3 Akine Dios in chin kꞌmante jlu: Cxel nsamaꞌne cyaje txcaj castiw cyibaj: Che bel byoꞌn tuj kꞌoj, che xel jawoꞌn cyuꞌn txꞌyan, che xel chyoꞌn cyuꞌn cꞌutz ex che bajel tzakin cyuꞌn txcup. 4 Ctzajel t-xobil cyiꞌj cycyakil nasyon twitz txꞌotxꞌ tiꞌj ju cbantel wuꞌne cyiꞌj, tuꞌn tlaj mya baꞌn ma tbincha Manasés tuj Jerusalén, aju rey te Judá, aju tcyꞌajal Ezequías.

5 ¿Alcye ctzajel kꞌakꞌan tcꞌuꞌj cyiꞌje, akeye aj Jerusalén? ¿Alcye cbisal cyiꞌje? ¿Alcye jun ctzajel tkanin cyiꞌje ka baꞌn ateꞌye? 6 Ma tzꞌel cypaꞌn cyibe wiꞌje ex nok ttzal cyiꞌje ma tzꞌajtz cykꞌoꞌne nwitze; tuꞌntzun jlu ma chin oc tzokpaje cyiꞌje tuꞌn cynaje wuꞌne, porque ma baj npasense tuꞌn tkꞌakꞌan ncꞌuꞌje cyiꞌje. Akine Dios in chin kꞌmante jlu. 7 Ma che baj nsputune ke xjal najl tuj Jerusalén ic tzaꞌn ttxa triw, ex ma che ex wiꞌne cyuj ke tnam tuj txꞌotxꞌ lu; ma che cyaj nkꞌone ke xjal etzan wuꞌne mintiꞌ cycꞌwaꞌl, ex ma che naj wuꞌne porque mintiꞌ ma cyaj cycolin tuꞌn cybinchante mya baꞌn. 8 Mas nim meba xuꞌj ma che cyaj nkꞌoꞌne cyxol ic tzaꞌn ttxa tzꞌaꞌn at ttzi mar. Mer te chilcukꞌij tzaj camic wuꞌne cyibaj ke txuybaj ex ke cyal cuꞌxun; nok minaben tzaj bis cyibaj wuꞌne, tucꞌix xobajil. 9 Ma baj tipun txuybaj at wuk tal, ya mintiꞌtl in jatz t-xew; in chꞌixwi ex biꞌx ma naj tnabl; aju t-spicꞌumal kꞌij ma meltzꞌaj te klolj. Alcye keju ma che cyaj ankꞌin, cxel nmaꞌne tuꞌn cycub byoꞌn cyuꞌn aj kꞌoj cyiꞌj. Akine Dios in chin kꞌmante jlu.

10 Ay becꞌbil nwitze, aya ntxuꞌye in ul talina nok tuꞌn ntene tuj kꞌoj cyucꞌil cycyakil xjal. Mi jun ma tzꞌel nchꞌexoꞌne pwak te, ex mi jun ma tzaj tkanin tchꞌex weye, pero cycyakil in che kanin tuꞌn ttzaj mya baꞌn wibaje. 11 O tma Kman cyjaꞌ: Ax toc ccletela wuꞌne tuꞌn ttena baꞌn. Ax toc, wuꞌne che ul aj kꞌoj tiꞌja tuꞌn cycubsan twitza tuj tkꞌijlalil oc tul cꞌixbisabl ex bis.

12 ¿Alcye jun jacu tokj tbanil cꞌuxbil tuꞌn ex kꞌan cꞌuxbil in tzaj tuj txꞌotxꞌ tuj tbankꞌab kꞌij? 13 Akeye aj Israel, cxel nkꞌoꞌne cykꞌinumable ex cypwake cye aj kꞌoj cyiꞌje, tuꞌn t-xi cyiꞌn nok cucx tuꞌn tlaj tcyakil il ma cybinchaye tuj tcyakil cytxꞌotxꞌe. 14 Che oquel nkꞌoꞌne te cymajen ke aj kꞌoj cyiꞌje tuj jun txꞌotxꞌ mintiꞌ ojtzkiꞌn cyuꞌne, porque nimxix nkꞌoje ma tzaj cyiꞌje, mer ic tzaꞌn kꞌakꞌ biꞌx che bajel tzꞌeꞌye tuꞌn, chi Dios.

15 Nman Dios, tcyakil baꞌn tuꞌna, chin tnaꞌntza ex tzaja onil weye. Kꞌoꞌnca t-xel cyiꞌj keju in che jyon wiꞌje tuꞌn ncube cyuꞌn. Miꞌn ten tpasensa cyiꞌj ex miꞌn chinx ttzokpiꞌna tuꞌn ncyime cyuꞌn. Baꞌn tuꞌna ka tuꞌn tlaja in chin oc yasoꞌne cyuꞌn. 16 Tej ttzaj yolina weye, cyaj wawaꞌne tyola tuj wanmiye, nim o chin tzalaje cyiꞌj ex e oc te jun tzalajbil tuj wanmiye, porque etzan kine tuꞌna, aya Nman Dios Tajaw Tcyakil. 17 Mintiꞌ ma chin tene junx cyucꞌil keju in che achin, ex atxix tej woque tuj tcwenta njunalxe in chin bete, ex nim ma tzaj nkꞌoje tuꞌn tlaj cyil xjal. 18 ¿Tikuꞌn mintiꞌx in baj taꞌw cꞌixcꞌoj wiꞌje? ¿Tikuꞌn mintiꞌ kꞌanbil tiꞌj cꞌixbisabl weye ex mintiꞌx in kꞌanit tuꞌn kꞌanbil? ¿Maj ic cꞌoquela te weye ic tzaꞌn jun xoch nnaꞌj tzkij aꞌ tuj? Chi Jeremías.

19 In tzajtzun tzakꞌweꞌne tuꞌn Kman ex tma: Ka ma tzꞌajtz meltzꞌaja wucꞌile, jacutzun ncꞌama juntl maj ex jacu tzꞌajbentla te weye. Ka miꞌn ma yolina tiꞌj yol nokx gan ex ka oꞌcx ma yolina tiꞌj yol at tajben, entons atzuna c-yolil te nxele, porque akeju xjal lu il tiꞌj tuꞌn cyajtz meltzꞌaj tucꞌila, ex mya aya tuꞌn taj meltzꞌaj cyucꞌil. 20 Ic cꞌoquela wuꞌne cye xjal lu ic tzaꞌn jun muro kꞌan cꞌuxbil toc tiꞌj jun tnam ex cyuw tuꞌn tcub tiꞌj. Che kꞌojel tiꞌja, pero mlay cub tiꞌja cyuꞌn, porque akine chin tel tucꞌila te colol tiꞌja. 21 Cletela wuꞌne tuj cykꞌab ke xjal mya baꞌn, ex cletela wuꞌne tuj cykꞌab xjal txꞌuꞌj cywiꞌ. Akine Dios in chin kꞌmante jlu.