Atzun weye xi ntzakꞌweꞌne: Ictzunju Nman.

6 Tzajtzun tmaꞌn Kman weye: Kꞌmanxa ke yol lu cyuj ke tnam te Judá ex cyuj ke cay te Jerusalén: Chi Kman cyjaꞌ: Cybintze alcye yol cyaj bant tiꞌj wuꞌne cyucꞌil ktzan cyxeꞌchele ex japunx cyuꞌne. 7 Tej cyetz wiꞌne cyxeꞌchele tuj Ejipt, xi nmaꞌne cye tuꞌn t-xi cyniman kine; atxix ojtxi ax icx jaꞌlo cucx t-xi nmaꞌne cye icju. 8 Pero mintiꞌ ma chinx cybiꞌn ex mintiꞌ ma chinx cyniman, nok oꞌcx teyle junjun ma cub tcyuwsaꞌn tanmi tuꞌn tbinchante mya baꞌn ic tzaꞌn tma tanmi; mintiꞌ cyajbe tuꞌn tjapun cyuꞌn aju otok txi nmaꞌne cye, cyjaꞌtzun tzaj nkꞌoꞌne mya baꞌn cyibaj, ic tzaꞌnx ju yol cyaj bant tiꞌj wuꞌne cyucꞌil.

9 Atzunte Kman tzaj tmaꞌn weye: Ma mojeꞌ cyyol aj Judá ex ke xjal najlke tuj Jerusalén tuꞌn tjaw cyiꞌn cyib wiꞌje. 10 Mintiꞌ xi cyniman nyole, ax ma cybincha ic tzaꞌn cybincha ktzan cyxeꞌchel. Ma cheꞌx lpeꞌ cyiꞌj txkantl dios mya Dios ke, tuꞌn cycꞌulun cywitz. Tzaꞌnx ke aj Israel, ax icx ke aj Judá ma che icꞌ tibaj nleye, aju cyaj bant tiꞌj wuꞌne cyucꞌil ktzan cyxeꞌchel. 11 Cyjaꞌtzun ctzajel nsamaꞌne jun cꞌixbisabl cyiꞌj ex mlayx che tzokpaj tuj. Masque che cubsan nwitze, mlayx che tzaj nbiꞌne. Akine Dios in chin kꞌmante jlu. 12 Che xeꞌltzun ke aj Judá ex ke xjal najl tuj Jerusalén kanil onbil cyucꞌil ke tilbilal nnoꞌc cydiosin, akeju in cub patun storac cywitz, pero mlayx che clet cyuꞌn ke jlu oc ttzaj cꞌixcꞌoj cyiꞌj. 13 Akeye aj Judá: Ic cyajlal cydiose at ic tzaꞌn cyajlal cytanmiye, ex ic tzaꞌn cyajlal ke cay tuj tnam Jerusalén, icxtzun cyajlal ke altar ma jaw cybinchaꞌne tuꞌn tcub cypatune storac twitz Baal aju tilbilal jumajx icꞌbilxix. 14 Tuꞌntzun jlu, aya Jeremías, miꞌn naꞌntla Dios cyiꞌj ke xjal lu, ex miꞌn cubsana nwitze cyiꞌj, porque mlayx cheꞌx nbiꞌne oc ttzaj cykanin onbil weye oc ttzaj cꞌixbisabl cyiꞌj.

15 Ke xjal cꞌujlaꞌn wuꞌne, nim mya baꞌn in cybinchaꞌn. ¿Titzun cyoclen tuꞌn cyocx tuj njaye? Tuj cyximbetz ka tuꞌnju in tzaj cykꞌoꞌn chojbil ex chibj weye cꞌicꞌex tiꞌj tuꞌn ttzaj castiw cyibaj. ¿Baꞌnpe tuꞌn tjaw cyniman cyib tiꞌj jlu? 16 Tuj tkꞌijlalil ojtxi toctok cybi wuꞌne: Jun tkan olivo nimxix t-xak ex nimxix twitz tbanil che queꞌyin, atzun jaꞌlo cꞌoquel tkꞌakꞌal t-xak wuꞌne tucꞌil jun tkꞌajkꞌajel cyuwxix wen, ex che bajel ntokine ke tkꞌab.

17 Akine Dios aju Tajaw Tcyakil, aju cuꞌx awante cyeye, ma txi nmaꞌne tuꞌn ttzaj mya baꞌn cyibaje tuꞌn tlaj tcyakil mya baꞌn ma cybinchaye, akeye aj Israel ex aj Judá. Ma tzaj nkꞌoje cyiꞌje tuꞌnju ma cub cypatune storac twitz Baal, chi Dios.

18 Ma tzaj tyecꞌun Kman tuꞌn tel nnicꞌe tiꞌj cyximbetz aj kꞌoj in bant cyten tuꞌn cybinchante mya baꞌn wiꞌje. A Kman jakonte nwitze tuꞌn tel nnicꞌe cyiꞌj ti in baj cye wiꞌje. 19 Ic ntene ic tzaꞌn jun tal ẍneꞌl mans in xi kꞌiꞌn tuj biybil te, mintiꞌ baꞌn wuꞌne ka in che jyontok tumel tuꞌn cyoc tzokpaj wiꞌje. In cymaꞌntok cyjaꞌ: E tnaj xinak lu kuꞌn ic tzaꞌn in jaw txꞌemit jun wiꞌ tzeꞌ tucꞌix twitz; kbyonc tuꞌntzun mi jun cucx ttzaj naꞌnte tbi.

20 Pero aya Nman aju Tajaw Tcyakil, aya Jwes tzꞌaklxix, ojtzkiꞌn tuꞌna cyximbetz xjal max tuj cyanmi, kꞌontza ambil weye tuꞌn toc nqueꞌyine oc tcub cycastiw ke xjal lu tuꞌna, porque tuj tcwenta ma txi nkꞌoꞌne aju in baj wiꞌje. 21 Ke xinak aj Anatot in che jyon tumel tuꞌn ncub byoꞌne cyuꞌn, ex in cymaꞌn weye tuꞌn miꞌn nyoline tiꞌj tyola cye; katzun miꞌn, oꞌcx tuꞌn ncub byoꞌne cyuꞌn. 22 Cyjaꞌtzun, ate Kman aju Tajaw Tcyakil chi in tmaꞌn cyiꞌj ke xinak lu: Cbel cycastiw wuꞌne; ke cuꞌxun che cymel tuj kꞌoj, ke cycyꞌajal ex ke cymeꞌjel che cymel tuꞌn weꞌyaj. 23 Mi jun cye cyjel ankꞌin, porque tzul tkꞌijlalil tuꞌn ttzaj jun mya baꞌn cyibaj ke xinak te tnam Anatot, ex cbel cycastiw wuꞌne, chi Kman.