3 Ex tzaj tkanin Kman weye cyjaꞌ: ¿Ti ma tila Jeremías? Atzun weye xi ntzakꞌweꞌne: Ma wile twitz higo; akeju baꞌn, puro tbanil ke, atzun keju mya baꞌn, jumajx mya baꞌn ke, mlayx bant cylonjtz.

4 Tzajtzun tmaꞌn Kman weye: 5 Akine aju Cydios aj Israel in nmaꞌne jlu: Ic tzaꞌn ke twitz higo tbanilxix, cyjaꞌxtzun che elel aj Judá nwitze, akeju o che ex nlajoꞌne tzalu ex o cheꞌx kꞌiꞌn cyuꞌn aj Caldey; oc nbinchaye baꞌn cye. 6 Akine chin oquel tene cwentil cye ex che ul meltzꞌaj juntl maj wuꞌne tuj tnam lu; che tel baꞌn wuꞌne ex mlay che naj juntl maj wuꞌne; ic che oquel ic tzaꞌn jun tzeꞌ awaꞌn ex mlay che jatz nbakoꞌntle. 7 Cxel nkꞌoꞌne cynabl tuꞌn tel cynicꞌ tiꞌj ka akine Cyman; che oquel te jun tnam etzan wuꞌne, atzun weye chin oquele te Cydios, porque che ajetz meltzꞌaj wucꞌile tuꞌn tcyakil cyanmi.

8 Atzunte Sedequías aju rey te Judá, cyucꞌix ke nejenel ex mastl xjal najl tuj Jerusalén, akeju otok che cyaj ten ex keju otok cheꞌx kꞌiꞌn tuj Ejipt, che oquel wuꞌne ic tzaꞌn ke twitz higo mya baꞌn ex jumajx mya baꞌn ke, mlayx bant cylonjtz. 9 Che oquel yasoꞌn ex che elel icꞌun cyuꞌn xjal cyuj cycyakil nasyon twitz txꞌotxꞌ, che oquel kꞌoꞌn te mya baꞌn, te tzebl ex te xmaybil cyuꞌn xjal, ex ctzajel kanin mya baꞌn cyibaj cyuj cycyakil lugar jatum che bajel nsputune. 10 Che tzajel nsamaꞌne xjal kꞌojlel cyiꞌj, ax icx ctzajel nsamaꞌne weꞌyaj ex txꞌuꞌj yabil cyiꞌj, ocxi mi jun tuꞌn tcyaj ten tuj txꞌotxꞌ xi nkꞌoꞌne cye ex cye ktzan cyxeꞌchel.