4 Ate Kman aju Tajaw Tcyakil ex Cydios aj Israel in tmaꞌn cye cycyakil aj Jerusalén o che pon kꞌiꞌn tuj Babilonia, chi cyjaꞌ: 5 Cybinchan jaw cyjaye ex che ankꞌine cyuj, cyawan cuꞌxe cyawale ex che nicꞌbene tiꞌj cywitz. 6 Che mojeꞌye ex e ttzaj cycyꞌajale ex cymeꞌjele, icx cye cycꞌwaꞌle e cyjaw mojeꞌ ex e ttzaj cycꞌwaꞌl, chmet-x cybaje ma chixin ex mya nok tuꞌn tcub naj cyajlale. 7 Tzꞌoc tilil cyuꞌne tuꞌn cyten xjal tuj txubtxaj tuj tnam jatum o che pon nsamaꞌne ex che cubsane nwitze tiꞌj tnam lu, porque ka ma che ten xjal tuj txubtxaj tuj tnam lu, ax icx cyeye che tele tuj txubtxaj. 8 Akine Dios Tajaw Tcyakil ex Cydios aj Israel cxel nmaꞌne jlu cyeye: Miꞌn txi cykꞌoꞌne ambil tuꞌn cycub sbuꞌne cyuꞌn keju nnoꞌc cykꞌon cyib te nsanjele, mi cyuꞌn ke chman najl cyxole ex miꞌn txi cybiꞌne cywitzicꞌ nnoꞌc yecꞌun tuj cywitz. 9 Aju in cymaꞌn cyeye ka wuꞌne o txi nmaꞌne cye, puro nicꞌaj yol jlu. Akine Dios in chin kꞌmante jlu.

10 Chi Kman cyjaꞌ: Ocxi tjapun baj 70 abkꞌi cyuꞌne tuj Babilonia, oc nbinchaꞌye baꞌn cyeye ex cjapunel nyole tuꞌn cyajtz meltzꞌaje juntl maj wuꞌne tuj lugar lu. 11 Porque baꞌn wuꞌne alcye nximbetze cyiꞌje; ximan wuꞌne tuꞌn nbinchanteye baꞌn cyiꞌje ex mya tuꞌn nbinchanteye mya baꞌn. In xi nmaꞌne jlu tuꞌntzun tkeꞌ cycꞌuꞌje tiꞌj oybil, porque mas baꞌn che tele te yajxitl. Akine Dios in chin kꞌmante jlu. 12 Che cubsaltzune nwitze ex che tzajel yoline wucꞌile tuj naꞌj Dios, atzun weye che tzajel nbiꞌne. 13 Che jyole wiꞌje ex chin cnetele cyuꞌne, porque che jyole wiꞌje tuꞌn tcyakil cyanmiye. 14 Axix toc chin cnetele cyuꞌne; che ajetz wiꞌne jatum ateꞌye jaꞌlo, che eletz wiꞌne cyuj cycyakil nasyon ex cyuj cycyakil lugar jatum o che baj nsputune; che oquel nchmoꞌne ex che ajetz wiꞌne tuꞌn cyule juntl maj tuj lugar lu jatum e ex nlajoꞌne. Akine Dios in chin kꞌmante jlu.

15 Cyeye in cymaꞌne cyjaꞌ: O che ul t-samaꞌn Kman ke t-sanjel kucꞌil tzalu tuj Babilonia, che chiye. 16 Atzunte Kman in tmaꞌn tiꞌj rey aju kꞌukl tuj tkꞌukbil David, ex cyiꞌj ke xjal najlkeꞌx tuj tnam Jerusalén ex cyiꞌj ke cyermaniye, akeju mintiꞌ e jeꞌx kꞌiꞌn cyucꞌile: 17 Cxel nsamaꞌne kꞌoj, weꞌyaj ex txꞌuꞌj yabil cyibaj. Che oquel wuꞌne ic tzaꞌn ke twitz higo kꞌaynaj ke, ex tuꞌnju jumajx mya baꞌn ke, mlay bant tuꞌn cyxiꞌ loꞌn. Akine Dios Tajaw tcyakil in chin kꞌmante jlu. 18 Chin xel lpeꞌye kꞌojlel cyiꞌj ex ctzajel nsamaꞌne weꞌyaj ex txꞌuꞌj yabil cyibaj. Wuꞌne che jawil secꞌpaj cycyakil nasyon cyiꞌj, ctzajel kanin mya baꞌn cyibaj, che jawil labin xjal cyiꞌj ex che oquel nkꞌoꞌne te cytzebl ex te cyxmaybil cycyakil nasyon jatum che bajel nsputune, 19 tuꞌnju mintiꞌ xi cybiꞌn nyole, aju xi kꞌmaꞌn cye cyuꞌn nsanjele elaꞌxi maj cheꞌx nsamaꞌne. Ax icx cyeye, mintiꞌx xi cybiꞌne. Akine Dios in chin kꞌmante jlu.

20 Atzun cyeye, akeye o che ex kꞌiꞌn tuj Jerusalén ex o che pon nsamaꞌne tuj Babilonia, cybinxe nyole. 21 Atzun jlu in tmaꞌn Kman aju Tajaw Tcyakil ex Cydios aj Israel tiꞌj Acab aju tcyꞌajal Colaías, ex tiꞌj Sedequías aju tcyꞌajal Maasías, akeju in che kꞌmante nicꞌaj yol cyeye ex in cymaꞌn ka wuꞌne in xi nmaꞌne yol cye: Che xel nkꞌoꞌne tuj tkꞌab Nabucodonosor aju rey te Babilonia, ex cywitzxtzune che bel byoꞌn. 22 Cyjaꞌtzun ke aj Judá, akeju otok che pon kꞌiꞌn tuj Babilonia, ka cyaj tzaj cykanin jun mya baꞌn cyibaj cyucꞌil, cxel cymaꞌn cyjaꞌ: Baꞌnwt tbincha Kman tiꞌja ic tzaꞌn o tbincha tiꞌj Sedequías ex tiꞌj Acab tej cycub baj tzꞌeꞌy tuj kꞌakꞌ tuꞌn rey te Babilonia. 23 Atzunju cbajel cyiꞌj, tuꞌnju cybincha mya baꞌn cyxol aj Israel: Cybincha aj pajil cyucꞌil cyxuꞌjil cyucꞌil, in che nicꞌan yol, in cymaꞌn ka wuꞌne xi nmaꞌne ke yol cye, aju in cymaꞌn cyeye ex mintiꞌ xi nmaꞌne cye. Baꞌn jlu wuꞌne ex o wile. Akine Dios in chin kꞌmante jlu.

24 Xi tmaꞌn Kman te Jeremías tuꞌn t-xi tmaꞌn te Semaías aju aj Nehelam cyjaꞌ: 25 Ate Kman aju Tajaw Tcyakil ex Cydios aj Israel chi cyjaꞌ: Aya xi samante jun uꞌj cye cycyakil tnam xjal ateꞌ tuj Jerusalén ex te pal Sofonías aju tcyꞌajal Maasías, ex cye ke mastl pal, ex chi uꞌj cyjaꞌ: 26 Ate Kman ma tzꞌoc kꞌonte toclena te pal te t-xel Joiada, tuꞌntzun tcyaj ten tja Dios tuj tcwenta. Ka at jun loc ma tzꞌoc ten yolil ic tzaꞌn jun t-sanjel Dios, kꞌoꞌncxa ke tkan tuj toyꞌ tzeꞌ ex cꞌaloꞌnca tuꞌn caden. 27 ¿Tikuꞌntzun naꞌnx tmayet Jeremías tuꞌna, aju aj Anatot, aju in yolin cywitze ic tzaꞌn jun t-sanjel Dios? 28 Porque ma tzul t-samaꞌn jun uꞌj kucꞌile tzalu tuj Babilonia chi cyjaꞌ: Nim abkꞌi che tele ma chixin, cyjaꞌtzun cybinchan jaw cyjaye ex che tene cyuj ex cyawan cuꞌxe cyawale ex che nicꞌbene cyiꞌj cywitz, chi Jeremías keye tuj uꞌj, chi Semaías.

29 Atzunte pal Sofonías jaw t-schꞌin ju uꞌj lu twitz Jeremías. 30 Tzajtzun yolin Kman tucꞌil Jeremías cyjaꞌ: 31 Samanxa jun uꞌj cye cycyakil keju o cheꞌx kꞌiꞌn tuj Babilonia, tuꞌn cybinte ka akine Dios in chin kꞌmante jlu: Ate Semaías aju aj Nehelam ma yolin cyucꞌile ka wuꞌne otok txi nsamaꞌne, pero nok tten tuꞌn, ex ma cub tiꞌj cynable tuꞌn tuꞌn toc keꞌ cycꞌuꞌje tiꞌj nicꞌaj yol ma tma. 32 Cyjaꞌtzun akine Dios cxel nmaꞌne jlu: Cbel tcastiw Semaías wuꞌne, cyucꞌix ke tiyjil. Mlay che ten ke tiyjil cyxol ke xjal etzan wuꞌne ex mi tuꞌn cy-achin tiꞌj tzalajbil cxel nkꞌoꞌne cye xjal etzan wuꞌne, porque cyuꞌn ke tyol ma jaw cyiꞌn cyib ke xjal etzan wuꞌne tuꞌn cykꞌojin wiꞌje. Akine Dios in chin kꞌmante jlu.