Yolintzun Kman tucꞌil Jeremías. 3 Atzunte Jeremías xi ttzakꞌweꞌn cye xjal otok cheꞌx samaꞌn tuꞌn Sedequías: Cykꞌmanxe te Sedequías cyjaꞌ: 4 Ate Kman aju Cydios aj Israel ma tma cyjaꞌ: Akine chin binchalte tuꞌn cyajtz meltzꞌaje ex tuꞌn cyul nchmoꞌne tuj tmijil tnam tucꞌil cymacbile tocx tuj cykꞌabe, akeju in che ajben cyuꞌne te cykꞌojbile, tiꞌj rey te Babilonia ex cyiꞌj aj Caldey, akeju aj kꞌoj cyiꞌje ateꞌ tiꞌjxi tnam. 5 Ax kine chin oquel tzokpaje kꞌojlel cyiꞌje tucꞌil wipumale, tucꞌil nkꞌoje ex ntxꞌuꞌjile nimxix. 6 Che bel nbyoꞌne cycyakil xjal najlke tuj tnam lu tuꞌn txꞌuꞌj yabil plojxix, ex cyucꞌix ke alumaj che cymel. 7 Ex te tibajxi cxel nkꞌone Sedequías aju rey cye aj Judá tuj tkꞌab Nabucodonosor, junx cyucꞌil ke xjal at cyoclen ttxlaj, ex cyucꞌix ke t-soldad ex ke xjal otok che cyaj ankꞌin tuj tnam ticꞌlenxi txꞌuꞌj yabil, kꞌoj ex weꞌyaj, ex che xel nkꞌoꞌne tuj cykꞌab aj kꞌoj cyiꞌj, akeju cyaj che cub byonte cye. Che bel byoꞌn tuꞌn spad tuꞌn Nabucodonosor, ex mlay tzicꞌx cyiꞌj tuꞌn miꞌn cycub byoꞌn, ex mlay tzaj kꞌakꞌan tcꞌuꞌj cyiꞌj. Akine Dios in chin kꞌmante jlu.

8 Ax icx kꞌmanxa cye tnam xjal, chi Dios in tmaꞌn cyjaꞌ: Cxel nkꞌoꞌne ambil cye tuꞌn tjaw cyscꞌoꞌn jun cybe: Ka aju be te chwinklal, ex ka aju be te camic. 9 Alcye ma cyaj ten tuj tnam lu, cymel tuj kꞌoj, tuꞌn weꞌyaj ex ka tuꞌn txꞌuꞌj yabil, atzunju ma tzꞌex ex ma txi tkꞌon tib cyucꞌil aj Caldey, akeju cytxolban cyib tiꞌj tnam, mlay cyim, oc cletel. 10 Porque ma cub nximane tuꞌn ttzaj wiꞌne jun mya baꞌn tibaj tnam lu te t-xel ju baꞌn. Cxel nkꞌoꞌne tnam tuj tkꞌab rey te Babilonia ex cꞌoquel tkꞌoꞌn tkꞌakꞌal. Akine Dios in chin kꞌmante jlu.

11 Ax icx tzaj tmaꞌn Kman weye: Txiꞌya yolil tucꞌil rey te Judá ex cyucꞌil keju ateꞌ tuj tja, ex kꞌmanxa cye: Cybintze aju tkanil tuꞌn Kman: 12 Akeye tiyjil David, cybintze tyol Kman: Cybinchanxe cyiꞌj xjal tuj tumelxix tcyakil kꞌij; cyclome ke xjal in che baj yajlaꞌn cyuꞌn keju yajlal cye, tuꞌntzun miꞌn ttzaj ntxꞌuꞌjile cyiꞌje tuꞌn tlaj cybinchbene mya baꞌn, porque ka miꞌn, jacu tzaj ntxꞌuꞌjile cyiꞌje, ic tzaꞌn jun kꞌakꞌ, ex oc tcꞌant mi aꞌl jun jacu yupj tuꞌn.

13 Akeye xjal aj Jerusalén najlkeye twiꞌ jun tal witz puro pcꞌat ex txolin cyiꞌje cyuꞌn tkꞌab xak, ma tzaj nkꞌoje cyiꞌje akeye in cymaꞌne cyjaꞌ: ¿Alcye baꞌn toc tzokpaj kiꞌj? ¿Alcye jacu pon max jatum taꞌ kcolbil kib? 14 Cbel cycastiwoye wuꞌne ic tzaꞌnx cybinchbene; cꞌoquel nkꞌoꞌne tkꞌakꞌal chcꞌul at tuj cytxꞌotxꞌe, ex tuꞌn kꞌakꞌ lu cbajel tzꞌeꞌy tcyakil ttxaꞌnile tnam. Akine Dios in chin kꞌmante jlu.