5 Ka ax toc ma chꞌexpet cymodiye ex cybinchbene, ka ma che oque tzꞌaklxix jun tucꞌil juntl, 6 ka mi ma che oc tene yajlal cye stranjer xjal, ex ke cꞌwaꞌl mintiꞌ cyman ex cytxuꞌ, ex ke meba xuꞌj, ex ka miꞌn ma cub cybyoꞌne ke xjal mintiꞌ cyil tuj lugar lu, ex ka miꞌn ma che cꞌulune cywitz junxitl dios aju ctzajel mya baꞌn cyibaje tuꞌn cylaj, 7 octzun che cyjel nkꞌoꞌne tuꞌn cucx cyankꞌintle twitz txꞌotxꞌ lu, aju xi nkꞌoꞌne cye ktzan cyxeꞌchele te jumajx.

8 Nim in keꞌ cycꞌuꞌje cyiꞌj ke yol te sbubl, akeju mintiꞌ cyajben. 9 In che elkꞌane, in che byone xjal, in cybinchaꞌne aj pajil, in xi cymaꞌne jun yol ax toc twitz Kman pero nok tten cyuꞌne, in cub cypatune storac twitz Baal, ex in che cꞌulune cywitz junxitl dios mintiꞌ ojtzkin cyuꞌne, 10 ex te tibajxi in che ule tuj njaye lu, aju oꞌcx at tajben te cꞌulbil weye, ex in cymaꞌne: Mintiꞌ bis kiꞌje, baꞌn tuꞌn kbinchanteye nok alcye kajbile. 11 ¿Apetzun tajben njaye te tja elekꞌ tuj cywitze? Ma wile tcyakilju in cybinchaꞌne. Akine Dios in chin kꞌmante jlu. 12 Cyxiꞌye tuj Silo, aju tnejel lugar jaw nscꞌoꞌne tuꞌn ttzaj naꞌn nbiye tuj, bixtzun cyile ti o baj tiꞌj wuꞌne tuꞌn tlaj cybinchben aj Israel mya baꞌn, akeju etzan wuꞌne. 13 Chi Kman in tmaꞌn: Masque elaꞌxi maj txi nmaꞌne cyeye tiꞌj cytene mya baꞌn, pero mintiꞌ in chinx cynimane; in chin txocone cyiꞌje, pero mintiꞌx in chin tzaj cytzakꞌweꞌne. 14 Cyjaꞌtzun, aju o bant wuꞌne tiꞌj lugar Silo, axtzun cbantel wuꞌne tiꞌj ju ja lu, aju paꞌmaj oꞌcx tuꞌn tajben te cꞌulbil weye, aju xi nkꞌoꞌne cyeye ex cye ke cyxeꞌchele, ex aju kꞌukl cycꞌuꞌje tiꞌj. 15 Che icꞌel nlajoꞌne nwitze ic tzaꞌn e jicꞌ nlajoꞌne ke cyermaniye, ke tiyjil Efraín.

16 Chi Kman tzaj tmaꞌn te Jeremías: Miꞌn naꞌna Dios tiꞌj tnam lu, miꞌn cubsana nwitze ex miꞌn tzaj yolina weye cyiꞌj. Miꞌn cucx tzaj tkanina weye, porque mlay tzaj nbiꞌntle. 17 ¿Mintiꞌpetzun nnoꞌc tqueꞌyina aju in cybinchaꞌn aj Judá cyuj cytanmi ex cyuj cay te Jerusalén? 18 Ke cycꞌwaꞌl in che chmon siꞌ, ke mambaj in cub cykꞌoꞌn kꞌakꞌ ex ke xuꞌj in che xyokꞌin tkꞌotjil pan, tuꞌn t-xi cykꞌoꞌn pan te cydios aju toc tbi “Xuꞌj Rey te Tuj Cyaꞌj”, ex in xi cykꞌoꞌn vin te oyaj cye junxitl dios, nok tuꞌn ttzaj nkꞌoje cyiꞌj. 19 Baka wiꞌje in cybinchaꞌn mya baꞌn, cyiꞌjx in cybinchaꞌn mya baꞌn lu, cyuꞌnx in cub cykꞌoꞌn cychꞌixwi. Akine Dios in chin kꞌmante jlu. 20 Tuꞌntzun jlu tzul nim ntxꞌuꞌjile tiꞌj lugar lu ex cyibaj ke xjal, ax icx cyiꞌj ke alumaj, cyiꞌj ke tzeꞌ ateꞌ tuj cojbil ex tiꞌj awal. Ic cꞌoquel nkꞌoje ic tzaꞌn jun kꞌakꞌ mlay yupj. Akine Dios in chin kꞌmante jlu.

21 Ate Kman aju Tajaw Tcyakil, aju Cydios aj Israel in tmaꞌn cyjaꞌ: Cypatun cube nok jteꞌx alumaj cyaje ex nok jteꞌx chojbil, ex cychyoꞌnxe cychibjal. 22 Tej cyetz wiꞌne ke cyxeꞌchele tuj Ejipt mintiꞌ xi nmaꞌne cye tuꞌn tcub cypatun alumaj tibaj altar, ex mi tuꞌn ttzaj cykꞌoꞌn chojbil weye. 23 Aju weye xi nmaꞌne cye, tuꞌn tbant cyniman weye tuꞌntzun woque te Cydios, atzun cye tuꞌn cyoc te jun tnam etzan wuꞌne. Ax icx xi nmaꞌne cye tuꞌn tjapun cyuꞌn aju xi nmaꞌne, tuꞌntzun tel baꞌn te cye. 24 Pero mintiꞌ e niman weye ex mintiꞌ tzaj cykꞌoꞌn cywiꞌ tiꞌj nyole. Nok oꞌcx o cybincha mya baꞌn tuꞌnju puro cyuw cyanmi. Mintiꞌ e ajtz meltzꞌaj wucꞌile, nok ttzal cyiꞌj ajtz cykꞌoꞌn nwitze. 25 Atxix tej cyetz ke cyxeꞌchele tuj Ejipt, ax icx jaꞌlo, cucx ma che tzaj nsamaꞌne ke nmajene cyucꞌil, akeju nsanjele. 26 Atzun cye mintiꞌ ma chinx cyniman ex mintiꞌ ma tzaj cykꞌoꞌn cywiꞌ tiꞌj nyole, nok oꞌcx ma cub cycyuwsaꞌn cyanmi, mas nim mya baꞌn ma cybincha ic tzaꞌn cybincha ktzan cyxeꞌchel.

27 Kꞌmanxa tcyakil jlu cye masque miꞌn tzaj cykꞌoꞌn cywiꞌ tiꞌja; che txcontza masque miꞌn tzaj tzakꞌweꞌna cyuꞌn. 28 Kꞌmanxa cye: Atzun ke xjal lu miban che niman te Kman aju Cydios, ex miꞌn cyaj tuꞌn cycawinjtz. Te jumajx ma tzicꞌ tnaꞌl cyuꞌn tuꞌn cyyolin ax toc.

29 Akeye aj Jerusalén, cymatzoꞌn el ttzmal cywiꞌye ex cyxoꞌmixe. Cybitzanxe jun bitz bisbajil cywiꞌ ke tal witz tzꞌlaꞌj cyiꞌj, porque in kꞌojl Kman cyiꞌje, ma che cyaj coline ex ma che el icꞌune tuꞌn.

30 Chi Kman in tmaꞌn: Ma cybincha aj Judá mya baꞌn nwitze, ma tzꞌocx cykꞌoꞌn ke tilbilal mastl dios puro icꞌbil ke tuj ja oꞌcx at tuꞌn tajben te cꞌulbil weye, ex ma tzꞌoc cykꞌoꞌn njaye xjan te mintiꞌ tajben. 31 Ma jaw cybinchaꞌn jun altar Tofet tbi tuj chkꞌajlaj Ben-hinom, tuꞌn tcub cypatun ke tal cycyꞌajal ex ke tal cymeꞌjel; a jlu mintiꞌ o txi nmaꞌne cye tuꞌn tbant cyuꞌn ex mintiꞌlpe ul tuj nximbetze icju. 32 Cyjaꞌtzun chi Kman: Tzul tkꞌijlalil tuꞌn miꞌntl toc kꞌmaꞌn Tofet tbi ju lugar lu ex mi lugar Ben-hinom, nok oꞌcx Chkꞌajlaj te Biybil cꞌoquel tbi. Ex ax tuj lugar Tofet che belex makut ke cyimni tuꞌn tlaj mintiꞌ juntl lugar. 33 Aju cyximlal ke cyimni lu cꞌajbel te cychiꞌ cꞌutz ex te cychiꞌ txcup, ex mi aꞌl jun cxel secꞌpunte cye tiꞌj cychiꞌ. 34 Biꞌx che bel naj ke bitz te icꞌsbil kꞌij wuꞌne cyuj ke tnam ateꞌ tuj Judá ex cyuj ke cay te Jerusalén, cyucꞌix ke bitz te tzalajbil ex ke bitz te casamyent; enter tnam cyjel ten mer ic tzaꞌn jun tzkij txꞌotxꞌ mintiꞌ xjal tuj.