6 Tejtzun tel nim kꞌij tzaj tmaꞌn Kman weye: Txiꞌya ttzi nima Éufrates ex kꞌintza cꞌalbil cꞌuꞌjbaj, aju xi nmaꞌne teya tuꞌn t-xi tewacja ma chixin. 7 Inxtzune ttzi nima Éufrates ex jatz wiꞌne cꞌalbil cꞌuꞌjbaj jatum otok cuꞌx weꞌwane, pero otok kꞌay ex mintiꞌtok chꞌin tajben.

8 Tzajtzun yolin Kman juntl maj wucꞌile ex tma cyjaꞌ: 9 Cyjaꞌxtzun cnajel wuꞌne aju cynimbil cyib aj Judá tucꞌix nimxix cynimbil cyib aj Jerusalén. 10 Akeju tnam xjal lu binchal mya baꞌn ke, cycꞌiꞌ txi cyniman ke nleye, nok oꞌcx in cub cycyuwsaꞌn cyanmi ex ma cheꞌx lpeꞌ cyiꞌj ke tilbilal tuꞌn cyajben cye ex tuꞌn cycꞌulun cywitz, ic cyten ic tzaꞌn cꞌalbil cꞌuꞌjbaj lu, mintiꞌ chꞌin tajben. 11 Ic tzaꞌn jun xjal nnoꞌc tkitzꞌin jun cꞌalbil cꞌuꞌjbaj tmij, cyjaꞌtzun e tena cycyakil aj Israel wuꞌne cyucꞌix cycyakil aj Judá, e oc nchmoꞌne wiꞌje tuꞌntzun cyoc te jun tnam etzan wuꞌne, tuꞌn tel tkanil wiꞌje cyuꞌn, tuꞌn cyajben te nimal te nbiye ex tuꞌn njaw nimsaꞌne cyuꞌn. Pero mintiꞌ ma chinx cyniman. Akine Dios in chin kꞌmante jlu.

12 Icx kꞌmanxa cye: Ate Kman aju Cydios aj Israel in tmaꞌn cyjaꞌ: Ka ma cuꞌx kꞌot taꞌl twitz uva tuj jun ẍokꞌ, il tiꞌj tuꞌn tnoj wen. Atzun cye aj Israel ctzajel cytzakꞌweꞌn teya: ¿Myapetzun baꞌn kuꞌne cycyakil ẍokꞌ il tiꞌj tuꞌn cynoj tuꞌn taꞌl twitz uva? 13 Atzun teya cxel ttzakꞌweꞌna cye: Chi Kman cyjaꞌ: Cyjaꞌxtzun cchyoꞌl cywiꞌ cycyakil keju najlke tuj tnam lu wuꞌne; ke rey, akeju in che cub keꞌ tuj tkꞌukbil David, ke pal, keju nnoꞌc cykꞌon cyib te nsanjele ex cycyakil keju najlke tuj Jerusalén. 14 Ex che najel wuꞌne ic tzaꞌn in che pax ke ẍokꞌ jun tiꞌj juntl; tzaꞌnx ke mambaj ax icx ke cꞌwaꞌlbaj che najel. Mlayx tzaj kꞌakꞌan ncꞌuꞌje cyiꞌj; che najel wuꞌne ex mlayx tzaj tzꞌey ncꞌuꞌje cyiꞌj tuꞌn miꞌn cynaj. Akine Dios in chin kꞌmante jlu.

15 Akeye aj Israel, ma baj yolin Kman. Miꞌn jaw cyniman cyibe, che txulecuye bilte tyol. 16 Cynimsaꞌn jawe tbi Kman aju Cydiose naꞌnxcu ttzaj klolj tuꞌn, naꞌnxcu cyjaw tolje cywi witz tuj klolj ex naꞌnxcu toc te kloljxix aju spicꞌun in che ayone tiꞌj. 17 Katzun mintiꞌ ma txi cybiꞌne jlu, chin okꞌele cyiꞌje tuj ewaj, tuꞌn tlaj cynimbil cyibe chin okꞌele nimxix, porque ke xjal etzan tuꞌn Kman che xel kꞌiꞌn pres.

18 Kꞌmanxa te rey ex te ttxuꞌ: Cycuꞌtze tuj cykꞌukbile ex che kecuye twitz txꞌotxꞌ, porque aju cycoroniye tbanilxix tjax tuj cywiꞌye ma cuꞌtz tzꞌak. 19 Ke tnam ateꞌ tuj txꞌotxꞌ Néguev ma che lamet ex mi jun baꞌn tjakonte cye. Cycyakil aj Judá ma cheꞌx kꞌiꞌn tuj juntl tnam najchak. 20 Cyqueꞌyin jaw cywitze ex cyqueꞌyinxe ke aj kꞌoj cyjaꞌ cytzaj tuj txꞌotxꞌ tuj tbankꞌab kꞌij. ¿Jatum ateꞌ ke xjal otok cheꞌx nkꞌoꞌne tuj cycwente, akeju cyxjalile nim o che tzalaje cyiꞌj? Chicuya cye chi Kman.

21 ¿Ti cxel cymaꞌne akeye aj Jerusalén oc cyocxe tjakꞌ cycawbil ke xjal, akeju ax keye e xnakꞌtzante cye tuꞌn cyoc te cyamiwoye? Tzul taꞌw cyiꞌje ic tzaꞌn jun xuꞌj oc nnuꞌl itzꞌj tal. 22 Ex ka ma tzaj cykanine tikuꞌn in baj cyiꞌje icju, baꞌn tuꞌn tel cynicꞌe tiꞌj ka tuꞌn tlaj cyile nimxix. Cyjaꞌtzun ma che oque ic tzaꞌn jun xuꞌj ma tzꞌel kꞌiꞌn t-xbalun toc tiꞌj, icxtzun cyeye ma che cyaj skiteye cyuꞌn. 23 ¿Jacupe tzꞌoc ttzꞌumal jun xjal kꞌek te sak? ¿Jacupe chꞌexpet queꞌyin ttzmal jun tigre? Cyjaꞌxtzun cyeye mlay cybinchaye baꞌn porque ma che nakꞌete tuꞌn cybinchanteye mya baꞌn. 24 Cyjaꞌtzun che bajel nsputune ic tzaꞌn in jaw ikan muꞌp tuꞌn cykꞌikꞌ tuj tzkij txꞌotxꞌ. 25 Atzun cbajel cyiꞌje akeye aj Israel, atzun chojbil cyeye wuꞌne tiꞌj cybinchbene. Ma tzicꞌ nnaꞌnjtze cyuꞌne ex ma tzꞌoc keꞌ cycꞌuꞌje cyiꞌj ke tilbilal nokx gan ke. Akine Dios in chin kꞌmante jlu. 26 Ax icx weye cꞌelel wiꞌne tcyakil cyxbalune toc cyiꞌje, tuꞌntzun tcub cychꞌixwiye. 27 O che oque aj pajil, mintiꞌ ma che oc lpeꞌye wiꞌje. O wile in che cꞌulune cywitz ke tilbilal tuj cojbil ex cywi witz, a jlu icꞌunxix wuꞌne. Ay becꞌbil cywitze akeye aj Jerusalén. ¿Jtoj baꞌn t-xi cycoline tuꞌn cybinchanteye mya baꞌn? Chi Kman.