tiꞌn cykꞌikꞌ jatum cꞌuꞌn tuꞌn.
14 Cycyakil xjal mintiꞌ cynabl ex mintiꞌ nneꞌl cynicꞌ tiꞌj. Ctzajel cychꞌixwi keju in che cub binchante tilbilal, tuꞌnju puro sbul ke tilbilal ex mya itzꞌ ke.
15 Nokx gan ke ex mintiꞌ cyajben; oc tpon tkꞌijlalil tuꞌn ttzaj jwisi tuꞌn Kman, che najel.
16 Mya ic tten aju Tdios Jacob, aju binchante tcyakil aju at. Acu jaw scꞌonte cye aj Israel te jun tetzbil, ex atzun tbi jlu: Kman aju Tajaw Tcyakil.
In yolin Jeremías cyucꞌil aj Judá
17 Akeye aj Jerusalén, cychmoꞌn baje ke tiꞌxti at cyeye tuꞌntzun cyexe, porque txolin cyiꞌje cyuꞌn aj kꞌoj. 18 Porque chi Kman cyjaꞌ: Jaꞌlo che elex nlajoꞌne ke xjal najlke tuj tnam lu tuꞌn cypon najchak, ex che oquel nkꞌoꞌne tuj yajbil cye ocxi tpon taꞌw cyiꞌj.
19 Che chi aj Jerusalén in cymaꞌn: Ay becꞌbil kwitz, ma ko naj. Mintiꞌ kꞌanbil tiꞌj ẍil toc kiꞌj. Atzun kcastiw jlu il tiꞌj tuꞌn ticꞌx kuꞌn. 20 Ma cub xitj ktanmi ic tzaꞌn in cub xitj jun ja lon, ex cycyakil cyꞌjaj cꞌalobl te ma che baj tzakj. Ya mi aꞌl ke cꞌwaꞌlbaj ateꞌtok tuj, ma che baj naj, mi aꞌl jun baꞌn tjaw binchante juntl maj ja lon, ex mi aꞌl jun baꞌn t-xi licꞌpunte juntl maj aju lon in ajben te xmuj. 21 Ke nejenel cye tnam xjal lu mintiꞌ cynabl, mintiꞌ in che jyon tiꞌj Kman, cyjaꞌtzun mya baꞌn ma tzꞌela te cye, ex cycyakil xjal at tuj cycwent ma che el sputj. 22 Cybintze tkanil lu: Tzul jun tkꞌajkꞌajel cyuwxix wen cyuꞌn xjal tuj txꞌotxꞌ tuj tbankꞌab kꞌij, ex akeju tnam ateꞌ tuj Judá che cyjel ten cyuꞌn te mintiꞌ xjal cyuj, oꞌcx ke xoꞌj che ankꞌil cyuj.
23 Nman, baꞌn wuꞌne, mya ax te xjal tajaw tchwinklal, ex mlay tzꞌel tnicꞌ xjal tiꞌj alcye be baꞌn tuꞌn tbet tuj. 24 Ko tcawin cuba tuj cheba ex mya tuꞌn nim tkꞌoja, porque biꞌx jacu ko naje tuꞌna icju. 25 Chituntz tkꞌoja cyibaj ke nasyon mintiꞌ in xi cyniman ka aya Dios, ex cyibaj tnam xjal mintiꞌ in che cubsan twitza, porque ma che baj naj ke tiyjil Jacob cyuꞌn, biꞌx ma che naj cycyakil cyuꞌn, ex tcyakil cytxꞌotxꞌ ma baj naj cyuꞌn.