2 —Ate Kman aju Tajaw Tcyakil ex Cydios aj Israel, chi cyjaꞌ: Cbel ntokine yuw tcub cyibaje tuꞌn rey te Babilonia. 3 Tuj cab abkꞌi jaꞌlo oc nbinchaꞌye tuꞌn cyul juntl maj cycyakil ke macbil tuj tja Dios, akeju o che pon tiꞌn rey Nabucodonosor tuj Babilonia. 4 Ax icx oc nbinchaꞌye tuꞌn tajtz meltzꞌaj Jeconías aju tcyꞌajal Joacim ex rey te Judá, cyucꞌix cycyakil mastl xjal e ex kꞌiꞌn tuj Judá tuꞌn cypon tuj Babilonia, porque cbel ntokine yuw tcub cyibaje tuꞌn rey Nabucodonosor, chi Kman, chi Hananías.

5 Atzunte Jeremías aju t-sanjel Dios xi ttzakꞌweꞌn te Hananías, cywitz ke pal ex cywitz cycyakil tnam xjal ateꞌcxtok tuj tja Dios:

6 —Baꞌn, cuchiwt tbincha Kman icju ex tuꞌn tjapun tuꞌn akeju yol ma tmaya, tuꞌn cyul meltzꞌaj ke macbil tuj tja Dios ex tuꞌn cyajtz cycyakil xjal o che pon kꞌiꞌn tuj Babilonia. 7 Masque icju, pero bintza aju cxel nmaꞌne teya ex cye cycyakil tnam xjal: 8 Ke t-sanjel Dios e ten tuj tkꞌijlalil ojtxi naꞌnxtok kul itzꞌj ke, o cyma tkanil tuꞌn ttzaj kꞌoj, cꞌixbisabl ex txꞌuꞌj yabil cyibaj nimcu nasyon ex cyibaj ke cawbil nimxix cyipumal. 9 Ka at jun t-sanjel Dios in tmaꞌn tkanil tuꞌn cyten xjal tuj txubtxaj ex ka in japun aju in tmaꞌn, atzun nneꞌl nicꞌbaj tiꞌj ka axix toc a Kman in tzaj samante te, chi Jeremías.

10 Eltzun tiꞌn Hananías aju yuw tjax tibaj tkul Jeremías, cub ttokin, 11 ex tma cywitz cycyakil tnam xjal:

—Chi Kman cyjaꞌ: Tuj tcabin abkꞌi jaꞌlo, cyjaꞌxtzun cꞌelel wiꞌne aju yuw tcub cyibaj cycyakil nasyon tuꞌn Nabucodonosor aju rey te Babilonia, ex cyjaꞌxtzun cbel ntokine, chi Hananías.

Atzunte Jeremías cub be tuꞌn.

12 Tel-lenxi tiꞌn Hananías yuw tjaxtok tibaj tkul Jeremías, tzaj yolin Kman tucꞌil Jeremías ex tma cyjaꞌ: 13 Txiꞌya ex kꞌmanxa te Hananías: Akine Dios in chin kꞌmante jlu: Ma cub ttokina yuw tzeꞌ, pero te t-xel jlu ma baj nbinchaꞌne juntl yuw cꞌuxbil te teya. 14 Porque akine Dios aju Tajaw Tcyakil ex Cydios aj Israel in chin kꞌmante jlu: Ma cub nkꞌoꞌne jun yuw cꞌuxbil cyibaj cycyakil nasyon, tuꞌn cyoc te tmajen Nabucodonosor aju rey te Babilonia; icxpe ke txcup te tjakꞌ cꞌul o che cyaj nkꞌoꞌne tjakꞌ tcawbil.

15 Xitzun tmaꞌn Jeremías te Hananías:

—Bintza Hananías. Mya a Kman ma tzaj samante teya, ma cub tiꞌj cynabl tnam xjal tuꞌna ex ma keꞌ cycꞌuꞌj tiꞌj nicꞌaj yol in tmaꞌna. 16 Cyjaꞌtzun in tmaꞌn Kman: Miꞌn tentla twitz txꞌotxꞌ. Tuj abkꞌi lu cymela, porque tuꞌn tyola ma jaw cyiꞌn cyib tnam xjal wiꞌje, chi Dios, chi Jeremías.

17 Cyimtzun Hananías tuj twukin xjaw tex abkꞌi lu.