7 Aya Nman, masque ax kile in kꞌmante tuꞌn tcub ksentense, pero binchama kiꞌje tuꞌntzun tjaw nimsaꞌn tbiya. Nimcu maj mintiꞌ ma japun tyola kuꞌne ex ma ko binchane il twitza. 8 Aya oybil cye aj Israel, oꞌcx aya colol kiꞌje tuj tkꞌijlalil yajbil. ¿Tikuꞌn ic ttena ic tzaꞌn jun stranjer xjal tuj tnam, ex mer ic tzaꞌn jun betin xjal oꞌcx in ayon tiꞌj tuꞌn tcub kꞌij ex nnicꞌ naj? 9 ¿Tikuꞌn ic ma tzꞌoca ic tzaꞌn jun xjal najni tnabl ex ic tzaꞌn jun soldad mintiꞌ tipun tuꞌn tonin? Pero aya Kdiose ex aya at kxole, cycyakil xjal baꞌn cyuꞌn ka etzan koꞌye tuꞌna; miꞌn ko cyaj tcolina, chi Jeremías.

10 Atzun jlu in tmaꞌn Kman cyiꞌj aj Israel: Ke xjal lu nim cygan tuꞌn cybetjeꞌ; cyjaꞌtzun mintiꞌ in che tzaj nqueꞌyine tucꞌil tzalajbil. Jaꞌlo ctzajel nnaꞌne cyil ex cbel cycastiw wuꞌne tuꞌn tlaj cybinchben mya baꞌn.

11 Tzaj tmaꞌn Kman weye: Miꞌn cubsana nwitze tuꞌn cyxi wonine ke xjal lu. 12 Masque cub cyyoꞌn weꞌyaj, mlayx tzaj nkꞌoꞌn nwiꞌye tiꞌj cykanbetz; masque che cub cypatun ke alumaj ex masque tzaj cyiꞌn twitz awal te jun oyaj te weye, mlayx ncꞌame. Che najel wuꞌne tuꞌn kꞌoj, tuꞌn weꞌyaj ex tuꞌn txꞌuꞌj yabil, chi Kman weye.

13 Atzun weye xi ntzakꞌweꞌne: Aya Nman Dios, ke xjal nnoꞌc cykꞌon cyib te t-sanjela in xi cymaꞌn cye xjal ka mintiꞌ tuꞌn ttzaj kꞌoj mi weꞌyaj; nok oꞌcx tuꞌn cyten tuj txubtxaj tuj lugar lu.

14 Tzajtzun ttzakꞌweꞌn Kman weye cyjaꞌ: Ke xjal lu nok in che nicꞌan yol ex nokx gan in tzaj cynaꞌn nbiye. Mintiꞌwe ma che tzaj nsamaꞌn, mintiꞌwe ma tzaj nmaꞌn cye icju, ex mintiꞌ ma chin yoline cyucꞌil. Aju in cymaꞌn cyeye ka at ma cyil ic tzaꞌn tuj witzicꞌ, mya ax toc cyuꞌn, nok sbubl jlu, nok tten cyuꞌn ex nok tuj cyex cynabl ma jaw jlet jlu. 15 Cyjaꞌtzun chi Kman in tmaꞌn cyiꞌj ke xjal nnoꞌc cykꞌon cyib te t-sanjel: Mintiꞌ ma cheꞌx nsamaꞌne ke xjal lu, akeju in cymaꞌn ka wuꞌne in che tzaj nsamaꞌne, ex in cymaꞌn ka miꞌn tzaj kꞌoj mi weꞌyaj tuj tnam lu. Che cymel ke xjal lu tuj kꞌoj ex tuꞌn weꞌyaj. 16 Ax icx ke xjal in xi cybiꞌn cyyol ke sanjel lu, che cymel tuj kꞌoj ex tuꞌn weꞌyaj, cyucꞌix cyxuꞌjil, cycyꞌajal ex cymeꞌjel. Ke cyximlal cyimni cucx che cyjel paleꞌ cyuj ke cay te Jerusalén ex mi aꞌl jun cbelex makunte cye. Atzun cbantel wuꞌne cyiꞌj tuꞌntzun tchjet cybinchben mya baꞌn. 17 Kꞌmanxa jlu cye xjal: Nneꞌl taꞌl nwitze kꞌijtl ex konicꞌan ex mlayx kꞌajen tuꞌn tlaj yajbil xobajilxix ma tzaj cyiꞌj ke nxjalile, ex tuꞌnju puro cyuw cꞌixbisabl ma tzaj cyiꞌj. 18 Ka ma chin exe tuj cojbil, in wile cyximlal ke cyimni otok che cub byoꞌn tuꞌn spad; ka ma chin ocxe tuj tnam, in che wile ke xjal cyjaꞌ cycyim tuꞌn weꞌyaj. Tzaꞌnx keju oc cykꞌon cyib te t-sanjel Dios ax icx ke pal, nok e betjeꞌ ex mintiꞌ el cynicꞌ tiꞌj, chicuya, chi Dios te Jeremías.

19 Aya Nman, ¿maj te jumajx ma che el ticꞌuna aj Judá? ¿Mapetzun baj tganiya cyiꞌj aj Sión? ¿Tikuꞌn ma ko baj tcꞌixbisaꞌna ex mintiꞌx in ko banixe tuꞌna? In ko ayontoke tuꞌn ktene tuj txubtxaj, pero misicyer baꞌn ma kcꞌame. In ko ayontoke tuꞌn kbanixe, pero nok oꞌcx xobajil at. 20 Aya Nman, ma tzꞌel knicꞌe tiꞌj kbinchbene mya baꞌn ex aju mya baꞌn cybincha ktzan kxeꞌchele; ma ko binchane il twitza. 21 Pero nok tuꞌn tjaw nimset tbiya, miꞌn ko el ticꞌuna, miꞌn cub tkꞌoꞌna tchꞌixwi tkꞌukbila maꞌ t-xilen. Naꞌntza aju yol cyaj bant tiꞌj tuꞌna kucꞌile, ex japunx tuꞌna. 22 ¿Atpetzun jun tilbilal cydios xjal cyuj mastl nasyon jacu tzaj jbal tuꞌn? ¿Tuꞌnxpelo cyaꞌj in tzaj jbal? Miꞌn. Tuꞌna in tzaj t-samaꞌna, aya Kmane ex Kdiose, tuꞌna in bant tcyakil jlu; cyjaꞌtzun oꞌcx tiꞌja kꞌukl kcꞌuꞌje.