Tkanil tuꞌn ttzaj mya baꞌn tiꞌj Pasur, aju aj kꞌoj tiꞌj Jeremías
20
Tej tbinte Pasur aju tcyꞌajal Imer, ex aju pal ex nejenel maꞌ toclen tuj tja Dios, ka in yolintok Jeremías tiꞌj yol in tzaj kꞌmaꞌn te tuꞌn Dios, 2 xi tmaꞌn tuꞌn tbaj asyalin Jeremías ex tuꞌn cyocx kꞌoꞌn tkan tuj toyꞌ tzeꞌ tcubsaꞌn ttziꞌ nintz pwert Benjamín tbi, tcub twitz tja Dios. 3 Te juntl kꞌij tej t-xi tmaꞌn Pasur tuꞌn cyetz kꞌiꞌn tkan Jeremías tuj toyꞌ tzeꞌ, xi tmaꞌn Jeremías te: Aju tbiya Pasur ma chꞌexpet tuꞌn Kman, ex atzun tbiya ma tzꞌoc, Magor-misabib, (atzun in tmaꞌn: At xobajil tuj tcyakil part). 4 Porque chi Kman: Ctzajel nim xobajil tiꞌja wuꞌne, ax icx cyiꞌj cycyakil tamiwoya nok tuꞌn tlaja; ex twitzxa che bel byoꞌn tuꞌn spad cyuꞌn aj kꞌoj cyiꞌj. Che xel nkꞌoꞌne cycyakil aj Judá tuj tkꞌab rey te Babilonia tuꞌn cyxi kꞌiꞌn pres tuj Babilonia ex ka tuꞌn cycub byoꞌn tuꞌn spad. 5 Ax icx cxel nkꞌoꞌne tcyakil kꞌinumabl at tuj tnam lu cye aj kꞌoj, tucꞌix tcyakilju at cye xjal ex ke tiꞌxti wiꞌyilxix, ex tcyakil cykꞌinumabl ke rey cye aj Judá cꞌelex cyiꞌn tuꞌn t-xi cyiꞌn tuj Babilonia. 6 Atzun teya Pasur, cxel kꞌiꞌna pres tuj Babilonia junx cyucꞌil cycyakil keju ateꞌ tuj tjaya. Atzun cymela ex atzun cbelex makuꞌna cyucꞌix cycyakil ke tamiwoya, akeju xi tpacbaꞌna ju yol te sbubl cye, chi Jeremías.Cyuw o yolin Jeremías tucꞌil Kman
7 Aya Nman, ma chin cub t-sbuꞌna ex ma wakꞌe ambil tuꞌn nsbunjtze; tuꞌnju aya mas cyuw, ma cub wiꞌje tuꞌna. Nok te tzebl in chin oque cyuꞌn xjal tcyakil kꞌij; cycyakil in che xmayin wiꞌje. 8 Tcyakil maj oc in chin yoline, in xi nmaꞌne tkanil tuꞌn ttzaj yajbil cyuw ex xitbil; cocꞌx in chin oc icꞌleꞌne cyuꞌn xjal ex in chin xmayinjtze cyuꞌn tuꞌnju in xi nmaꞌne tyola cye. 9 Ka ma nmaye: Ya miꞌn chin ximantle tiꞌj Kman ex miꞌn chin yolintle tiꞌj ju in tmaꞌn, entons nnoꞌc tyola tuj wanmiye ic tzaꞌn jun kꞌakꞌ in naj nim tuꞌn ex in julin max tuj nbakile. Masque ma tzꞌoc tilil wuꞌne tuꞌn tweꞌ nyoline, pero mintiꞌx in weꞌ nyoline. 10 O nbiye ke xjal in che jasin ex in cymaꞌn wiꞌje: At xobajil tuj tcyakil part. Ex che chitl in cymaꞌn: E kxiꞌ kꞌol part tiꞌj. Cycyakil wamiwoye in che ayon tiꞌj tuꞌn njaw tolje ex in cymaꞌn: Mya yaj cub tzꞌak tuj sbubl kuꞌn, entons cbel tiꞌj kuꞌn ex atzun cꞌoquel kkꞌoꞌn t-xel tiꞌj, che chi.
11 Pero aya Nman Dios ata wucꞌile ic tzaꞌn jun soldad mi aꞌl jun jacu xcyeꞌ tiꞌj; keju in che jyon wiꞌje tuꞌn ncube cyuꞌn, che bel tzꞌak ex mlay che xcyeꞌ wiꞌje; cbajel cyipun, cbel cychꞌixwi te jumajx ex mlay tzicꞌ tnaꞌnjtz. 12 Aya Nman Dios aju Tajaw Tcyakil, ke xjal tzꞌaklxix in che oc tuj malbil tuꞌna, ojtzkiꞌn cyximbetz xjal tuꞌna ex aju at tuj cyanmi; waje tuꞌn ticꞌ nwitze tiꞌj castiw cbel tkꞌoꞌna cyibaj ke xjal lu, porque tuj tcwenta ma cyaj nkꞌoꞌne tuꞌn t-xi tbinchaꞌna wiꞌje.
13 Che bitzane te Kman ex cynimsaꞌn jawe tbi, porque a in clonte ju xjal at tbis tuj cykꞌab ke xjal mya baꞌn.
14 Nokwit baꞌn toc te mintiꞌ tajben aju kꞌij tej wul itzꞌje. Cuchiwt mya cyꞌiwlaꞌn aju kꞌij tej wul pokꞌsaꞌne tuꞌn ntxuꞌye. 15 Cuchiwt cub tcastiw ju xjal o jaw tzalaj nmane tuꞌn, tej tmante tkanil ka kꞌa jun tcꞌwaꞌl otok tzul itzꞌj. 16 Cuchiwt ic tzꞌoc xjal lu ic tzaꞌn ke tnam o che baj t-xitun Dios te jumajx. Cuchiwt tbi tkꞌajkꞌajel cywi xjal in che okꞌ te prim ex tkꞌajkꞌajel cywi xjal tuj kꞌoj te chilcukꞌij. 17 Nokwit in cub byoꞌne tuj talbil ntxuꞌye; awtlo ntxuꞌye oc te mukbil weye ex awtlo in cyaj tene tuj talbil ntxuꞌye te jumajx. 18 ¿Tikuꞌn in etze tuj talbil ntxuꞌye nok tuꞌn ticꞌ nwitze tiꞌj taꞌw yajbil ex taꞌw bis ex tuꞌn tjapun baj ju wankꞌible tuj chꞌixbajil?