8
Chi Kman in tmaꞌn cyjaꞌ: Tuj tkꞌijlalil tzul cꞌeletz kꞌiꞌn cybakil ktzan cyrey aj Judá tuj cymukbil, tucꞌix cybakil ke nejenel, cybakil ke pal, cybakil ke t-sanjel Dios ex cybakil cycyakil xjal e ankꞌin tuj Jerusalén. 2 Ex che cyjel cypalbaꞌn tiꞌj tkan kꞌij, tiꞌj tkan xjaw ex tiꞌj tkan cheꞌw, porque cyiꞌjtzun ke jlu e tzalaj, e ajben cye, e oc lpeꞌ cyiꞌj, e oc ten kanil cyxjel cye, ex e cꞌulun cywitz. Mi jun cjawil kꞌinte cybakil tuꞌn cycuꞌx makuꞌn juntl maj, ax che cyjel ten twitz txꞌotxꞌ ic tzaꞌn cytxaꞌ alumaj. 3 Cycyakil aj Judá puro mya baꞌn ke, akeju otok che cyaj ankꞌin tuj nok alcyex lugar jatum otok che pon nsputune, mas oc cyajbe tuꞌn cycyim twitzju tuꞌn cyankꞌintl. Akine Dios Tajaw Tcyakil in chin kꞌmante jlu.Cub cycastiw aj Israel tuꞌnju cyaj cycolin tuꞌn cycꞌulun te Dios
4 Aya Jeremías, kꞌmanxa cye xjal cyjaꞌ: Chi Kman in tmaꞌn: Ka at jun ma jaw tzꞌak, ¿myape jurat naj in jaw weꞌ? Ka at jun nneꞌl tzpet tiꞌj tbe, ¿myape jurat naj nnaꞌjtz meltzꞌaj tuꞌn tcnet be tuꞌn? 5 Cyjaꞌtzun, ¿tikuꞌn ma chin cyaj cycoline? ¿Tikuꞌn te jumajx ma tzꞌel cypaꞌn cyibe wiꞌje akeye aj Jerusalén? Cucx in che nicꞌane yol nwitze ex cycꞌiꞌye tuꞌn cyajtz meltzꞌaje wucꞌile. 6 O chin cub txuleꞌye bilte, pero mintiꞌ o nbiye jun xjal in yolin tuj tumelxix, mi aꞌl jun nnaꞌjtz tiꞌj tanmi tuꞌn miꞌn tbinchante mya baꞌn, ex ka tuꞌn ttzaj tmaꞌn ¿titzun o nbinchaye? chiwt. Cycyakil in xi cyiꞌn cyex cybe, ic cyten ic tzaꞌn ke chej in che ojkelan tuj kꞌoj. 7 Ke xulen baꞌn cyuꞌn jtoj tuꞌn cyxiꞌ tuj juntl lugar ex jtoj tuꞌn cyajtz meltzꞌaj. Ke wilwil, ke xtxꞌaꞌyil ex ke garza baꞌn cyuꞌn jtoj baꞌn cyxiꞌ tuj juntl lugar, atzun cyeye, akeye xjal etzan wuꞌne, mintiꞌ ojtzkiꞌn ke nleye cyuꞌne. 8 ¿Tzaꞌn tten in xi cymaꞌne: At knable ex at tley Kman kucꞌile? Ex quina ma cub cytzꞌiban aj tzꞌibal nicꞌaj yol ex ma chꞌexpet ley cyuꞌn. 9 Pero ke xjal lu at cynabl, ctzajel cychꞌixwi, ctzajel t-xobil cyiꞌj ex che xel kꞌiꞌn pres. ¿Jatumtzun taꞌ ka at cynabl tuꞌnju ma tzꞌel cyicꞌun nyole? 10 Cyjaꞌtzun cxel nkꞌoꞌne cyxuꞌjil cye juntl xinak, ex junxitl cꞌoquel te tajwil cytxꞌotxꞌ, porque cycyakil xjal oꞌcx toc cycꞌuꞌj tiꞌj tuꞌn tcnet cykꞌinumabl mya tuj tumel; tzaꞌnx ke t-sanjel Dios ax icx ke pal, cycyakil in che sbun. 11 Nok chꞌin remey nnoꞌc cykꞌoꞌn tiꞌj ẍil toc cyiꞌj ke xjal etzan wuꞌne, ex in cymaꞌn ka tcyakil baꞌn taꞌ ex mya baꞌn taꞌ. 12 ¿Ope tzaj cychꞌixwi tiꞌj cybinchben mya baꞌn? Mintiꞌ tzaj cychꞌixwi, mintiꞌ o japun cycyakal tuꞌn tlaj cychꞌixwi. Cyjaꞌtzun oc tcub cycastiw wuꞌne, che bel tzꞌak ex che najel ic tzaꞌn ma che naj txkan. Akine Dios in chin kꞌmante jlu.
13 Chi Kman: Che bajel naj wuꞌne, mi jun twitz uva tuꞌn tcyaj ten twiꞌ tkan ex mi jun twitz higo tuꞌn tcyaj ten, ex ctzkijel cyxak. Tcyakilju o txi nkꞌoꞌne cye, cꞌelel kꞌiꞌn.
14 Atzun ke xjal oc cymaꞌ: ¿Tikuꞌn cucx tcub kyoꞌn tzalu? Koꞌ ke kcyakil cyuj ke tnam toc muro cyiꞌj tuꞌntzun kcyim ma chixin, porque ma bant tiꞌj tuꞌn Kman aju Kdios tuꞌn kcyim; ma tzaj tkꞌoꞌn aꞌ te kcꞌa xiꞌyni venen tuj, tuꞌnju ma ko binchan il twitz. 15 Ma ko ayon tiꞌj tuꞌn kten tuj txubtxaj ex mintiꞌ jun baꞌn ma kcꞌam, ma ko ayon tiꞌj tuꞌn kbanix ex nok xobajil ma tzaj kiꞌj. 16 Lu ke aj kꞌoj cyjaꞌ cytzaj, ma binjtz tkꞌajkꞌajel cywiꞌ ke chej in che xejin max tuj tnam Dan. Oc in che jaw wijin ke cychej, biꞌx in tzaj luꞌlun tcyakil txꞌotxꞌ cyuꞌn. Che ul xitul ktanmi tucꞌix tcyakilju at tuj, che bajel xitj ke tnam ex che najel ke xjal najl cyuj, che chi.
17 Chi Kman cyjaꞌ: Che xel nsamaꞌne lobaj cyiꞌje, akeju in che cyim naj xjal cyuꞌn, ex ake jlu mlay bant cyxmoxinjtz cyuꞌn xjal at cynabl tuꞌn cyxmoxin lobaj; che oquel tzokpaj cyiꞌje ex che oquel txꞌaꞌne cyuꞌn.
Tzaj taꞌw tuj tanmi Jeremías tuꞌn tlaj ju in baj cyiꞌj t-xjalil
18 Aju taꞌw tzaj wiꞌje mintiꞌ kꞌanbil tiꞌj ex ma baj tipun wanmiye. 19 Cyuj cycyakil tnam in binjtz in che schꞌin ke nxjalile tuꞌn cꞌixcꞌoj. ¿Mi aꞌlpetzun Kman at tuj tnam Sión? ¿Myapetzun a taꞌ cyrey? Che chi. Atzunte Kman in tzaj ttzakꞌweꞌn: ¿Tikuꞌn ma cybincha tuꞌn ttzaj nkꞌoje cyiꞌj, tuꞌnju in che cꞌulun cywitz ke tilbilal cydios xjal te junxitl tnam, akeju mintiꞌ cyajben? Chi Dios. 20 Ma baj tkꞌijlalil coresma ex ma baj tkꞌijlalil tuꞌn tjaw chmet twitz awal, atzun ke naꞌnx kclet. 21 Tuꞌnju nim yajbil nnicꞌx cyuꞌn nxjalile, ax icx weye nim nnicꞌx wuꞌne, ma tzaj bis wiꞌje ex xobajil. 22 ¿Mintiꞌpelo jun kꞌanbil at tuj Galaad? ¿Mintiꞌpelo jun xjal baꞌn kꞌanan ma chixin? ¿Tikuꞌntzun mintiꞌ ma che banix ke nxjalile? Chi Jeremías.