9
Nokwit jacu tzꞌoc nwiꞌye ex ke tbakꞌ nwitze ic tzaꞌn jun twi aꞌ, tuꞌntzun njaw okꞌe kꞌijl ex konicꞌan tuꞌn cylaj ke nxjalile ma che cyim. 2 Nokwit jacu cnet jun tal nposadiye tuj lugar mintiꞌ cynajbil xjal tuj, tuꞌntzun wel lakꞌeꞌye najchak cyiꞌj ke nxjalile, porque cycyakil ma tzꞌel cypaꞌn cyib tiꞌj Dios, cycyakil jumajx mya baꞌn ke. 3 In che xoꞌn nicꞌaj yol cyiꞌj cyucꞌil ic tzaꞌn in cheꞌx xoꞌt plech tuꞌn xobl te. Tuj tnam lu oꞌcx in che yolin tiꞌj nicꞌaj yol, mintiꞌ in che yolin axix toc; mas il in cybinchaꞌn junjun kꞌij ex mintiꞌ nneꞌl cynicꞌ wiꞌje. Akine Dios in chin kꞌmante jlu. 4 Miꞌn tzꞌoc keꞌ cycꞌuꞌje cyiꞌj cyamiwoye ex mi tiꞌj cyermaniye, porque akeju cyerman cyib in sbun jun tiꞌj juntl ex akeju xjal cyamiw cyib in jaw cynicꞌan yol jun tiꞌj juntl. 5 Teylex te junjun in sbun tiꞌj juntl, mintiꞌ jun in yolin axix toc; ma nakꞌet cytziꞌ tuꞌn cynicꞌan yol ex jumajx mya baꞌn cybinchben.6 Chi Kman cyjaꞌ: Puro nicꞌaj yol in cymaꞌn, cucx in che sbun ex mintiꞌ cyajbil tuꞌn tel cynicꞌ wiꞌje. 7 Cyjaꞌtzun chi Kman aju Tajaw Tcyakil, in tmaꞌn cyjaꞌ: ¿Ti juntl cbantel wuꞌne cyiꞌj ke xjal etzan wuꞌne? Che oquex nkꞌoꞌne tuj kꞌakꞌ tuꞌntzun tel baj ttzꞌilil cyiꞌj. 8 Aju cytziꞌ ic tten ic tzaꞌn jun plech baꞌn biyun, nok nicꞌaj yol in cymaꞌn. In xi cykꞌolbeꞌn ke cyucꞌil tuꞌn cycꞌujlalil, pero nok tten cyuꞌn, porque nok tcuꞌx tiꞌj cycꞌuꞌj tuꞌn cybinchante mya baꞌn cyiꞌj. 9 ¿Miꞌnpetzun tzaj cycastiw wuꞌne tuꞌn tlaj cybinchben lu? ¿Miꞌnpetzun txi nkꞌoꞌne t-xel cybinchben xjal mya baꞌn lu? Chi Kman.
10 Chin okꞌele ex chin wuyile cyiꞌj ke witz ex cyiꞌj ke chkꞌajlaj jatum in che waꞌntok wacẍ, porque ya mintiꞌ alumaj cyuj ex misicyer xjal in bet cyuj; ya mintiꞌ in che binjtz alumaj in che muyin; cyucꞌix ke chyuꞌj ex ke txcup ma che ex ok.
11 Nok ttxꞌakan tnam Jerusalén cyjel buyeꞌ wuꞌne ex te cynajbil wech cꞌoquel; misicyer jun tiꞌxti cyjel ten cyuj ke tnam ateꞌ tuj txꞌotxꞌ Judá wuꞌne, ex mintiꞌ xjal cyjel ten cyuj.
12 ¿Alcye jun at nimxix tnabl tuꞌn tel tnicꞌ tiꞌj jlu? ¿Al e ma txi tyecꞌun Kman jlu tuꞌn tbant tchicꞌbante cye mastl? ¿Tikuꞌn ma naj txꞌotxꞌ ex ma tzꞌoc ic tzaꞌn jun tzkij txꞌotxꞌ jatum misicyer jun in bet tuj?
13 Atzunte Kman tzaj ttzakꞌweꞌn: Ma binchet tcyakil jlu porque ma cyaj cycolin aj Israel nleye, aju xi nkꞌoꞌne cye; mintiꞌ ma chinx cyniman ex mintiꞌ ma japun nleye cyuꞌn. 14 Nok oꞌcx ma cybincha aju cyex cyajbil ex ma che cꞌulun cywitz ke tilbilal Baal, ic tzaꞌn e tzaj xnakꞌtzaꞌn cyuꞌn cyman. 15 Cyjaꞌtzun, akine Dios aju Tajaw Tcyakil ex Cydios aj Israel in xi nmaꞌne jlu: Cxel nkꞌoꞌne cywa puro cꞌa ex cxel nkꞌoꞌne cycꞌa aꞌ xiꞌyni venen tuj. 16 Che bajel nsputune cyuj ke nasyon mintiꞌ ojtzkiꞌn cyuꞌn mi cyuꞌn ke cyman, ex che xel nsamaꞌne ke soldad kꞌojlel cyiꞌj ocxi cycub baj cycyakil.
In che okꞌ xjal tuꞌn taꞌw cybis tuj Jerusalén
17 Ate Kman aju Tajaw Tcyakil in tmaꞌn: Cykꞌontz cywiꞌye tiꞌj jlu, cytxcontze ke xuꞌj oꞌcx cyakꞌun tuꞌn cyoc ten okꞌel, tuꞌn cyul nej; cyiꞌntze keju mejor che okꞌ.
18 Ax toc, e cytzaj naj tuꞌn cyoc ten okꞌel kiꞌj; e tel nim taꞌl kwitz cyuꞌn ex e tbaj noj ttxoꞌw kwitz tuꞌn taꞌl kwitz. 19 In binjtz tkꞌajkꞌajel okꞌel tuj tnam Sión: Ay, ma ko naj. Nim kchꞌixwi ma tzaj. Il tiꞌj tuꞌn tcyaj kcolin ktanmi porque ma che baj naj ke kja, che chi xjal.
20 Akeye xuꞌj, cybintze aju tyol Kman, cykꞌontz cywiꞌye tiꞌj ju in tmaꞌn: Cyxnakꞌtzanxe ke cyale xuꞌj tuꞌn tbant cyokꞌ, atzun cye ke cyucꞌile xuꞌj tuꞌn cywuyin. 21 Porque ma tzꞌocx camic ttzi tventanil kja ex ma tzꞌocpun tuj knajbil, tuꞌn cybaj naj ke cꞌwaꞌl ateꞌ cyuj cay ex ke cuꞌxun ateꞌ cyuj plas. 22 Aju cyximlal cyimni ma che cyaj paleꞌ ic tzaꞌn cytxaꞌ alumaj tuj cojbil, ex ic tzaꞌn junjun cheꞌl triw in cyaj tzꞌak tuꞌnju chmolte, ex mi aꞌl jun in jaw scꞌonte. A Kman in kꞌmante jlu.
23 Chi Kman: Miꞌn jaw tniman tib ju xjal at nabl, tuꞌnju at tnabl, mi ju at nim tipun tuꞌnju at nim tipun, ex mi ju kꞌinun tuꞌnju at tkꞌinumabl. 24 Ka at jun taj tuꞌn tjaw tniman tib, e tjaw tniman tib tuꞌnju ojtzkiꞌn kine tuꞌn ex ma tzꞌel tnicꞌ wiꞌje, ka akine Dios in nbinchaꞌne tcyakil tuꞌn ncꞌujlalile, tuj tumelxix ex tzꞌaklxix, porque atzun jlu in chin tzalaje tiꞌj. Akine Dios in chin kꞌmante jlu.
25 Akine Dios in chin kꞌmante jlu: Tzul tkꞌijlalil tuꞌn tcub cycastiw wuꞌne cycyakil keju sircunsidarimaj ke ex keju mya sircunsidarimaj, 26 ic tzaꞌn ke aj Ejipt, aj Judá, aj Edom, aj Amón, aj Moab, ex cycyakil keju najl tuj tzkij txꞌotxꞌ ex nneꞌl cymatzoꞌn ttzmal cywiꞌ ttxlaj cyẍcyin, porque cycyakil nasyon lu, mya sircunsidarimaj ke pero ax icx cycyakil aj Israel mer ic tzaꞌn mya sircunsidarimaj ke, porque mintiꞌ ma japun cyuꞌn aju yol cyaj bant tiꞌj wuꞌne cyucꞌil.