3 Nman Dios, aju teya in jyona tiꞌj atzun ke xjal in che yolin axix toc. Ma cub tkꞌoꞌna cycastiw, pero mintiꞌ ma cynaꞌ taꞌw, ma che naj tuꞌna, pero mintiꞌ ma tzꞌocx tuj cywiꞌ. Ke xjal lu mas cyuwxix cywiꞌ twitz jun abj, mintiꞌ ma tzꞌajtz tiꞌj cyanmi. 4 Atzun weye o nmaye: Akeju xjal lu meba ke ex mintiꞌ cynabl, mintiꞌ baꞌn cyuꞌn aju te Dios tajbil, ex mintiꞌ nneꞌl cynicꞌ tiꞌj alcye in tmaꞌn Cydios cye tuꞌn tbant cyuꞌn. 5 Chin xeꞌle cyucꞌil ke xjal maꞌ cyoclen ex chin yolile cyucꞌil, bay cye, baꞌn cyuꞌn alcye tajbil Kman, ex alcye in tmaꞌn Cydios cye, nchiye. Pero ax icx cye otok jaw cyiꞌn cyib tiꞌj Kman ex mintiꞌtok in che niman tyol. 6 Cyjaꞌtzun, che eletz ke balun tjakꞌ chcꞌul ex che bel byoꞌn ke xjal cyuꞌn, ex che bajel chyoꞌn cyuꞌn ke xoꞌj ateꞌ tuj tzkij txꞌotxꞌ, ex ke tigre che bel ten tiꞌjele cytanmi tuꞌn cyoc tzokpaj cyiꞌj, ex ka ma che etz xjal tiꞌjxi tnam, che bajel tzakin cyuꞌn, porque ma cybincha nimxix il, ex nim maj ma tzꞌel cypaꞌn cyib tiꞌj Kman.

7 Chi Kman in tmaꞌn: ¿Tzaꞌn tten tuꞌn tcub nnajsaꞌne tcyakil il ma cybincha aj Jerusalén? Porque ma chin cyaj coline cyuꞌn, ex oc t-xi cycyuwsaꞌn jun yol, in tzaj cynaꞌn cybi ke dios tiꞌj, akeju dios mya ax toc Dios ke. Xi nkꞌoꞌne tcyakilju in ajben cye, pero ma cybincha aj pajil ex nimcu cybaj in pon cychmon cyib tuj cyja ke xuꞌj jawni cywitz cyucꞌil xinak. 8 Ic cyten ic tzaꞌn ke cabay ulni cynabl in che wijin, cyaj tuꞌn cyoc ten tiꞌj t-xuꞌjil cyucꞌil. 9 ¿Miꞌnpetzun cub cycastiw wuꞌne tuꞌn tlaj jlu? ¿Miꞌnpetzun tzꞌaj nkꞌoꞌne t-xel cybinchben mya baꞌn? 10 E cytzaj ke aj kꞌoj; e cyocx tuꞌn tbaj naj tkan uva cyuꞌn, pero mya biꞌx tuꞌn tbaj naj tcyakil; e tel cyjetzꞌan ke tkꞌab porque mya weye ke. 11 Ke aj Israel ex aj Judá ma tzꞌel cypaꞌn cyib wiꞌje. Akine Dios in chin kꞌmante jlu.

12 Ke aj Israel ma che nicꞌan yol tiꞌj Kman, cyucꞌix aj Judá, ex ma cyma cyjaꞌ: Mlay tzaj tkꞌoꞌn Dios castiw kibaj, mlay tzaj jun mya baꞌn kiꞌj, mlay kil kꞌoj ex mlay tzaj weꞌyaj kiꞌj. 13 Ke t-sanjel Dios nok in che nicꞌan yol, mintiꞌ te Kman in yolin cyucꞌil, che chi xjal. 14 Cyjaꞌtzun, ate Dios aju Tajaw Tcyakil ma tma weye cyjaꞌ: Tuꞌnju ma cyma xjal yol lu, atzun jlu cbajel cyiꞌj: Cꞌoquex nkꞌoꞌne nyole tuj ttziꞌya tuꞌn toc ic tzaꞌn kꞌakꞌ, ex atzunju tnam lu cꞌoquel ic tzaꞌn siꞌ, ex cbajel tzꞌeꞌy tcyakil tuꞌn kꞌakꞌ. 15 Chi Kman in tmaꞌn: Akeye aj Israel, najchak ctzajel wiꞌne jun tnam kꞌojlel cyiꞌje, jun tnam nim tipun ex ojtxi tnam, in che yolin tiꞌj jun yol mintiꞌ baꞌn cyuꞌne ex mlay tzꞌel cynicꞌe tiꞌj. 16 Cycyakil ke jlu cyuw cycꞌuꞌj tuj kꞌoj ex nimxix cyipun ex nim xjal in che cyim cyuꞌn cyplech. 17 Cxel cywaꞌn cywaye tucꞌix twitz cyawale, che bel cybyoꞌn cycyꞌajale ex cymeꞌjele, cxel cychyoꞌn ke cyẍneꞌle ex ke cywacẍe, ex cxel cyloꞌn twitz cy-uvaye tucꞌix twitz cy-higoye. Cyuꞌn ke cymacbil in che ajben tuj kꞌoj che bel xitj ke tnam toc muro cyiꞌj, akeju nnoꞌc keꞌ cycꞌuꞌje cyiꞌj.

18 Chi Kman in tmaꞌn: Masque icju, pero tuj tkꞌijlalil lu mlay che naje cycyakile wuꞌne. 19 Octzun ttzaj cykanin teya: ¿Tikuꞌn ma tbincha Kman aju Kdios tcyakil jlu kiꞌj? ka che chi, atzun teya cxel ttzakꞌweꞌna cyjaꞌ: Tuꞌnju ma cyaj cycoline Kman ex ma che oc tene ajbel cye junxitl dios tzalu tuj cytanmiye, cyjaꞌtzun, ax icx cyeye che xeꞌle tuj juntl txꞌotxꞌ mintiꞌ ojtzkiꞌn cyuꞌne ex che ajbele cye stranjer xjal, chicuya cye, chi Dios te Jeremías.

20 Cykꞌmanxe jlu cye tiyjil Jacob ex cye aj Judá: 21 Cybintze jlu, akeye xjal mintiꞌ cynable ex mintiꞌ nneꞌl cynicꞌe tiꞌj: At tbakꞌ cywitze, pero mintiꞌ in cyile, at cyẍcyine, pero mintiꞌ in cybiꞌne. 22 Akine Dios cxel nmaꞌne jlu: ¿Tikuꞌn mintiꞌ in che xob chꞌine nwitze? ¿Tikuꞌn mintiꞌ in che tzaj luꞌlun chꞌine nwitze? Akine in cub kꞌonte txꞌotxꞌ ttziꞌyile mar tuꞌn toc te makbilte te jumajx, tuꞌn miꞌn toctz lakꞌeꞌ mastl masque in pulin wen ex in julin, pero mlay xcyeꞌ tiꞌj tuꞌn toctz lakꞌeꞌ mastl. 23 Aju cyanmiye puro cyuw ex miban che nimane, ma chin cyaj cycoline ex ma che el oke wiꞌje. 24 Mintiꞌ in che ximan chꞌine tiꞌj ex mintiꞌ in cymaꞌne: Knimanx Kman aju Kdios, porque a in tzaj kꞌoꞌnte jbal kibaj oc tpon tkꞌijlalil oc tcubil ex oc tjaw, ex tuꞌn in cyaj tkꞌijlalil tuꞌn tjaw chmet twitz awal, che chiwte. 25 Pero nok tuꞌn tlaj ju il o cybinchaye ma chꞌexpet tcyakil jlu, ex ma tzꞌel wiꞌne ncyꞌiwbile lu cyibaje. 26 Porque tuj tnam etzan wuꞌne at xjal mya baꞌn ke in che cub ten xkꞌukil tjakꞌ chcꞌul ic tzaꞌn ke tzyul chyuꞌj, in cub cykꞌoꞌn cꞌobil tuj be tuꞌn cytzyet xjal cyuꞌn. 27 Ic tzaꞌn in che chmet cyajlal chyuꞌj tuj cyja, icx ma noj tuj cyja tuꞌn nimcu cyelkꞌabtz. Cyjaꞌtzun ma che oc kꞌinun ex nim cyipumal, 28 ulni cynabl ex mejor cꞌaꞌchben cye, aju cybinchben mya baꞌn nimxix wen, mintiꞌ in xi cybinchaꞌn tiꞌj cyxtis ke cꞌwaꞌl mintiꞌ cyman ex cytxuꞌ, ex mintiꞌ in che colin cyiꞌj meba xjal. 29 ¿Miꞌnpetzun cub cycastiw wuꞌne tuꞌn tlaj jlu? ¿Miꞌnpetzun cub nkꞌoꞌne cycastiw xjal lu te t-xel cybinchben mya baꞌn? Akine Dios in chin kꞌmante jlu.

30 At jun xobajil ex jun plojxix in baj tuj tnam lu. 31 Ke xjal nnoꞌc cykꞌon cyib te t-sanjel Dios puro nicꞌaj yol in cymaꞌn, ke pal in che cawin cyibaj xjal in cybinchaꞌn aju cyex cyajbil, ex atzunju in che tzalaj xjal tiꞌj, akeju etzan wuꞌne. ¿Pero ti cbantel cyuꞌn oc tcub xitj tnam Jerusalén?