O cyajbe xjal tuꞌn tcub byoꞌn Jeremías cyuꞌn
26
Tej ttzyet tcawin Joacim aju tcyꞌajal Josías tuj Judá, tzaj yolin Kman tucꞌil Jeremías, 2 ex tzaj tmaꞌn te cyjaꞌ: Weꞌcuya ttxaꞌn peꞌn twitz tja Dios, ex tcyakil aju cxel nmaꞌne teya kꞌmanxa cye xjal akeju in che tzaj cyuj ke tnam te Judá tuꞌn cycꞌulun tuj tja Dios, nok tkanx mi txi tmaꞌna tcyakil nyole cye. 3 Mya yajcu txi nimana cyuꞌn ex jacu cyaj cycolin cybe mya baꞌn tuꞌntzun miꞌn tcub nkꞌoꞌne cycastiw, aju ximamaj wuꞌne tuꞌn tcub nkꞌoꞌne tuꞌn tlaj cybinchben mya baꞌn. 4 Kꞌmanxa cye, akine Dios in chin kꞌmante jlu: Ka mi ma txi cynimane nyole ex ka mi ma che japun ke nleye cyuꞌne, aju o txi nmaꞌne cyeye, 5 ex ka mi ma txi cynimane aju in cymaꞌn ke nmajene, akeju nsanjele, akeju cucx ma che tzaj nsamaꞌne ex mintiꞌ ma txi cynimane, 6 entons ic cꞌoquel njaye lu wuꞌne, ic tzaꞌn o nbinchaye tiꞌj ju attok tuj Silo, ex ctzajel mya baꞌn tibaj tnam lu wuꞌne, tuꞌn toc te jun yecꞌbil cye cycyakil nasyon twitz txꞌotxꞌ, chicuya cye, chi Dios te Jeremías.7 Ke pal ex keju nnoꞌc cykꞌon cyib te t-sanjel Dios ex cycyakil xjal o cybi aju tkanil o tma Jeremías tuj tja Dios. 8 Tej tbaj tmaꞌn Jeremías aju yol otok tzaj kꞌmaꞌn te tuꞌn Kman, tzaj tzyuꞌn cyuꞌn ke pal ex cyuꞌn keju nnoꞌc cykꞌon cyib te t-sanjel Dios ex cyuꞌn xjal, ex xi cymaꞌn te: Il tiꞌj tuꞌn tcyima. 9 ¿Tzaꞌn tten ma tmaya ka tuꞌn Kman ma tzaj samaꞌna kꞌmalte keye tuꞌn tnaj tja Dios lu ic tzaꞌn o naj aju attok tuj Silo, ex ka tuꞌn tcub xitj tnam lu ex tuꞌn tcyaj ten mintiꞌ xjal tuj? Che chi. Ex cycyakil xjal baj cytxolban cyib tiꞌjele Jeremías tuj tja Dios.
10 Tej cybinte ke nejenel cye aj Judá aju in baj, cub be cyuꞌn tuj tja rey tuꞌn cypon tuj tja Dios ex e cub keꞌ ttziꞌ Acꞌaj Pwert te tja Dios. 11 Atzun cye pal ex keju nnoꞌc cykꞌon cyib te t-sanjel Dios xi cymaꞌn cye ke nejenel ex cye cycyakil xjal: Aju xjal lu il tiꞌj tuꞌn tcub t-sentens tuꞌn tcyim, porque ma tma tuꞌn ttzaj mya baꞌn tiꞌj tnam lu, ex ax keye ma che binte te, che chi.
12 Atzunte Jeremías xi tmaꞌn cye ke nejenel ex cye xjal: Ate Kman saj samante weye tuꞌn t-xi nmaꞌne cyeye alcye tuꞌn tbaj tiꞌj tja Dios lu ex tiꞌj tnam lu, ic tzaꞌnx ma cybiye. 13 Cyjaꞌtzun, cychꞌexpum cybeye ex cybinchbene mya baꞌn ex cynimanxe Kman aju Cydiose, tuꞌntzun mi ttzaj t-samaꞌn mya baꞌn cyibaje, aju ma tma. 14 Atzun weye, lu kine atine tuj cykꞌabe; cybinchame wiꞌje alcye baꞌn tuj cywitze. 15 Katzun ma chin cub cybyoꞌne, tzꞌelx cynicꞌe tiꞌj, axix toc cyuꞌnxe ctzajel castiw cyibaje ex tibaj tnam lu ex cyibaj cycyakil xjal najl tuj, tuꞌnju otok cub cybyoꞌne jun xjal mintiꞌ til, porque ax toc ate Kman saj samante weye tuꞌn t-xi nmaꞌne tcyakil yol lu cyeye, chi Jeremías.
16 Atzun cye nejenel ex cycyakil xjal xi cymaꞌn cye pal ex cye keju nnoꞌc cykꞌon cyib te t-sanjel Dios: Mintiꞌ jun til xjal lu ma cnet kuꞌn tuꞌn tcyim; aju xjal lu tuꞌn Kman aju Kdios ma tzaj samaꞌn tuꞌn tyolin kucꞌil, che chi.
17 At junjun tij xjal e jaw weꞌ ex xi cymaꞌn cye ke xjal cybuyin cyib: 18 Tuj tkꞌijlalil tej tten Ezequías te rey tuj Judá, ate Miqueas aju aj Moreset o yolin tuj tbi Kman cye cycyakil xjal aj Judá cyjaꞌ: Chi Kman aju Tajaw Tcyakil: Cꞌoquel tnam Sión te jun cojbil chꞌocamaj, atzunju tnam Jerusalén nok ttxꞌakan cyjel buyeꞌ ex cchꞌiyil nim cꞌul twi witz jatum tcub tja Dios.
19 ¿Baka o cub byoꞌn Miqueas tuꞌn rey Ezequías ex cyuꞌn cycyakil xjal aj Judá? Nokpe tzaj t-xobil rey twitz Kman ex oc ten cubsal twitz Dios tuꞌn ttzaj tzꞌeꞌy tcꞌuꞌj tiꞌj. Cyjaꞌtzun mintiꞌ tzaj t-samaꞌn Kman mya baꞌn cyibaj, aju otok tma. ¿Yajtzun ke, maj ctzajel kiꞌn jun nintz mya baꞌn kibaj tuꞌn tcub kbyoꞌn xjal lu? Che chi.
20 Ax icx tzaj t-samaꞌn Dios t-sanjel, aju Urías tbi ex tcyꞌajal Semaías aju aj Quiriat-jearim, tuꞌn ttzaj tmaꞌn ax tkanil icx tzaꞌn ma tma Jeremías, ka cyjaꞌtok ttzaj mya baꞌn tibaj tnam lu ex tibaj nasyon lu. 21 Tejtzun tbinte rey Joacim cyucꞌix keju at cyoclen ttxlaj ex ke nejenel aju o tma Urías aju t-sanjel Dios, o tajbe rey tuꞌn tcub tbyoꞌn, pero tej tbinte Urías jlu, tzaj t-xobil tiꞌj ex xi ok tuj Ejipt. 22 Xitzun samaꞌn Elnatán aju tcyꞌajal Acbor tuꞌn rey Joacim, cyucꞌix junjuntl xjal tucꞌil, tuꞌn cyxiꞌ tuj Ejipt. 23 Ajtz cyiꞌn Urías tuj Ejipt ex xi cykꞌoꞌn tuj tkꞌab rey Joacim, atzunte rey xi tmaꞌn tuꞌn tcub byoꞌn ex tuꞌn t-xi xoꞌc t-ximlal tuj camposant jatum in che cuꞌx makuꞌn nok alcye xjal.
24 Ax icx te Ahicam aju tcyꞌajal Safán o yolin tuꞌn tclet Jeremías tuj cykꞌab xjal, ex mintiꞌ cub byoꞌn.