Chi Kman weye: Txiꞌya lakꞌol jun ẍokꞌ xcab txꞌotxꞌ ttxꞌotxꞌil, ex che tucꞌinxa tucꞌila junjun cytijil xjal te tnam ex junjun cytijil pal, 2 texa tuj tnam tuꞌn tpona tuj chkꞌajlaj Ben-hinom tbi, tcub tena twitz tpwertil tnam jatum in che ex xoꞌn ttxꞌakan cꞌil, ex atzun kꞌmanxa ke yol cxel nmaꞌne teya. 3 Kꞌmanxa cyjaꞌ: Akeye rey cye aj Judá ex akeye aj Jerusalén, cybintze tyol Kman aju Tajaw Tcyakil ex Cydios aj Israel: Ctzajel nsamaꞌne jun nintz yajbil tibaj lugar lu ex cycyakil keju che bil tiꞌj tkanil lu, biꞌx cꞌelel twinkil cyẍcyin tuꞌn. 4 Porque ma tzꞌel cypaꞌn cyib aj Israel wiꞌje, ma tzꞌajben lugar lu cyuꞌn tuꞌn cycꞌulun cywitz tilbilal nnoꞌc cydiosin mastl nasyon, ex ma cub cypatun storac cywitz junxitl dios mintiꞌ ojtzkiꞌn cyuꞌn, mi cyuꞌn ke cyxeꞌchel ex mi cyuꞌn ke rey cye aj Judá. Ax icx ma che cub cybyoꞌn nim xjal mintiꞌ cyil tuj lugar lu. 5 Ax icx ma jaw cybinchaꞌn ke altar tuꞌn tcub cypatun ke cycꞌwaꞌl tibaj te jun chojbil te Baal, ex baka o txi nmaꞌne tuꞌn tbant jlu cyuꞌn. Misicyer ma cub nximane tuꞌn tbant icju. 6 Cyjaꞌtzun tzul tkꞌijlalil mya ax Tofet tbi lugar lu cꞌoquel ex mya ax Ben-hinom, nok oꞌcx Chkꞌajlaj te Biybil cꞌoquel tbi. Akine Dios in chin kꞌmante jlu. 7 Tuj lugar lu cbajel ntzpet-saꞌne cyximbetz aj Judá ex aj Jerusalén. Oc nbinchaꞌye tuꞌn cycub tzꞌak tuj cykꞌab keju in che jyon tumel tuꞌn cynaj, ex tuꞌn cycub byoꞌn tuꞌn spad cyuꞌn aj kꞌoj cyiꞌj, tuꞌntzun tajben ju cyximlal te cychiꞌ cꞌutz ex te cychiꞌ txcup. 8 Cꞌoquel nkꞌoꞌne tnam lu te jun xobajil ex che xmayil xjal tiꞌj; cycyakil keju che icꞌel bet tuj che jawil labin tiꞌj ex che oquel ten xmayil tiꞌj porque otok cub xitj. 9 Oc nbinchaꞌye tuꞌn t-xi cychyoꞌn xjal ke tal cycꞌwaꞌl, ex cxel cychyoꞌn ke cyucꞌil tuꞌn tlaj mintiꞌ cywa, tuꞌnju cytxolban cyib aj kꞌoj tiꞌjele tnam, akeju in che jyon tumel cyiꞌj tuꞌn cynaj cyuꞌn, chicuya cye, chi Kman.