Aju tkanil pon tuj tja rey te Judá
22
Tzaj tmaꞌn Kman weye cyjaꞌ: Txiꞌya tuj tja rey ex kꞌmanxa tkanil lu: 2 Aya rey te Judá, aya kꞌukl tocx tuj tkꞌukbil David, cyucꞌix ke xjal at cyoclen ttxlaja ex cycyakil xjal najl tuj tnam lu, cybintze tyol Kman cyjaꞌ: 3 Cybinchame aju tzꞌaklxix ex aju baꞌn, cyclome ke xjal tuj cykꞌab keju in che baj yajlan cye, miꞌn cybinchaye mya baꞌn ex miꞌn che elkꞌane cyiꞌj stranjer xjal, mi cyiꞌj ke cꞌwaꞌl mintiꞌ cyman, mi cyiꞌj ke meba xuꞌj ex miꞌn cub cybyoꞌne ke xjal mintiꞌ cyil. 4 Ka axix toc ma cybinchaye aju ma txi nmaꞌne cyeye, entons ke rey in che ocx keꞌ tuj tkꞌukbil David, cucx che oquetz ttzi tpwertil tja rey cyjax ke cyuj carwaj ex cyibaj chej, cyucꞌin cyib cyucꞌil ke xjal at cyoclen cytxlaj ex cyucꞌix ke tnam xjal. 5 Katzun mintiꞌ ma txi cynimane yol lu, cxel nmaꞌne jun yol axix toc wuꞌnx wibe, aju tja rey nok ttxꞌakan cyjel ten. Akine Dios in chin kꞌmante jlu.6 Porque chi Kman tiꞌj tja rey te Judá: Ic ttena te weye ic tzaꞌn txꞌotxꞌ Galaad, ex ic tzaꞌn twi witz Líbano, pero cxel nmaꞌne jun yol axix toc tiꞌja: Cꞌoquela wuꞌne te jun tzkij txꞌotxꞌ ex te jun lugar mintiꞌ cynajbil xjal tuj. 7 Che xel nsamaꞌne ke xjal banin cyten cyucꞌil cymacbil in che ajben tuj kꞌoj te xitul teya, cbajel cytxꞌemin ke tkan ja wiꞌten tbanilxix che queꞌyin ex cꞌoquex cykꞌoꞌn tuj kꞌakꞌ.
8 Tbajlenxitzun jlu, oc cyicꞌ bet xjal te nimcu nasyon ttxlaj tnam lu cxel cykanin cye cyucꞌil: ¿Tikuꞌn ma tbincha Kman icju tiꞌj nintz tnam lu? 9 Ex ctzajel tzakꞌweꞌn cye: Tuꞌnju mintiꞌ ma japun cyuꞌn aju yol cyaj bant tiꞌj tuꞌn Cydios cyucꞌil, ma che oc ten cꞌulul cywitz ke tilbilal ex ma che ajben cye.
Aju tkanil tuꞌn Jeremías tiꞌj Salum
10 Miꞌn che okꞌe tiꞌj ktzan rey Josías, miꞌn che okꞌe tiꞌj tcyimlen; masxix che okꞌe tiꞌj Salum aju tcyꞌajal; ma txi kꞌiꞌn najchak ex mlay tzꞌajtz meltzꞌaj juntl maj, mlayx tzul meltzꞌaj tuj txꞌotxꞌ jatum ul itzꞌj. 11 Porque chi Kman tiꞌj Salum aju tcyꞌajal Josías aju ktzan rey te Judá, aju cyaj ten te cawil tcyimlenxi ktzan tman ex aju ma tzꞌex kꞌiꞌn tuj lugar lu: Mlayx tzul meltzꞌaj, 12 nok oꞌcx max cymel tuj tnam jatum ma pon kꞌiꞌn, ex mlayx tzꞌajtz meltzꞌaj juntl maj queꞌyilte tnam lu.
Tkanil tiꞌj Joacim
13 Ay becꞌbil twitza, aya in jaw tbinchaꞌna tjaya maꞌ twaꞌl tuꞌn sbubl ex mya tuj tumel; in che oc tkꞌoꞌna ke xjal akꞌnal tiꞌj ex mintiꞌ in xi tchjoꞌna twi cycꞌuꞌj. 14 In tmaꞌna cyjaꞌ: Cjawil nbinchaꞌne jun njaye matijxix wen, elaꞌ colin tten ex maꞌ tuj, cyjel nkꞌoꞌne ventan tiꞌj, cꞌoquel nkꞌoꞌne tzꞌlom tzeꞌ wiꞌten tujile ex cꞌoquel nkꞌoꞌne tcꞌaꞌ cyak queꞌyin, chiya. 15 ¿Tuꞌnpetzunju in baj tbinchaꞌna tjaya tiꞌj tbanil tzeꞌ wiꞌten cꞌoquela te jun nintz rey tuj twitza? Aju ktzan tmana o tzꞌankꞌin tuj txubtxaj, o tbincha aju tzꞌaklxix ex o bet tuj tumel, cyjaꞌtzun puro baꞌn ela te te. 16 Tuj tumel xi tbinchaꞌn cyiꞌj meba ex cyiꞌj keju in che baj yajlaꞌn, ex cyjaꞌtzun baꞌn ela te te. O bant tuꞌn icju, tuꞌnju el tnicꞌ wiꞌje. Akine Dios in chin kꞌmante jlu. 17 Atzun teya, oꞌcx nnoꞌc tilil tuꞌna tuꞌn tcambanteya cambabl mya tuj tumel, in che cub tbyoꞌna ke xjal mintiꞌ cyil, in che baj tyajlaꞌna ke t-xjalila ex nneꞌl tiꞌna aju at cye, chi Kman te Joacim. 18 Cyjaꞌtzun chi Kman tiꞌj Joacim aju tcyꞌajal Josías, aju rey te Judá: Mi aꞌl jun cjawil okꞌ tiꞌj oc tcyim, mi aꞌl jun cxel tmaꞌn tuj okꞌel cyjaꞌ: Ay Wermaniye, ay Wanbe, ay Nman, ay Tat Rey, che chiwt. 19 Cbelex makuꞌn ic tzaꞌn jun bur, cxel jawoꞌn ex cꞌelex xoꞌn tiꞌjxi tnam Jerusalén.
Tkanil tiꞌj tnam Jerusalén
20 Akeye aj Jerusalén, cyjaxe twi witz Líbano ex cyjaw schꞌine, tjaw tkꞌajkꞌajel cywiꞌye tuj txꞌotxꞌ Basán, cyxi schꞌine max cywiꞌ ke tal witz Abarim, porque cycyakil ke tnam mojl cyyole cyucꞌil ma che naj. 21 In yoline cyucꞌile tuj tkꞌijlalil tej txubtxaj ateꞌye, pero mintiꞌ inx cybine. Ex cyjaꞌx cybinchaye t-xe tnejel, mintiꞌ o cyajbeye tuꞌn t-xi cybine nyole. 22 Tuꞌn cykꞌikꞌ che xel jawoꞌn cycyakil ke nejenel cyeye ex akeju tnam mojl cyyole cyucꞌil che xel kꞌiꞌn pres tuj juntl tnam najchak. Entons cbel cychꞌixwiye ex cnajel cynable tuꞌn tlaj tcyakil cybinchbene mya baꞌn. 23 Akeye txubtxaj ateꞌye tuj cyjaye binchamaj tiꞌj tzeꞌ wiꞌten tzajni kꞌiꞌn twi witz Líbano, che jawil ayayane oc ttzaj cꞌixcꞌoj cyiꞌje, ic tzaꞌn cꞌixcꞌoj in tzaj tiꞌj jun xuꞌj oc nnuꞌl itzꞌj tal.
Tkanil tuꞌn Dios te rey Jeconías
24 Chi Kman o tma te Jeconías aju tcyꞌajal Joacim aju rey te Judá: Cxel nmaꞌne jun yol axix toc wuꞌnx wibe: Masque icwit ttena ic tzaꞌn jun xmulkꞌabaj in ajben te seyarbil toc tiꞌj tal nbankꞌabe, pero cꞌelel wiꞌne, 25 ex cxel nkꞌoꞌne tuj cykꞌab aj kꞌoj tiꞌja, akeju in che ximan tiꞌj tuꞌn tcub byoꞌna cyuꞌn, akeju nimxix in xoba cywitz. Cxel nkꞌoꞌne tuj tkꞌab Nabucodonosor aju rey te Babilonia, ex tuj cykꞌab aj Caldey. 26 Cꞌelex nlajoꞌna tucꞌix ttxuꞌya ex che xel kꞌiꞌne tuj jun txꞌotxꞌ jatum mya a e ul itzꞌje, ex maxtzun che cymele cycabile. 27 Cyjaꞌtzun mlayx che ul meltzꞌaje tuj txꞌotxꞌ nimxix cyganiye tuꞌn cyul meltzꞌaje tuj, chi Kman te Jeremías.
Tkanil tiꞌj Jeconías tuꞌn Jeremías
28 ¿Icpe tten Jeconías ic tzaꞌn jun tal xar paꞌx mi jun in tzalaj tiꞌj? ¿Tikuꞌn ma tzꞌex lajoꞌn cyucꞌix ke tcꞌwaꞌl tuꞌn cyxi kꞌiꞌn tuj txꞌotxꞌ mintiꞌ ojtzkiꞌn cyuꞌn? 29 Aya txꞌotxꞌ, aya txꞌotxꞌ, aya txꞌotxꞌ, bintza tyol Kman: 30 Chi Kman cyjaꞌ: Cytzꞌiban cuꞌxe tbi xinak lu cyuj ke libro, mer ic tzaꞌn mintiꞌ tcꞌwaꞌl, ex tcyakil mya baꞌn ma tzꞌel te te. Porque mintiꞌ jun tiyjil cꞌoquex keꞌ tuj tkꞌukbil David tuꞌn tcawin juntl maj tuj Judá.