2 Chi Kman aju Cydios aj Israel cye ke pastor in che cawin cyibaj ke xjal etzan tuꞌn: Cyuꞌne ma che baj sputj ke nẍneꞌle ex cyuꞌne ma che bjeꞌl ok, porque mintiꞌ ma tzꞌoc cycwentine. Tuꞌntzun jlu, icx weye ctel ncwent tiꞌj tuꞌn tcub cycastiwoye wuꞌne tuꞌn tlaj cybinchbene mya baꞌn. Akine Dios in chin kꞌmante jlu. 3 Ex ax kine chin ajetz kꞌinte chꞌintl cytxꞌakan nẍneꞌle ateꞌx cyuj ke nasyon jatum e pon nlajoꞌne; che ajetz wiꞌne tuꞌn cyul juntl maj tuj cywabl, ex cchꞌiyil cybaj ex cchmetel cybet. 4 Che oquel nkꞌoꞌne pastor te cwentil cye, tuꞌntzun miꞌn cyxob ex tuꞌn miꞌn cyjaw secꞌpaj, ex tuꞌn mi jun t-xi tzpet. Akine Dios in chin kꞌmante jlu.

5 Chi Kman cyjaꞌ: Tzul tkꞌijlalil tuꞌn tjaw nscꞌoꞌne jun tiyjil David tzꞌaklxix tuꞌn toc te rey. Atzunte ccawil tucꞌil nabl, ex cxel tbinchaꞌn cyiꞌj xjal tuj tumelxix tuj tnam lu. 6 Tuj tkꞌijlalil tcawbil che cletel ke aj Judá, ex ke aj Israel che ankꞌil tuj txubtxaj. Aju tbi cꞌoquel atzun jlu: Ate Kman Colol ex binchal kiꞌj tuj tumelxix.

7 Chi Kman cyjaꞌ: Tzul tkꞌijlalil tuꞌn miꞌn cymante xjal: Cxel kmaꞌn jun yol axix toc twitz Kman aju etz kꞌinte cye aj Israel tuj Ejipt, 8 nok oꞌcx oc cymaꞌ: Cxel kmaꞌn jun yol axix toc twitz Kman aju etz kꞌinte cye cyiyjil aj Israel tuj txꞌotxꞌ tuj tbankꞌab kꞌij, ex cyuj cycyakil mastl txꞌotxꞌ jatum otok che pon sputun tuꞌn. Ex che najal tuj cyex cytxꞌotxꞌ.

9 Ma tzaj taꞌw tuj wanmiye tuꞌn cylaj keju nnoꞌc cykꞌon cyib te t-sanjel Dios, ex tcyakil nximlale ma tzaj luꞌlun; mer ic tzaꞌn cꞌal kꞌeꞌn ma chin oque ex ic tzaꞌn jun xjal in chyoꞌn twiꞌ tuꞌn vin, nok tuꞌn tlaj Kman ex tuꞌn tlaj tyol xjan. 10 Ke xjal tuj txꞌotxꞌ lu, cycyakil ma che oc te aj pajil ex ma tzꞌel cypaꞌn cyib tiꞌj Dios. Oꞌcx in cybinchaꞌn mya baꞌn, ex akeju at cyoclen mintiꞌ in xi cybinchaꞌn cyiꞌj xjal tuj tumelxix, ex tuꞌntzun jlu aju txꞌotxꞌ ma tzkij, ex biꞌx ma tzkij cywabl alumaj tuj cojbil, chi Jeremías.

11 Chi Kman cyjaꞌ: Keju nnoꞌc cykꞌon cyib te nsanjele ex ke pal, mintiꞌ in che niman weye, ex tujxpe njaye o che cnet wuꞌne in che binchan mya baꞌn. 12 Cyjaꞌtzun, aju cybe cꞌoquel te klolj ex jilin tuj, ex che xel lamoꞌn tuꞌn cycub tzꞌak tuj. Oc tjapun tkꞌijlalil tuꞌn tcub cycastiw, ctzajel nsamaꞌne mya baꞌn cyibaj. Akine Dios in chin kꞌmante jlu.

13 O che wile keju nnoꞌc cykꞌon cyib te nsanjele, akeju ateꞌ tuj tnam Samaria, in cybinchaꞌn aju mintiꞌ in cub tuj nwitze, in che pacban tiꞌj Baal, ex cyuꞌn ma che el tzpet ke aj Israel akeju etzan wuꞌne. 14 Ax icx o che wile keju nnoꞌc cykꞌon cyib te nsanjele tuj Jerusalén, in cybinchaꞌn aju plojxix wen, in che yaẍin, in che nicꞌan yol, ex in che cyuwsan cynabl xjal jumajx mya baꞌn ke tuꞌn miꞌn tcyaj cycolin aju mya baꞌn in cybinchaꞌn. Cycyakil jlu ic cyten te weye ic tzaꞌn tnam Sodoma ex tnam Gomorra. 15 Cyjaꞌtzun akine Dios Tajaw Tcyakil in xi nmaꞌne jlu cyiꞌj keju nnoꞌc cykꞌon cyib te nsanjele: Cxel nkꞌoꞌne cywa puro cꞌa ex cxel nkꞌoꞌne cycꞌa xiꞌyni venen tuj, porque nok cyuꞌn keju nnoꞌc cykꞌon cyib te nsanjele, akeju ateꞌ tuj Jerusalén, ma chꞌiy mya baꞌn tuj tcyakil nasyon lu.

16 Chi Kman aju Tajaw Tcyakil: Akeye aj Israel, miꞌn txi cykꞌoꞌn cywiꞌye tiꞌj ju in cymaꞌn keju nnoꞌc cykꞌon cyib te nsanjele, porque nok nicꞌaj yol in cymaꞌn, in cymaꞌn aju cyuꞌnx in cub cyximan, bajx txi nmaꞌne jun yol cye. 17 In xi cymaꞌn cye keju in che el icꞌunte nyole: Tcyakil cꞌelel baꞌn cyeye, chi Kman, che chi. Ex in xi cymaꞌn cye keju chcyin cywiꞌ, akeju in che oc lpeꞌ tiꞌj cyex cyximbetz: Mintiꞌ jun mya baꞌn tzul cyibaje, che chi.

18 Mi jun cye ojtzkiꞌn tnabl Kman tuꞌn, mi jun cye o til ex ka o tbi tyol Kman, mi jun cye o cub tkꞌoꞌn twiꞌ tiꞌj tyol Kman. 19 Aju ttxꞌuꞌjil Kman ic tten ic tzaꞌn txkan cykꞌikꞌ jbal, ex ic tzaꞌn jun xcyakinpaẍ cbel tzꞌak cyibaj ke xjal mya baꞌn. 20 Aju ttxꞌuꞌjil Kman mlay weꞌ, maxi cwebil ocxi tjapun aju ximamaj tuꞌn. Tzul tkꞌijlalil clar cꞌelel cynicꞌe tiꞌj jlu.

21 Mya wuꞌne e jeꞌx nsamaꞌn ke xjal lu, akeju nnoꞌc cykꞌon cyib te nsanjele, ex bajx chin yoline cyucꞌil, atzun cye ma che ex ojkelan tuꞌn cyyolin cye xjal. 22 Nokwit ma tzꞌel cynicꞌ tiꞌj nximbetze, mawtlo txi cymaꞌn nyole cye xjal etzan wuꞌne, ex mawtlo che el cypaꞌn tiꞌj ju be mya baꞌn kꞌiꞌn cyuꞌn, ex tiꞌj ju mya baꞌn in bant cyuꞌn. 23 Chi Kman: Ka najchak ex ka nikayin, ax Dios we kin tuj tcyakil part. 24 ¿Alcye jun jacu cub tewan tib nwitze? ¿Myapetzun atine tuj tcyakil part tuj cyaꞌj ex twitz txꞌotxꞌ? Akine Dios in chin kꞌmante jlu.

25 O nbiye aju nicꞌaj yol in cymaꞌn keju nnoꞌc cykꞌon cyib te nsanjele, ex nok tten in cymaꞌn ka wuꞌne samaꞌn ke ex ka in chin yoline cyucꞌil tuj cywitzicꞌ. 26 ¿Jtoj baꞌn t-xi cycolin keju nnoꞌc cykꞌon cyib te nsanjele tuꞌn t-xi cytxꞌolbaꞌn yol te sbubl, aju tuj cyex cynabl in jaw jlet? 27 Tuꞌnju witzicꞌ in xi cytxꞌolbaꞌn jun te juntl cyaj tuꞌn ticꞌ nnaꞌnjtze cyuꞌn ke xjal etzan wuꞌne, ic tzaꞌn o cybincha ke cyxeꞌchel, icꞌ nnaꞌnjtze cyuꞌn tej cyoc lpeꞌ tiꞌj dios Baal. 28 Ka ma tzꞌoc twitzicꞌ jun xjal nnoꞌc tkꞌon tib te nsanjele, e t-xi tmaꞌn ka nok jun witzicꞌ jlu, pero ka ma tcꞌam nyole, baꞌn tuꞌn t-xi tpacbaꞌn tuj tumel. Porque mya junx taꞌ ttxaꞌ triw tucꞌil triw. 29 Aju nyole ic tten ic tzaꞌn kꞌakꞌ ex ic tzaꞌn jun martiy in baj buchj abj tuꞌn. Akine Dios in chin kꞌmante jlu.

30 Cyjaꞌtzun mya baꞌn tuj nwitze aju in cybinchaꞌn keju nnoꞌc cykꞌon cyib te nsanjele, akeju nneꞌl cyelkꞌaꞌn yol jun te juntl ex in cymaꞌn ka wuꞌne in xi nmaꞌne yol cye. Akine Dios in chin kꞌmante jlu. 31 Mya baꞌn nneꞌla tuj nwitze aju in cybinchaꞌn keju nnoꞌc cykꞌon cyib te nsanjele, porque in cymaꞌn ka weye nyole in cypacbaꞌn ex cyuꞌnx in jaw cynicꞌan. 32 Mintiꞌ in chin tzalaje cyiꞌj keju nnoꞌc cykꞌon cyib te nsanjele in cymaꞌn witzicꞌbaj mya ax toc, ex tuꞌnju nicꞌaj yol ex sbubl in cymaꞌn, in che el tzpet ke xjal etzan wuꞌne. Mya wuꞌne in cheꞌx nsamaꞌne ke, ex bajx txi nmaꞌne cye tuꞌn cyyolin, cyjaꞌtzun mintiꞌ jun baꞌn ma cybincha cye ke xjal lu. Akine Dios in chin kꞌmante jlu.

33 Ka ma tzaj cykanin xjal teya, ka jun xjal nnoꞌc tkꞌon tib te nsanjele ex ka jun pal: ¿Alcye tyol Kman in tmaꞌn? ka che chi, kꞌmanxa cye cyjaꞌ: Ate Kman in tcyuwsaꞌn ka akeye jun iktz te te ex che cyjel xoꞌne tuꞌn. 34 Katzun at jun xjal nnoꞌc tkꞌon tib te nsanjele ex ka jun pal, ex ka nok alcye jun xjal ma tma: Atzun tyol Kman ma tzaj tmaꞌn weye jlu, ka chi, cbel tcastiw wuꞌne cyucꞌix keju ateꞌ tuj tja. 35 Teyle junjun baꞌn tuꞌn t-xi tkanin te tamiw ex ka te terman cyjaꞌ: ¿Alcye tzakꞌwebl tuꞌn Kman? ¿Chi toc tuꞌn? 36 Pero ya miꞌn txi cymaꞌne juntl maj cyjaꞌ: Atzun tyol Kman ma tzaj tmaꞌn weye jlu, porque ka at jun ma yolin icju, nok tex tyol in tmaꞌn ex ma baj tchꞌexpuꞌn tnabl nyole, akine Dios itzꞌ, ex akine Cydiose aju Tajaw Tcyakil.

37 Kaninxa cye keju nnoꞌc cykꞌon cyib te nsanjele cyjaꞌ: ¿Alcye tzakꞌwebl tuꞌn Kman? ¿Alcye o tma? 38 Katzun ma cyma: A tyol Kman ma tzaj tmaꞌn keye jlu, ka che chi, tzakꞌwenxa cye cyjaꞌ: Chi Kman: Tuꞌnju cucx ma che yoline tiꞌj yol o txi nmaꞌne tuꞌn miꞌn cyyoline tiꞌj, 39 tuꞌntzun jlu cꞌicꞌel cynaꞌnjtze wuꞌne, ex che elex nxoꞌne najchak nwitze tucꞌix ju tnam xi nkꞌoꞌne cyeye ex cye ke cyxeꞌchele. 40 Wuꞌne che elel icꞌune, cbel cychꞌixwiye te jumajx ex mlay tzicꞌ tnaꞌnjtz.