5 Ax icx tzaj tmaꞌn Kman weye: Miꞌn tzꞌocxa tuj jun ja jatum in che bisun xjal tiꞌj jun cyimni, miꞌn okꞌa cyucꞌil ex miꞌn txi tkꞌukbaꞌna cycꞌuꞌj, porque ma tzꞌel nlakꞌbaꞌne nxtalbile, ncꞌujlalile ex tkꞌakꞌbil ncꞌuꞌje cyiꞌj ke xjal lu. Akine Dios in chin kꞌmante jlu. 6 Che cymel ke tij xjal ex ke cꞌwaꞌl tuj txꞌotxꞌ lu, mi jun cbelex makunte cye, mi jun c-okꞌel cyiꞌj, mi jun cbajel tkesin t-ximlal ex mi jun cꞌelel tcꞌoꞌẍin tiꞌj twiꞌ tuꞌn tlaj tbis cyiꞌj. 7 Mi jun cxel kꞌinte wabj mi cꞌabj cye keju at cyxilen tucꞌil ktzan cyimni tuꞌn tkꞌukbanjtz cycꞌuꞌj, masque a ktzan cyman ex ka ktzan cytxuꞌ otok cyim.

8 Ax icx miꞌn tzꞌocxa tuj jun ja jatum nnoꞌc jun nintz waꞌn, miꞌn cub keꞌya waꞌl ex cꞌal cyucꞌil. 9 Porque akine Dios, aju Tajaw Tcyakil ex Cydios aj Israel, cxel nmaꞌne jlu: Che bel naj ke bitz te ninkꞌij wuꞌne tuj tnam lu, ex bitz te tzalajbil ex ke bitz te mejebleꞌn; a jlu cbantel wuꞌne itzꞌx keye, ex axkeye che queꞌyilte.

10 Oc t-xi tmaꞌna tkanil lu cye tnam xjal, tzul cykanin teya: ¿Tikuꞌn ma tzaj tmaꞌn Kman tuꞌn ttzaj mya baꞌn matijxix lu kibaje? ¿Alcyetzun mya baꞌn ma kbinchaye? ¿Alcye il o kbinchaye twitz Kman aju Kdios? Che chilo teya. 11 Atzun teya cxel ttzakꞌweꞌna: Chi Kman: Tuꞌnju in cyaj coline cyuꞌn ktzan cyxeꞌchele, e oc lpeꞌ cyiꞌj ke tilbilal, e cꞌulun cywitz ex e ajben cye, atzun weye in cyaj coline cyuꞌn ex mintiꞌ japun nleye cyuꞌn. 12 Atzun cyeye masxix ma tzicꞌ cybinchbene mya baꞌn cywitz ktzan cyxeꞌchele, porque teyle junjun cyeye ma tzꞌoc lpeꞌ tiꞌj ju mya baꞌn in tmaꞌn tanmi ex mintiꞌ in chinx cynimane. 13 Cyjaꞌtzun che elex nlajoꞌne tuj txꞌotxꞌ lu, ex che xel nlajoꞌne tuj jun tnam mintiꞌ ojtzkiꞌn cyuꞌne ex mi cyuꞌn ktzan cyxeꞌchele; atzun che ajbele kꞌijl ex konicꞌan cye txkantl dios ex mlayx tzaj kꞌakꞌan ncꞌuꞌje cyiꞌje.

14 Akine Dios in chin kꞌmante jlu: Tzul tkꞌijlalil tuꞌn miꞌn cymatl cyjaꞌ: Cxel ktziyan jun yol axix toc twitz Kman aju etz kꞌinte cye aj Israel tuj Ejipt, che chiwt, 15 nok oꞌcx cxel cymaꞌn cyjaꞌ: Cxel ktziyan jun yol axix toc twitz Kman aju etz kꞌinte cye aj Israel tuj txꞌotxꞌ tuj tbankꞌab kꞌij, ex cyuj cycyakil mastl tnam jatum otok che baj t-sputun, che chilo. Che ajetz meltzꞌaj wuꞌne tuꞌn cyul tuj cytxꞌotxꞌ aju xi nkꞌoꞌne cye ktzan cyxeꞌchel ojtxi.

16 Akine Dios in chin kꞌmante jlu: Che xel nsamaꞌne nim xjal tuꞌntzun cytzyet aj Israel cyuꞌn ic tzaꞌn in che tzyet cyiẍ. Ax icx che xel nsamaꞌne nim xjal tuꞌntzun cytzyet aj Israel cyuꞌn ic tzaꞌn in che tzyet jil cyuꞌn cambal, ex che tzyetel cyuꞌn cywiꞌ cycyakil nmak witz ex cywiꞌ cycyakil tal witz, ax icxpe tuj tpaxil pic jatum cyewan cyib. 17 Porque in wile tcyakil cybinchben; mintiꞌ jun in cyaj ten tuj ewaj nwitze, ax icx ju cyil mlayx bant txi cyewan nwitze. 18 Cbel nkꞌoꞌne cycastiw ic tzaꞌnx cybinchben mya baꞌn ex ic tzaꞌnx cyil, porque ma baj cytzꞌilsaꞌn twitz ntxꞌotxꞌe cyuꞌn ke tilbilal cydios cyimni ke, ex ma cybincha nimcu mya baꞌn icꞌun wuꞌne tuj tcyakil txꞌotxꞌ etzan wuꞌne.

19 Aya Nman, aya kꞌol wipune ex aya clol weye, tiꞌja nnoꞌc nclon wibe tuj tkꞌijlalil xobajil; max ttxaꞌnpun txꞌotxꞌ che tzajel ke nasyon tuꞌn cyul tucꞌila ex oc cyma teya cyjaꞌ: Mintiꞌ cyajben ke dios o che cꞌulun ktzan kxeꞌchele cywitz ex mintiꞌ cyipun, nok oꞌcx sbul ke. 20 ¿Jacupe bant cydios xjal cyuꞌnx? Jacu, pero mya ax toc Dios ke, chi Jeremías.

21 Cyjaꞌtzun, jaꞌlo cxel nyecꞌune wipumale cye ex cꞌeleltzun cynicꞌ tiꞌj ka akine Dios.