5 Chi Kman cyjaꞌ: Tzajxwit mya baꞌn tibaj ju xjal nnoꞌc keꞌ tcꞌuꞌj tiꞌj juntl xjal, ex nnoꞌc ten kanil onbil te, ex nneꞌl tpaꞌn tib wiꞌje. 6 Ic cꞌoquel ic tzaꞌn jun wiꞌ tal tzeꞌ tuj tzkij txꞌotxꞌ mintiꞌ in pon canun jbal tiꞌj, in chꞌiy tuj tzkij txꞌotxꞌ at atzꞌan tuj jatum mi aꞌl jun xjal najl. 7 Pero cyꞌiwlaꞌn te xjal kꞌukl tcꞌuꞌj wiꞌje ex oꞌcx kꞌukl tcꞌuꞌj wiꞌje. 8 Ic cꞌoquel ic tzaꞌn jun wiꞌ tzeꞌ awaꞌn ttzi nima, ponin tlocꞌ max ttzi aꞌ, mintiꞌ in tnaꞌn oc in tzaj taꞌw cyak ex puro chaꞌx ctel t-xak tcyakil maj. Ka mintiꞌ ma tzaj jbal, mintiꞌ in baj tcꞌuꞌj ex mintiꞌ in xi tcolin tuꞌn ttzaj tkꞌoꞌn twitz.

9 Puro sbul cyanmi xjal twitz tcyakil tiꞌxti ex jumajx mya baꞌn. ¿Alcye jun jacu tzꞌel tnicꞌ tiꞌj? 10 Akine Dios in baj nqueꞌyine tuj cyanmi xjal ex in baj nxpichꞌune tuj cyximbetz tuꞌn t-xi nkꞌoꞌne chojbil teyle junjun ic tzaꞌnx tbinchben ex ic tzaꞌnx takꞌunben, chi Kman. 11 Aju xjal in cnet tkꞌinumabl mya tuj tumel, ic tten ic tzaꞌn jun tzchin nnoꞌcx pakeꞌ cyibaj jos mya te; tuj tmij tabkꞌiyil cbel naj tkꞌinumabl ex te mancbil cꞌoquel te jun xjal mintiꞌ tnabl.

12 Aju tja Dios at kxol, atzun tkꞌukbil tbanilxix oc kꞌoꞌn te maꞌ toclen atxix t-xe tnejel. 13 Nman, aya oybil cye aj Israel, ctzajel nim cychꞌixwi cycyakil keju ma cyaj colina cyuꞌn. Cycyakil keju ma tzꞌel cypaꞌn cyib tiꞌja che bel naj ic tzaꞌn jun biybaj tzꞌiban tuj kuk, tuꞌnju tcyajlen colina cyuꞌn, aya twi aꞌ itzꞌ.

14 Chin tkꞌanin oca Nman ex chin bantele; chin tcloma Nman ex chin cletele, porque oꞌcx aya in jaw nnimsaꞌne tbiya. 15 In tzaj cymaꞌn xjal weye cyjaꞌ: ¿Ti ma baj tiꞌj tyol Kman? ¿Jat ma japun? E tjapun biꞌx jaꞌlo. 16 Masque ic cyyol, pero mintiꞌ ma txi nkanine teya tuꞌn ttzaj t-samaꞌna castiw cyibaj ex mintiꞌ in wajbeꞌne tuꞌn ttzaj cꞌixbisabl cyibaj. Baꞌn tuꞌna alcye o txi nmaꞌne cye. 17 Miꞌn tzꞌoca te xobtzal weye Nman, porque aya colol weye oc ttzaj mya baꞌn. 18 E tcub cychꞌixwi ke aj kꞌoj wiꞌje ex mya weye nchꞌixwi tuꞌn tcub. Ake e cyjaw secꞌpaj ex mya a kine; e ttzaj mya baꞌn cyibaj, ex kꞌontza yajbil cyuwxix cyiꞌj.

19 Tzaj tmaꞌn Kman weye cyjaꞌ: Txiꞌya ex weꞌcuya ttzi tpwertil tnam Jerusalén jatum in che ocx ex in che etz ke rey cye aj Judá; ax icx cbantel tuꞌna cytziꞌ mastl pwert te tnam. 20 Kꞌmanxa cye xjal cyjaꞌ: Akeye aj Judá, cyucꞌix ke cyreye ex cycyakile najl keye tuj Jerusalén, akeye in che ocxi ttzi pwert, cybintze tyol Kman: 21 Chi Kman cyjaꞌ: Ten cycwente tiꞌj tuꞌn tjapun kꞌij te ojlabl cyuꞌne, miꞌn tzaj cyiꞌne iktz ex miꞌn tzꞌoctz cykꞌoꞌne tuj tnam Jerusalén tuj kꞌij te ojlabl. 22 Ax icx miꞌn tzꞌetz cyiꞌne mi jun iktz tuj cyjaye tuj kꞌij te ojlabl ex mi tuꞌn toc cymacoꞌne jun akꞌuntl, cypaꞌmile kꞌij te ojlabl tuꞌn cyajbene weye, ic tzaꞌn xi nmaꞌne cye ktzan cyxeꞌchele ojtxi. 23 Atzun cye mintiꞌ inx cybiꞌn ex mintiꞌ inx cyniman, nok oꞌcx cub cycyuwsaꞌn cyanmi ex mintiꞌ xi cyniman ncawbile.

24 Pero ka axix toc ma chinx cynimane, ka miꞌn ma tzul cyiꞌne iktz ttzi tpwertil tnam tuj kꞌij te ojlabl, ka ma tzꞌel cypaꞌne kꞌij lu tuꞌn cyajbene oꞌcx weye, ex ka miꞌn tzꞌoc cymacoꞌne mi jun akꞌuntl tuj kꞌij lu, 25 entons cucx che oquetz ke rey cytzi tpwertil tnam lu. Akeju in che cub keꞌ tuj tkꞌukbil David che oquetz cyuj carwaj ex cyjax cyibaj chej, cyucꞌin cyib cyucꞌil ke nejenel, cyucꞌix ke xjal aj Judá ex ke xjal najl tuj Jerusalén ex cucx che tel xjal tuj tnam Jerusalén. 26 Che ul ke xjal najl cyuj ke tnam ateꞌ tuj Judá, cyucꞌix keju ateꞌ tiꞌjele tnam Jerusalén, keju najl tuj cytxꞌotxꞌ tiyjil Benjamín, keju najl tuj chkꞌajlaj t-xe witz, keju najl tuj tiwitz txꞌotxꞌ ex keju najl tuj txꞌotxꞌ Néguev. Ctzajel cyiꞌn cyoyaj tuꞌn tul tuj tja Dios, ex atzun ke jlu; ke alumaj patun in che cub ex ke mastl chojbil, ke oyaj tiꞌj twitz awal, storac ex ke oyaj te akꞌbil chjonte. 27 Katzun mintiꞌ ma txi cynimane nleye tuꞌn tel cypaꞌne ju kꞌij te ojlabl, tuꞌn cyajbene oꞌcx weye ex tuꞌn miꞌn tocx cykꞌoꞌne iktz tuj Jerusalén tuj kꞌij te ojlabl, entons cꞌoquel nkꞌoꞌne cykꞌakꞌal tpwertil tnam, che bajel tzꞌey ke tja rey tuꞌn, ex aju kꞌakꞌ lu mi aꞌl jun jacu yupj tuꞌn.