Xi yolin Jeremías tucꞌil Dios
12
Tzꞌaklxix teya Nman tuꞌn woc tene yolil tucꞌila, ex masque icju, waje txi nkanine junjun nxjele teya: ¿Tikuꞌn baꞌn nneꞌl tcyakil cye ke xjal binchal mya baꞌn? ¿Tikuꞌn tuj txubtxaj in che ankꞌin ke xjal in che ximan tuꞌn cybinchante mya baꞌn cyiꞌj cyucꞌil? 2 Tuꞌna ma che oc ic tzaꞌn jun wiꞌ tzeꞌ in cuꞌx awaꞌn, in xiꞌ tlocꞌ, in chꞌiy ex nnoꞌc twitz. Akeju xjal lu nok tuꞌn cytziꞌ in tzaj cynaꞌn tbiya, atzunju cyanmi najchak taꞌ tiꞌja. 3 Atzun teya Nman, ojtzkiꞌn kine tuꞌna; in chin tqueꞌyina ex baꞌn tuꞌna alcyechak nximbetze tiꞌja. Kꞌinxa ke xjal lu ic tzaꞌn in cheꞌx kꞌiꞌn ke ẍneꞌl tuj biybil cye, che tpaꞌn ela alcye kꞌij tuꞌn cycyim tuꞌna. 4 ¿Jteꞌtltzun kꞌij ctel txꞌotxꞌ te tzkij ex tuꞌn tten cꞌul te tzkij tuj cojbil? Ma che cyim ke jil ex ke chyuꞌj tuꞌn tlaj cybinchben xjal mya baꞌn, akeju najl tuj txꞌotxꞌ lu, porque in cymaꞌn: Miꞌn til Jeremías alcye cbajel kiꞌj, che chi.Aju tzakꞌwebl tuꞌn Dios
5 Ka nimxix in sicta oc tjaw ojkelina cyucꞌil xjal, ¿tzaꞌntzun tten tuꞌn t-xcyeꞌya tuꞌn tkelina cyucꞌil xjal cyjax cyibaj chej? Ka in jaw tolja tuj chkꞌajlaj, ¿titzun cbantel tuꞌna tuꞌn tbeta tjakꞌ chcꞌul ttzi nima Jordán? 6 Axpe ke termaniya ex ke xjal at t-xilena cyucꞌil ma jaw cyiꞌn cyib tuꞌn cykꞌojin tiꞌja, in che schꞌin tiꞌja tucꞌil cykꞌoj. Miꞌn tzꞌoc keꞌ tcꞌuꞌja cyiꞌj, masque che tzaj yolin teya tucꞌil yol puro baꞌn.
Tzaj tbis Kman tiꞌj ju otok tzaj cyiꞌj tnam xjal etzan tuꞌn
7 Ma che cyaj ncoline ke xjal etzan wuꞌne, ma cyaj ncoline wetzbile. Aju tnam o ncꞌujlaye ma txi nkꞌoꞌne tuj cykꞌab aj kꞌoj. 8 Aju tnam oc te wetzbile, jaꞌlo ic tten te weye ic tzaꞌn jun balun te tjakꞌ chcꞌul, in tzanun wiꞌje; cyjaꞌtzun ma tzꞌel wicꞌune. 9 Aju tnam etzan wuꞌne ic tten ic tzaꞌn jun chyuꞌj tbanilxix queꞌyin ttzmal, aju in che oc tzokpaj txkantl chyuꞌj tiꞌj. Cytzaje cycyakile akeye txcup te tjakꞌ cꞌul, cychmon oc cyibe tuꞌn cychyoꞌne tiꞌj. 10 Ma baj naj tkan n-uvaye cyuꞌn nimcu nejenel cye aj kꞌoj, ma baj cywaban aju cojbil etzan wuꞌne, aju ntxꞌotxꞌe tbanilxix ma tzꞌoc cyuꞌn te jun tzkij txꞌotxꞌ, 11 ax toc ma cyaj cykꞌoꞌn te jun tzkij txꞌotxꞌ ex ma cyaj ten tuj bis. Tcyakil txꞌotxꞌ ma tzꞌoc te tzkij txꞌotxꞌ ex mi aꞌl jun in tzaj tbis tiꞌj. 12 Cywiꞌ cycyakil tal witz tuj tzkij txꞌotxꞌ e tzaj aj kꞌoj xitul tcyakil, porque akine Dios tuꞌn nspadiye che najel cycyakil tnam ex mi jun ctel tuj txubtxaj. 13 Cuꞌx cyawaꞌn triw, pero aju twitz jaw cyiꞌn puro chꞌiꞌx, tcyakil cyakꞌunben nokx gan. Tzaj cychꞌixwi tuꞌnju misicyer twitz awal ma chmet cyuꞌn tuꞌn tlaj nimxix ntxꞌuꞌjile.
Aju yol tzaj ttziyan Kman cye tnam cyvesin cyib cyucꞌil aj Israel
14 Chitzun Kman in tmaꞌn cyiꞌj ke tnam binchal mya baꞌn, akeju cyvesin cyib cyucꞌil aj Israel, ex akeju ma che el kꞌinte cytxꞌotxꞌ aju tzaj tkꞌoꞌn Kman te cyetzbil: Akine chin elex kꞌinte cye tuj cytxꞌotxꞌ ex che eletz wiꞌne aj Judá cyxol. 15 Pero cyetzlenxi wiꞌne, tzul kꞌakꞌan ncꞌuꞌje cyiꞌj ex che ul wiꞌne juntl maj tujx cytxꞌotxꞌ ex tujx cytanmi. 16 Ax toc, ake jlu e jeꞌx xnakꞌtzante cye ke xjal etzan wuꞌne tuꞌn t-xi cymaꞌn jun yol axix toc twitz tilbilal Baal, pero ka ax toc ma txi cyocslan cyocslabl ke xjal etzan wuꞌne, ex ka ma tzꞌajben nbiye cyuꞌn oc t-xi cymaꞌn jun cyyol axix toc, ex ka ma cyma cyjaꞌ: Cxel ktziyane jun yol axix toc twitz Kman, entons baꞌn ax tuꞌn cyten cyxol ke xjal etzan wuꞌne. 17 Katzun at jun nasyon mintiꞌ ma chinx tniman, cjawitz nbakoꞌne ic tzaꞌn jun wiꞌ tzeꞌ, ex biꞌx cnajel wuꞌne. Akine Dios in chin kꞌmante jlu.