Aju techal tiꞌj jun yuw
27
Tej ttzyet tcawin Sedequías aju tcyꞌajal Josías ex rey te Judá, tzaj yolin Kman tucꞌil Jeremías cyjaꞌ: 2 Binchama jun yuw cyucꞌix ke pyal tiꞌj ex kꞌon jaxa tibaj tkula, 3 ex samanxtzuna jun tkanil cye ke rey tuj Edom, Moab, Amón, Tiro ex Sidón; samanxa cyiꞌj aj sanjelal ma che ul tuj tnam Jerusalén yolil tucꞌil rey Sedequías. 4 Ex cxel tmaꞌna cye cyjaꞌ: Cymanxe cye cyreye: Ate Kman aju Tajaw Tcyakil ex Cydios aj Israel in kꞌmante jlu: 5 Tucꞌil nim wipumale bant txꞌotxꞌ, ex e bant xjal ex ke alumaj ateꞌ twitz txꞌotxꞌ; ex alcye jun xjal waje txi nkꞌoꞌne te, jacu txi nkꞌoꞌne. 6 Atzun jaꞌlo ma cyaj nkꞌoꞌne tcyakil txꞌotxꞌ lu tjakꞌ tcawbil Nabucodonosor aju rey te Babilonia, aju ajbel weye; ax icx ke txcup te tjakꞌ cꞌul ma che cyaj nkꞌoꞌne tjakꞌ tcawbil. 7 Cycyakil nasyon che oquex tjakꞌ tcawbil, ax icx tjakꞌ tcawbil tcyꞌajal ex tjakꞌ tcawbil tal tchman, pero cpol tkꞌijlalil tuꞌn tocx ttanmi tjakꞌ cycawbil ke nintz nasyon ex tjakꞌ cycawbil ke rey nimxix cyipumal. 8 Ex katzun at jun nasyon ex ka jun rey mintiꞌ ma tzꞌocx tkꞌon tib tjakꞌ tcawbil Nabucodonosor, akine chin tzajel samante kꞌoj, weꞌyaj ex txꞌuꞌj yabil tibaj te tcastiw, ocxi tbaj naj tcyakil tuꞌn Nabucodonosor. Akine Dios in chin kꞌmante jlu.9 Atzun cyeye, miꞌn txi cybiꞌne cyyol keju nnoꞌc cykꞌon cyib te nsanjele, mi ke chman, mi ke pjul tiꞌj witzicꞌ, mi keju baꞌn che cyꞌaꞌn ex mi keju in cymaꞌn ti cbajel te tibajxi, akeju in cymaꞌn cyeye: Mlay che ocxe tjakꞌ tcawbil rey te Babilonia. 10 Aju in tzaj cymaꞌn cyeye nok nicꞌaj yol. Ka ma txi cynimane cyyol, che elex kꞌiꞌne tuj cytxꞌotxꞌe tuꞌn cypone tuj juntl tnam najchak; che bajel nsputune ex che cymele. 11 Atzun teju nasyon ma tzꞌocx tkꞌon tib tjakꞌ tcawbil rey te Babilonia ex ka ma tzꞌajben te, cxel nkꞌoꞌne ambil cye xjal ax tuꞌn cycyaj ten ax tuj cytxꞌotxꞌ, tuꞌntzun cyankꞌin tuj ex tuꞌn cyakꞌnan twitz. Akine Dios in chin kꞌmante jlu.
12 Akine Jeremías xi nmaꞌne tcyakil jlu te Sedequías aju rey te Judá: Cyocxe tjakꞌ tcawbil rey te Babilonia, che ajbene te ex che ankꞌiltzune. 13 ¿Tikuꞌn taja tuꞌn tcyima cyucꞌix ke t-xjalila tuꞌn kꞌoj, tuꞌn weꞌyaj ex tuꞌn txꞌuꞌj yabil, ic tzaꞌnx ma tma Kman tuꞌn tbaj cyiꞌj cycyakil nasyon mintiꞌ ma tzꞌocx cykꞌon cyib tjakꞌ tcawbil rey te Babilonia? 14 Miꞌn txi cybiꞌne cyyol keju nnoꞌc cykꞌon cyib te t-sanjel Dios, akeju in cymaꞌn cyeye: Mlay che ocxe tjakꞌ tcawbil rey te Babilonia, porque aju in cymaꞌn cyeye nok tten cyuꞌn. 15 Chi Kman: Mya a kine ma chin tzaj samante cye. In cymaꞌn ka wuꞌne in tzaj nmaꞌne yol aju in xi cymaꞌn cyeye, ex nok tten cyuꞌn. Cyjaꞌtzun che elex nlajoꞌne tuj txꞌotxꞌ lu ex che cymele cyucꞌix keju ma che kꞌmante ke yol lu cyeye, chi Kman, nchiye te.
16 Ax icx xi nmaꞌne cye pal ex cye cycyakil tnam xjal cyjaꞌ: Atzun jlu in tmaꞌn Kman: Miꞌn txi cybiꞌne cyyol keju nnoꞌc cykꞌon cyib te nsanjele, akeju in che kꞌmante cyeye ka jurat naj che ajetz samaꞌn ke macbil tuj tja Dios, akeju otok che pon kꞌiꞌn tuj Babilonia. Aju in cymaꞌn cyeye nok tten cyuꞌn. 17 Miꞌn txi cybiꞌne cyyol, cyocxe tjakꞌ tcawbil rey te Babilonia ex octzun che ankꞌile. ¿Ilpetzun tiꞌj tuꞌn tbaj xitj tnam lu? 18 Ka axix toc nsanjele ke, ex ka ax toc akine o chin yolin cyucꞌil, e ttzaj cykanin weye, akine Dios Tajaw Tcyakil, tuꞌn miꞌn t-xi nkꞌoꞌne ambil cye aj Babilonia tuꞌn t-xi cyiꞌn ke macbil atx tuj tja Dios, tuj tja rey te Judá ex tuj Jerusalén, chi Kman, chi Jeremías.
19 Porque ate Kman aju Tajaw Tcyakil chi cyjaꞌ cyiꞌj ke tkan ja, tiꞌj ju pil matij kꞌan cꞌuxbil ttxꞌotxꞌil, cyiꞌj ke tkꞌukbil ex cyiꞌj mastl macbil otok che cyaj ten tuj tnam lu, 20 akeju mintiꞌ e jeꞌx tiꞌn Nabucodonosor aju rey te Babilonia tej tex tiꞌn Nabucodonosor Jeconías aju tcyꞌajal Joacim ex rey te Judá tuj Jerusalén, tuꞌn tpon tiꞌn tuj Babilonia junx cyucꞌil cycyakil xjal maꞌ cyoclen tuj Jerusalén ex tuj Judá, 21 atzun jlu in tmaꞌn Kman aju Tajaw Tcyakil ex Cydios aj Israel cyiꞌj ke macbil o che cyaj ten tuj tja Dios ex tuj tja rey te Judá ex tuj Jerusalén: 22 Che xel kꞌiꞌn tuj Babilonia, ex axtzun che cyjel ten ocxi wajbeye tuꞌn cyul juntl maj tuj lugar lu. Akine Dios in chin kꞌmante jlu.