Jeremías 25

Tzul jun aj kꞌoj cyiꞌj aj Judá tuj txꞌotxꞌ tuj tbankꞌab kꞌij

Tuj tcyajin abkꞌi ttzyetlen tcawin rey Joacim aju tcyꞌajal Josías, ex tuj tnejel abkꞌi ttzyetlen tcawin Nabucodonosor tuj Babilonia, tzaj tmaꞌn Kman jun tkanil te Jeremías cyiꞌj cycyakil aj Judá. 2 Xitzun tmaꞌn Jeremías aju t-sanjel Dios tkanil lu cye cycyakil tnam xjal tuj Judá, ax icx cye ke xjal najl tuj tnam Jerusalén, chi cyjaꞌ: 3 Atxix tuj toxlajin abkꞌi ttzyetlen tcawin Josías aju tcyꞌajal Amón ex rey te Judá ex cucx jaꞌlo, ma bant-xi 23 abkꞌi, cucx in tzaj yolin Kman wucꞌile ex elaꞌ maj in xi nmaꞌne cyeye, pero mintiꞌ in chinx cybine. 4 Ex masque cocꞌx in che tzaj t-samaꞌn Kman ke tmajen, akeju t-sanjel, atzun cyeye mintiꞌ in xi cybiꞌne ex mintiꞌ in xi cykꞌoꞌne cywiꞌye cyiꞌj 5 tej ttzaj cymaꞌn cyeye cyjaꞌ: Cycolin cyaje cybeye ex cybinchbene mya baꞌn, ex octzun che ankꞌile twitz txꞌotxꞌ aju tzaj tkꞌoꞌn Kman te jumajx te cyeye ex te cye ktzan cyxeꞌchele. 6 Miꞌn che oc lpeꞌye cyiꞌj junxitl dios, miꞌn che ajbene cye, miꞌn che cꞌulune cywitz ex miꞌn cybinchaye tuꞌn ttzaj tkꞌoj Kman cyiꞌje, tuꞌn tlaj cydiose cyuꞌnxe in baj cybinchaꞌne. Ka ma txi cynimane jlu, mlay tzaj t-samaꞌn Kman mya baꞌn cyibaje, che chi t-sanjel. 7 Chi Kman: Tuꞌnju mintiꞌ ma chinx cybiꞌne, ma tzaj nkꞌoje cyiꞌje tuꞌn cylaj tilbilal cydiose cyuꞌnxe in che bant, ex tuꞌn jlu tzul mya baꞌn cyibaje.

8 Cyjaꞌtzun chi Kman aju Tajaw Tcyakil: Tuꞌnju mintiꞌ ma txi cybine nyole, 9 che tzajel ntxcoꞌne cycyakil tnam ateꞌ tuj tbankꞌab kꞌij, tucꞌix Nabucodonosor aju ajbel weye ex rey te Babilonia, tuꞌn cyoc tzokpaj tiꞌj tnam lu, cyiꞌj cycyakil xjal najl tuj ex cyiꞌj ke nasyon cyvesin cyib tucꞌil. Che bajel nxitune ex te jumajx nok cytxꞌakan cyjel ten wuꞌne, tuꞌntzun cyjaw secꞌpaj xjal ex tuꞌn cyxmayin cyiꞌj. 10 Oc nbinchaye tuꞌn miꞌn cybinjtz bitz te ninkꞌij, mi ke bitz te tzalajbil, mi ke bitz te mejebleꞌn, mi tkꞌajkꞌajel twi cyaꞌ ex mi tuꞌn tilwaj t-spicꞌumal tkan lampr. 11 Tcyakil nasyon lu cbajel xitj ex nok ttxꞌakan cyjel ten. 70 abkꞌi che tel ke nasyon lu tjakꞌ tcawbil rey te Babilonia. 12 Ex octzun tjapun baj 70 abkꞌi, cbeltzun tcastiw rey te Babilonia wuꞌne tucꞌix ju nasyon in cawin rey tibaj, tuꞌn tlaj cybinchben xjal mya baꞌn; ax icx ke tnam cye aj Caldey che bel nxitune te jumajx. Akine Dios in chin kꞌmante jlu. 13 Cbel nkꞌoꞌne tcastiw ju nasyon lu ic tzaꞌnx tcyakil kꞌmamaj wuꞌne ex tzꞌibamaj tuj libro lu, ic tzaꞌnx o tma Jeremías cyiꞌj cycyakil nasyon. 14 Che oquex aj Caldey tjakꞌ cycawbil nimcu nasyon ex tjakꞌ cycawbil ke rey nim cyipumal. Wuꞌne cchjetel cyuꞌn ic tzaꞌnx cybinchben, chi Kman.

Aju castiw ctzajel cyibaj ke nasyon

15 Ate Kman aju Cydios aj Israel tzaj tmaꞌn weye cyjaꞌ: Kꞌinxa tal copa lu nojni tuꞌn nkꞌoje, ex kꞌonxa te cycꞌa xjal najlke cyuj cycyakil nasyon jatum cxel nsamaꞌna. 16 Octzun t-xi cycꞌaꞌn, che ẍocpajebel ex che oquel loc, tuꞌn cylaj ke xjal kꞌojlel che xel nsamaꞌne cyxol, chi Kman.

17 Tzajtzun wiꞌne aju tal copa tuj tkꞌab Kman ex xi nkꞌoꞌne te cycꞌa xjal najl cyuj nasyon jatum inx samaꞌne tuꞌn Kman. 18 Xi nkꞌoꞌne te cycꞌa aj Jerusalén ex cye keju najl cyuj ke tnam te Judá, tucꞌix cye cyrey ex cye nejenel cye, tuꞌntzun tbaj xitj cytanmi, tuꞌn cylabin xjal tiꞌj, tuꞌn toc te cyxmaybil ex tuꞌn ttzaj cykanin mya baꞌn tibaj, ic tzaꞌn in bant jaꞌlo. 19 Ax icx xi nkꞌoꞌne te tcꞌa Faraón aju rey te Ejipt, tucꞌix cye xjal at cyoclen ttxlaj ex cye nejenel ex cye cycyakil xjal ateꞌ tuj ttanmi, 20 tucꞌix cye xjal junxitl cyiyjil najl tuj tnam Ejipt. Ax icx xi nkꞌoꞌne cye cycyakil rey tuj txꞌotxꞌ Uz, ex cye cycyakil rey ateꞌ tuj cytxꞌotxꞌ aj Filistey, akeju ateꞌ tuj Ascalón, Gaza, Ecrón ex cye chꞌintl xjal ateꞌxtok tuj tnam Asdod. 21 Xi nkꞌoꞌne cye aj Edom, cye aj Moab ex cye aj Amón, 22 cye cycyakil rey te Tiro, cye cycyakil rey te Sidón, cye cycyakil rey in che cawin cyuj ke tnam ttziꞌyile nintz mar, 23 cye aj Dedán, cye aj Tema, cye aj Buz ex cye cycyakil xjal nneꞌl cymatzoꞌn ttzmal cywiꞌ ttxlaj cyẍcyin, 24 cye cycyakil rey te Arabia, cye rey junxilchak cyiyjil najlke tuj tzkij txꞌotxꞌ, 25 cye cycyakil rey te Zimri, te Elam ex te Media, 26 cye cycyakil rey ateꞌ tuj tbankꞌab kꞌij, ka nikayin ex ka najchak cyxol cyucꞌil mastl tnam, ex cye cycyakil rey ateꞌ tuj tcyakil twitz txꞌotxꞌ. Ex te bajsbil cxel tcꞌan rey te Babilonia.

27 Ex tzaj tmaꞌn Kman weye: Kꞌmanxa cye cyjaꞌ: Chi Kman aju Tajaw Tcyakil ex Cydios aj Israel: Cycꞌanxe aju tcuꞌx tuj copa tuꞌn tchyoꞌn cywiꞌye, tuꞌn ttzaj xab cycꞌuꞌje ex tuꞌn cycub tzꞌake twitz txꞌotxꞌ tuꞌntzun miꞌn cyjaw weꞌye, tuꞌn cylaj ke xjal che xel nsamaꞌne kꞌojlel cyiꞌje. 28 Ex katzun cycꞌiꞌ tzicꞌ cyiꞌn copa tuj tkꞌaba ex cycꞌiꞌ txi cycꞌaꞌn aju tcuꞌx tuj, kꞌmanxa cye cyjaꞌ: Chi Dios aju Tajaw Tcyakil, il tiꞌj cxel cycꞌaꞌne. 29 Porque ma tzyet tuꞌn t-xi nkꞌoꞌne castiw tuj tnam in naꞌnjtz nbiye tuj, yajtzun cyeye, ¿tuj cywitze kape miꞌn cub cycastiwoye? Mlayx tzicꞌx tiꞌj tuꞌn miꞌn tcub cycastiwoye, porque che xel nsamaꞌne ke xjal kꞌojlel cyiꞌj cycyakil xjal najl twitz txꞌotxꞌ. Akine Dios Tajaw tcyakil in chin kꞌmante jlu.

30 Kꞌmanxa tcyakil yol lu cye: Max tuj cyaꞌj ctzajel tkꞌajkꞌajel twiꞌ Kman cyuwxix wen, max tuj lugar xjan jatum najl ctzajel kꞌajt; ctzajel kꞌajt cyuwxix wen cyiꞌj xjal etzan tuꞌn, in schꞌin ic tzaꞌn ke xjal nneꞌl cypatzꞌuꞌn taꞌl twitz uva tjakꞌ cykan, ax icx in schꞌin tucꞌil tkꞌoj cyiꞌj cycyakil xjal najl twitz txꞌotxꞌ. 31 Aju tkꞌajkꞌajel twiꞌ cpol max ttxaꞌnpun txꞌotxꞌ, porque cycyakil nasyon che oquel tuj xjel tuꞌn Kman, cbel cysentens cycyakil xjal tuꞌn ex oc tbinchaꞌ tuꞌn cycub byoꞌn keju binchal mya baꞌn. Ate Kman in kꞌmante jlu.

32 Ate Kman aju Tajaw Tcyakil in tmaꞌn cyjaꞌ: Cpol baj cꞌixbisabl cyuj cycyakil nasyon; jun nintz cykꞌikꞌ ctzajel keꞌ max ttxaꞌnpun txꞌotxꞌ. 33 Akeju che cymel tuꞌn Kman tuj kꞌij lu che cyjel paleꞌ tuj tcyakil twitz txꞌotxꞌ. Mi jun cꞌokꞌel cyiꞌj ex mi jun cjawil kꞌinte cyximlal tuꞌn cycuꞌx makuꞌn; ax che cyjel paleꞌ twitz txꞌotxꞌ ic tzaꞌn cytxaꞌ alumaj. 34 Che wuyine akeye cawil ex che schꞌine tuꞌn taꞌw cꞌixcꞌoj, ex akeye nejenel cye xjal cytolin baj cyibe tuj kuk, porque ma tzul tkꞌijlalil tuꞌn cycub byete ex tuꞌn cybaj sputje, ex che bel buchje ic tzaꞌn jun vas tbanilxix.

35 Mlayx bant tuꞌn cyel ok ke cawil ex mlayx che tzokpaj ke nejenel cye xjal. 36 In binjtz tkꞌajkꞌajel cywiꞌ ke cawil ex in che wuyin ke nejenel porque ma naj cytanmi tuꞌn Kman, 37 ex ma che baj naj ke cojbil tbanilxix tuꞌn tkꞌoj. 38 Ma tzꞌetz Kman ic tzaꞌn jun balun nneꞌtz tuj tjul ex aju cytanmi nok ttxꞌakan ma cyaj ten tuꞌn, porque ma tzaj nimxix tkꞌoj Kman ex ma tzaj t-samaꞌn jun kꞌoj xobajilxix cyiꞌj.