2 Tcuꞌxa ma tja ju binchal xar, ex atzun cxel nmaꞌne jun tkanil teya. 3 In cuꞌxtzune ex cnet ju binchal xar wuꞌne in akꞌnan tiꞌj xcab txꞌotxꞌ tibaj jun tal rwed in sutin, 4 ex aju xar in banttok tuꞌn mya baꞌn nneꞌla binchben te. Entons oc ten binchal juntl xar tiꞌjx xokꞌl lu, tejxi tbant ic tzaꞌnx tajbil.

5 Tzajtzun tmaꞌn Kman weye cyjaꞌ: 6 Akeye aj Israel, ¿baka mlay bant wuꞌne cyiꞌje ic tzaꞌn in bant tuꞌn binchal xar tiꞌj xcab txꞌotxꞌ? Akeye ic cytene tuj nkꞌabe ic tzaꞌn xcab txꞌotxꞌ tuj tkꞌab binchal xar. Akine Cymane in chin kꞌmante jlu. 7 Oc tcub nximane tuꞌn tcub nxitune jun nasyon ex ka jun cawbil tuꞌn tnaj wuꞌne, 8 katzun ma tzꞌel tpaꞌn tib nasyon lu tiꞌj mya baꞌn, mlaytzun tzaj nkꞌoꞌne castiw tibaj, aju banimaj tiꞌj wuꞌne tuꞌn ttzaj nkꞌoꞌne. 9 Ax icx ka ma cub nximane tuꞌn tjaw nbinchaꞌne jun nasyon ex ka jun cawbil tuꞌn tchꞌiy wuꞌne, 10 katzun aju nasyon lu ma tbincha mya baꞌn ex mintiꞌ ma txi tniman aju cxel nmaꞌne te, mlaytzun tzaj nkꞌoꞌne xtalbil banimaj tiꞌj wuꞌne.

11 Atzun jaꞌlo kꞌmanxa cye aj Judá ex cye ke xjal najl tuj Jerusalén ka akine Dios in chin kꞌmante jlu: Niban tbaj bant jun mya baꞌn wuꞌne tuꞌn ttzaj nsamaꞌne cyibaje; in chin ximane tiꞌj tuꞌn tcub cycastiwoye. Jaꞌlo cycolin cyaje aju be mya baꞌn kꞌiꞌn cyuꞌne, cychꞌexpume cymodiye ex cybinchbene. 12 Atzun cye xjal oc cymaꞌ teya: Miꞌn baj tnajsaꞌn tkꞌija kiꞌje, porque keye baꞌn tuꞌn ktene ic tzaꞌnx kajbile, ex cucx cbantel kuꞌne aju mya baꞌn in tmaꞌn kanmiye, che chilo.

13 Tuꞌntzun jlu in tmaꞌn Kman: Cykaninxe cye ke nasyon ka at jatum o baj jun tiꞌxti ic tzaꞌn jlu. Jumajx mya baꞌn ma cybincha aj Israel. 14 ¿Atpe maj in cub naj ttxa cheꞌw cywiꞌ ke nmak pic ateꞌ twi witz Líbano? ¿Tzinpe in che aj tzkij ke aꞌ in che tzaj tuj txꞌotxꞌ najchak? 15 Atzun ke xjal etzan wuꞌne ma tzicꞌ nnaꞌnjtze cyuꞌn ex in cub cypatun storac cywitz ke dios mintiꞌ cyajben. Ma che el tzpet tiꞌj be baꞌn aju in che bet tuj ojtxi, ex in che bet cyuj ke tkꞌab be mintiꞌ ojtzkiꞌn cyuꞌn. 16 Cyjaꞌtzun biꞌx ma cub xitj cytanmi ex te jumajx ma tzꞌoc te cyxmaybil xjal. Cycyakil keju che icꞌel tuj lugar lu che secꞌpajtel tiꞌj ex cxel cyyucun cywiꞌ tuꞌn tlaj. 17 Che bajel nsputune aj Israel ic tzaꞌn tuꞌn cykꞌikꞌ in tzaj tuj tjawitz kꞌij, ex wuꞌne che elel ok cywitz ke aj kꞌoj cyiꞌj. Oc tpon tkꞌijlalil tuꞌn tcub cycastiw, nok ttzal wiꞌje cꞌajel nkꞌoꞌne cywitz ex mya nwitze.

18 Che chi xjal: Ko ximan tiꞌj tuꞌn tbant jun mya baꞌn kuꞌn tiꞌj Jeremías porque ¿baka mintiꞌ pal tuꞌn ttzaj cykꞌoꞌn xnakꞌtzbil ke, baka mintiꞌ xjal at cynabl tuꞌn ttzaj cykꞌoꞌn kconsej, ex baka mintiꞌ t-sanjel Dios ateꞌ tuꞌn ttzaj cymaꞌn tyol Dios ke? E tjaw knicꞌan yol tiꞌj ex miꞌn txi kniman aju in tmaꞌn ke, che chi xjal.

19 Aya Nman, kꞌontz twiꞌya wiꞌje. Bintza aju in cymaꞌn ke aj kꞌoj wiꞌje. 20 ¿Baꞌnpe tuꞌn tajtz cykꞌoꞌn mya baꞌn te t-xel xtalbil? Porque lu ke xjal ma baj cybinchaꞌn jun jul tuꞌn ncuꞌx tzꞌake tuj. Naꞌntza tej ncubsane twitza cyiꞌj ex tej t-xi nmaꞌne teya tuꞌn tweꞌ ttxꞌuꞌjila cyiꞌj. 21 Atzun jaꞌlo, e cybaj cyim ke cycꞌwaꞌl tuꞌn weꞌyaj ex e cycub byoꞌn ke xinak tuꞌn spad; e cycyaj ten xuꞌj mintiꞌ cychmil ex mintiꞌ cyal, e cybaj cyim ke xinak tuꞌn txꞌuꞌj yabil, atzun ke cuꞌxun e cycyim tuj kꞌoj, 22 ex e cyjaw schꞌin tuj cyja tuꞌn cyxobil oc cypon t-samana aj kꞌoj cyiꞌj nok minaben, porque ma baj cylacuꞌn jun jul tuꞌn ncuꞌx tzꞌake tuj ex ma cub cykꞌoꞌn cꞌobil tuj nbeye. 23 Pero baꞌn tuꞌna, Nman, tcyakil mya baꞌn ma baj cybinchaꞌn wiꞌje tuꞌn ncyime. Miꞌn cub tnajsaꞌna cybinchben mya baꞌn, ex miꞌn cub tnajsaꞌna cyil. E tcub cyiꞌj tuꞌna ex kꞌoncuya cycastiw tucꞌil ttxꞌuꞌjila.