Tej tbaj cytxolban cyib aj kꞌoj tiꞌj tnam Jerusalén
6
Cyex oke tuj Jerusalén akeye aj Benjamín, ex cyjyome jun lugar jatum tuꞌn cyclete. Cykꞌajtzanque chun tuj tnam Tecoa, cyyecꞌun jawe jun techal tuj Bet-haquerem, porque at jun mya baꞌn ex jun matij xitbil ctzajel tuj txꞌotxꞌ tuj tbankꞌab kꞌij. 2 Tbanilxix queꞌyin aju tnam Sión, pero cbel nxitune. 3 Che ul ke rey cyucꞌix ke cysoldad kꞌojlel tiꞌj, cbel cykꞌoꞌn cyja xbalun ja tiꞌjele tnam, ex teyle junjun cbel ten nok jatum taj. 4 Che chi aj kꞌoj in cymaꞌn: Kbincham kten tuꞌn koc tzokpaj kꞌojlel tiꞌj tnam lu. Chux keye, e koc tzokpaj cyiꞌj oc tpon chilcukꞌij, pero ya ma tzꞌoc kax ex niban koc yupj. 5 Cyjaꞌtzun, konicꞌan e koc tzokpaj tiꞌj ex e tbaj kxitun ke cyja maꞌ cywaꞌl te cycolbil cyib.6 Ate Kman aju Tajaw Tcyakil ma tzaj tmaꞌn cyjaꞌ: Cytxꞌemin jawe ke tzeꞌ ex cybinchaꞌn jawe cyxwetzbile tuꞌn cyoc tzokpaje tiꞌj tnam Jerusalén. Ya banin tiꞌj tuꞌn tcub tcastiw, porque tuj tnam lu nim mya baꞌn in cybinchaꞌn xjal cyiꞌj mastl. 7 Ic tzaꞌn jun twi aꞌ cucx in bet wen, ax icxtzun cucx in cybinchaꞌn xjal mya baꞌn tuj tnam Jerusalén; oꞌcx in binjtz tkanil tiꞌj in che elkꞌan xjal ex in cub cybyoꞌn cyucꞌil. Cucx in wile ẍil cyiꞌj xjal ex nim in che cꞌixbisanjtz. 8 Tzꞌelx cynicꞌe tiꞌj akeye aj Jerusalén, ka mintiꞌ ma txi cybiꞌne nyole, cꞌelel npaꞌn wibe cyiꞌje, ex aju cytanmiye cꞌoquel te jun tzkij txꞌotxꞌ mintiꞌ xjal cyjel ten tuj.
Tkanil castiw
9 Ate Kman aju Tajaw Tcyakil chi in tmaꞌn cyjaꞌ: Ke aj Israel otok che cyaj ten, che xel baj kꞌiꞌn tuj juntl tnam ic tzaꞌn in cuꞌtz sucwiꞌn twitz uva otok cyaj ten, tuꞌntzun mi jun tuꞌn tcyaj.
10 Atzun weye xi ntzakꞌweꞌne: Nman, ¿al e cxel nmaꞌne tkanil tuꞌntzun cybinte? Ka ma txi nmaꞌne tkanil cye, mer ic tzaꞌn lamoꞌn tuj cyẍcyin ex mlayx txi cybiꞌn; in che xmayin tiꞌj tyola ex mlayx che tzalaj tiꞌj. 11 Nimxix nkꞌoje ma tzaj cyiꞌj, ic tzaꞌn teya tkꞌoj. Ex mlay bant tuꞌn miꞌn t-xi nmaꞌne.
Chi Kman in tmaꞌn: Cxel nchitune nkꞌoje cyibaj ke cꞌwaꞌl ateꞌ tuj cay ex cyibaj ke cuꞌxun junx cychmon cyib. Ke chmilbaj che xel kꞌiꞌn pres cyucꞌix cyxuꞌjil, ax icx ke xjal ma che tijin wen. 12 Ke cyja tucꞌix cytxꞌotxꞌ ex ke cyxuꞌjil, junxitl cyajaw cꞌoquel, porque cbel nkꞌoꞌne cycastiw ke xjal najl tuj tnam lu, akine Dios in chin kꞌmante jlu. 13 Cycyakil xjal, tzaꞌnx keju maꞌ cyoclen ax icx keju chꞌin cyoclen, oꞌcx toc cycꞌuꞌj tiꞌj tuꞌn tcnet cykꞌinumabl mya tuj tumel, tzaꞌnx ke t-sanjel Dios ax icx ke pal, cycyakil baꞌn che sbun. 14 Nok chꞌin remey nnoꞌc cykꞌoꞌn cyiꞌj ke ẍil toc cyiꞌj ke xjal etzan wuꞌne, in cymaꞌn ka tcyakil baꞌn taꞌ ex mya baꞌn taꞌ. 15 ¿Ope tzaj cychꞌixwi tuꞌn tlaj cybinchben mya baꞌn? Mintiꞌ o tzaj cychꞌixwi, mintiꞌ in japun cycyakal tuꞌn tlaj cychꞌixwi. Cyjaꞌtzun, oc tcub cycastiw wuꞌne, che bel tzꞌak ex che najel ic tzaꞌn o che naj txkan. Akine Dios in chin kꞌmante jlu.
Mintiꞌ xi cyniman aj Israel tyol Dios
16 Chi Kman in tmaꞌn: Che weꞌcuye cyuj ke be ex cyqueꞌyinxe, cykaninxe jatum taꞌ ojtxi be, aju tbanil be; che bete tuj ex cnetel ojlabl cyuꞌne, chi Kman. Atzun cye in cymaꞌn: Miꞌn kaje tuꞌn kbete tuj.
17 E cub nkꞌoꞌne ke xkꞌukil tnam tuꞌn t-xi cymaꞌn cye xjal cyjaꞌ: Cybinxe tkꞌajkꞌajel chun te kꞌojbil. Atzun cye xjal cyma: Miꞌn, miꞌn kaje tuꞌn t-xi kbiꞌne.
18 Cyjaꞌtzun cybintze akeye nasyon, bix cybiye ti cbajel cyiꞌj ke xjal etzan wuꞌne. 19 Cybintze akeye xjal ateꞌ tuj tcyakil twitz txꞌotxꞌ: Tzul nsamaꞌne jun yajbil tibaj tnam lu, tuꞌnju ma cub cyximan tuꞌn cybinchante mya baꞌn, mintiꞌ ma txi cyniman nyole ex ma tzꞌel cyicꞌun ke nleye. 20 ¿Ti tajben weye aju storac in cub cypatune, tzajni tuj txꞌotxꞌ Sabá, tucꞌix juntl wik awal at nim tcꞌocꞌjal tzajni tuj juntl tnam najchak? Mintiꞌ in chin tzalaje tiꞌj cyoyaje in cub cypatune, ex mi tiꞌj chojbil in tzaj cykꞌoꞌne weye. 21 Tuꞌntzun jlu, chi Kman in tmaꞌn cyjaꞌ: Cbel nkꞌoꞌne jun tolsabl tuj tnam lu, tuꞌntzun cycub tzꞌak ke mambaj ex ke cꞌwaꞌlbaj tuj; ke vesin ex ke amiw, cycyakil che cymel.
Che tzajel xjal tuj txꞌotxꞌ tuj tbankꞌab kꞌij kꞌojlel tiꞌj tnam Jerusalén
22 Chi Kman in tmaꞌn: Max najchak, tuj txꞌotxꞌ tuj tbankꞌab kꞌij in bant tten tuꞌn ttzaj jun nasyon matijxix. 23 Ma bant cyten tucꞌil cyxobl plech ex cylans; puro jawnike, mintiꞌ chꞌin in tzaj kꞌakꞌan cycꞌuꞌj; aju tkꞌajkꞌajel cykan ic tten ic tzaꞌn tkꞌajkꞌajel mar in julin. Cyjaxsaꞌn ke cyibaj chej, ya txolin cyten tuꞌn cyoc tzokpaj kꞌojlel tiꞌj tnam Sión, chi Kman.
24 Che chi xjal tuj tnam Jerusalén cyjaꞌ: Ma kbiye tkanil ex ma tzꞌel bakchaj kkꞌabe, ma tzaj nim kbise ex ma knaꞌye taꞌw ic tzaꞌn jun xuꞌj nnuꞌl itzꞌj tal. 25 Miꞌn che exe tuj cojbil, miꞌn che bete cyuj ke be, porque ateꞌ aj kꞌoj kꞌiꞌn spad cyuꞌn, ex tuj tcyakil part at xobajil.
26 Akeye nxjalile, cykꞌoꞌnque cyxbalune chꞌiꞌx twitz te jun techal cybise, ex cybalkꞌinx cyibe tuj tzaꞌj, che bisune wen ex che okꞌe cyuwxix, ic tzaꞌn in cybinchaꞌne oc tcyim oꞌcxcu jun cycꞌwaꞌle, porque chꞌix tul naj aju cbel xitunte ktanmi.
27 Chi Kman tzaj tmaꞌn weye: Cxel nmaꞌne teya tuꞌn cyoc tkꞌoꞌna tuj malbil ke xjal etzan wuꞌne. Che tqueꞌyin baja tuꞌntzun tel tnicꞌa tiꞌj tzaꞌn in che bet. 28 Cycyakil xjal lu miban che bin; nok in che siꞌmin yol cyiꞌj xjal ex puro binchal mya baꞌn ke; ic cyten ic tzaꞌn kꞌan cꞌuxbil ex ic tzaꞌn cꞌuxbil, porque puro cyuw cyanmi. 29 In xupin xupbil kꞌakꞌ cyuw wen, aju in ajben cyuꞌn ke txꞌinol cuxbil, ex nok oꞌcx a plom in cub ulj tuꞌn kꞌakꞌ, mintiꞌ in cyaj ten tbanil sak pwak tjunalte, nokx gan nnoꞌcx kꞌot tuj kꞌakꞌ tuꞌn tel ttzꞌilil tiꞌj, porque mlayx tzꞌel baj ttzꞌilil. Ictzun ke xjal binchal mya baꞌn mlay che cub naj. 30 Cyjaꞌtzun cꞌoquel kꞌoꞌn cybi “Ttxꞌakan sak pwak mintiꞌ tajben” porque ma che el icꞌun tuꞌn Kman.