In tmaꞌn Kman cye aj Israel tuꞌn tajtz tiꞌj cyanmi
4
Chi Kman in tmaꞌn: Ka cyajbile tuꞌn cyajtz meltzꞌaje wucꞌile akeye aj Israel, baꞌn tuꞌn cyajtze. Ka ma tzꞌel cypaꞌn cyibe cyiꞌj ke tilbilal icꞌbilxix ex ka miꞌn tzꞌel cypaꞌntl cyibe wiꞌje, 2 ex ka ma txi cytziyane jun yol axix toc nwitze tuj tumelxix ex tzꞌaklxix, cꞌoqueltzun nbiye te cyꞌiwbil cye ke nasyon, ex cjawil cynimsaꞌn nbiye. 3 Chi Kman in tmaꞌn cye xjal tuj Judá ex tuj Jerusalén: Cykꞌuꞌn baje ke txꞌotxꞌ naꞌnx tbaj kꞌuꞌt ex miꞌn cub cyawaꞌn cyawale cyxol chꞌiꞌx.4 Akeye aj Judá ex aj Jerusalén, cysaksame tuj cyanmiye ex tzꞌelx cynicꞌe wiꞌje, ax toc akine Dios. Cykꞌoꞌncxe tuj cyanmiye aju techal tiꞌj ju yol cyaj bant tiꞌj wuꞌne cyucꞌile, porque tuꞌn tlaj cybinchbene mya baꞌn jacu tzaj nkꞌoje cyiꞌje, ex aju nkꞌoje ic tten ic tzaꞌn kꞌakꞌ, ex oc ttzaj, mi jun xjal jacu yupj tuꞌn.
Chꞌix cyoc tzokpaj aj kꞌoj cyiꞌj aj Judá
5 Cykꞌmanxe jlu tuj Jerusalén ex cyxol aj Judá, cykꞌajtzanque chun cyuj cycyakil tnam, cyxi kꞌajte cyiꞌj cyuwxix wen ex cykꞌmanxe cyjaꞌ: Chux keye, koꞌ ke, e toc kchmon kib, ko ocx cyuj ke tnam toc muro cyiꞌj. 6 Cyiꞌn jawe bander twitz cyaꞌj ex cyyecꞌunxe tumlal tnam Sión, cyel oke, miꞌn cub cyyoꞌne, porque tuj txꞌotxꞌ tuj tbankꞌab kꞌij ctzajel wiꞌne jun matij cꞌixbisabl ex jun matij xitbil cyibaje. 7 Ic tzaꞌn jun balun nneꞌtz tuj chcꞌul, ictzun ma tzꞌetz ju xitbil cye tnam; ya cyjaꞌ ttzaj tuj be; ma tzꞌetz tuj ttanmi tuꞌn tul xitul cytanmiye; che najel ke tnam tuꞌn ex mintiꞌ xjal cyjel ten cyuj. 8 Cyjaꞌtzun, cykꞌoꞌnque cyxbalune chꞌiꞌx twitz, che okꞌe ex che uxine tuꞌn taꞌw cꞌixcꞌoj, porque mintiꞌx tumel tuꞌn tchewix tkꞌoj Kman kiꞌj. 9 Chi Kman in tmaꞌn: Tuj kꞌij oc ttzaj jlu, ctzajel baj tcꞌuꞌj rey, icx ke nejenel; ctzajel t-xobil cyiꞌj ke pal ex biꞌx che secꞌpajtel keju nnoꞌc cykꞌoꞌn cyib te nsanjele. 10 Atzun weye xi nmaꞌne: Ay Nman, ¿tzaꞌn tten ma che cub t-sbuꞌna ke xjal aj Jerusalén? Xi tmaꞌna ka tuꞌn cyankꞌin tuj txubtxaj, ex atzun jaꞌlo banin tten spad cyiꞌj tuꞌn cycub byoꞌn. 11 Octzun tpon tkꞌijlalil jlu, cxel kꞌmet cye xjal aj Jerusalén: Cyjaꞌ ttzaj jun cykꞌikꞌ cyak wen tuj tzkij txꞌotxꞌ, ex ctzajel t-xupin cylugaril ke xjal etzan wuꞌne. Pero aju cykꞌikꞌ tzul mya aju in ajben te xupbil tuj triw; 12 aju cykꞌikꞌ tzul wuꞌne mas nimxix tipun twitzju in ajben te xupbil tuj triw. Cyjaꞌtzun cxel nmaꞌne cyjaꞌ: Jaꞌlo tzul jwisi cyibaj wuꞌne.
Baj cytxolban cyib aj kꞌoj cyiꞌj aj Israel
13 Cyqueꞌyinxe ke aj kꞌoj in bet cytzaj ic tzaꞌn jun muj; aju cycarwaj te cykꞌojbil ic cyten ic tzaꞌn jun xcyakinpaẍ, ex ke cychej masxix che ojkelan ic tzaꞌn ke tꞌiw in che lipan twitz cyaꞌj. Ay becꞌbil kwitz, ma ko najx. 14 Akeye aj Jerusalén, cytxꞌjome aju mya baꞌn tuj cyanmiye tuꞌntzun cyclete. ¿Jtoj ban tcyaj cycoline cyximbetze mya baꞌn? 15 Max tuj tnam Dan ex cywiꞌ ke tal witz tuj cytxꞌotxꞌ aj Efraín in tzaj tkanil mya baꞌn tzul cyibaje. 16 Cykꞌmanxe cye mastl nasyon ex cye aj Jerusalén cyjaꞌ: Tuj jun tnam najchak ma che tzaj aj kꞌoj lu, in che schꞌin wen tuꞌn cyoc tzokpaj kꞌojlel cyiꞌj ke tnam ateꞌ tuj Judá. 17 Ic tzaꞌn nnoꞌc cwentin jun cojbil cyuꞌn xjal, ictzun ma baj cytxolban cyib aj kꞌoj tiꞌjele Judá, porque ma jaw cyiꞌn cyib wiꞌje. Akine Dios in chin kꞌmante jlu. 18 Aju cymodiye ex aju cybinchbene atzunju ma tzaj kꞌinte mya baꞌn cyiꞌje jaꞌlo, aju cybinchbene mya baꞌn, atzunju ma tzaj kꞌinte mya baꞌn cyibaje, ic tzaꞌn jun cꞌabj cꞌa ma pon taꞌw tiꞌj cyanmiye.
Tzaj taꞌw tuj tanmi Jeremías cyiꞌj t-xjalil
19 In jaw nxkutzꞌin wibe tuꞌn taꞌw cꞌixcꞌoj. Ma tzaj taꞌw tuj wanmiye tuꞌn bis, in putin wanmiye ex mlay chin kꞌajene tuꞌn t-xi nmaꞌne aju ma nbiye. Ma nbiye tkꞌajkꞌajel chun ex tkꞌajkꞌajel cywi xjal in che kꞌojin. 20 Ma tzul tkanil tiꞌj nimcu mya baꞌn ma tzaj; oc in baj jun in tzaj juntl, cycyakil tnam ya ma che cub baj xitj. Te jurat naj ma che cub xitj cyja ke njxalile ex ma che naj ke cyja xbalun ja. 21 ¿Jteꞌtzun kꞌijtl chin queꞌyile tiꞌj bander yobin twitz cyaꞌj cyuꞌn aj kꞌoj, ex tuꞌn t-xi nbiꞌne tkꞌajkꞌajel twi chun?
22 Chi Kman in tmaꞌn: Ke xjal etzan wuꞌne miban tzꞌocx tuj cywiꞌ, mintiꞌ ojtzkiꞌn kine cyuꞌn. Ic cyten ic tzaꞌn ke cꞌwaꞌl mintiꞌ cynabl ex mintiꞌ nneꞌl cynicꞌ tiꞌj. Oꞌcx at cynabl tuꞌn tbant mya baꞌn cyuꞌn, atzunju baꞌn, mintiꞌ nneꞌl cynicꞌ tiꞌj tzaꞌn tten tuꞌn tbant.
O til Jeremías aju xitbil cyjaꞌtok ttzaj
23 Xi nqueꞌyine txꞌotxꞌ otok tzꞌoc te mintiꞌ ttxolil ex mintiꞌ at twitz, xi nqueꞌyine twitz cyaꞌj ex mintiꞌtok spicꞌun at twitz. 24 Xi nqueꞌyine ke nmak witz in che luꞌluntok ex cycyakil tal witz in che yucchtok. 25 Xi nqueꞌyine mintiꞌ jun xjal at ex cycyakil ke chyuꞌj otok che ex baj ok. 26 Xi nqueꞌyine ex aju tbanil txꞌotxꞌ otok tzꞌoc te tzkij txꞌotxꞌ, ex cycyakil tnam otok che cub baj xitj. Tcyakil jlu o naj tuꞌn tkꞌoj Kman xobajilxix.
27 Chi Kman in tmaꞌn: Cbajel naj aju at twitz txꞌotxꞌ lu, pero mlay cub nxitune tcyakil. 28 Cnojel twitz txꞌotxꞌ tuꞌn bis ex cꞌoquel klolj twitz cyaꞌj, porque atzun jlu o txi nmaꞌne, o cub nximane; mlay chꞌexpet nximbetze ex mlay tzicꞌx tiꞌj. 29 Oc tbinjtz tkꞌajkꞌajel cywi ke kꞌojlel cyjax cyibaj chej ex ke kꞌojlel xoꞌl plech, cycyakil xjal ateꞌ tuj tnam che elex ok, che xeꞌl ewal cyib tjakꞌ chcꞌul ex che jawix ewal cyib cyxol pic; cycyakil xjal cyjel cycolin cytanmi, mintiꞌ jun cyjel ten najal tuj.
30 Atzun teya tnam Jerusalén o cub xitja, ¿tikuꞌn nnoꞌc tkꞌoꞌna t-xbaluna tbanilxix cyak queꞌyin? ¿Tikuꞌn nnoꞌc tkꞌoꞌna adorn kꞌan pwak tiꞌja? ¿Tikuꞌn nnoꞌc tkꞌoꞌna tcꞌaꞌ twitza kꞌek queꞌyin? Nokx gan in baj tbinchan tiba, porque ke xinak in tzalaja cyiꞌj ma tzꞌel icꞌuna cyuꞌn, nok oꞌcx in che jyon tumel tzaꞌn tten tuꞌn tcub byoꞌna cyuꞌn. 31 In nbiꞌne tkꞌajkꞌajel cꞌixcꞌoj mer ic tzaꞌn tkꞌajkꞌajel twi jun xuꞌj oc nnuꞌl itzꞌj tnejel tal; a jlu tkꞌajkꞌajel cywi xjal aj Sión in che wuyin, nneꞌl cynukpiꞌn cykꞌab ex in cymaꞌn: Ay, becꞌbil kwitz, ma ko cub numj, ko bel byoꞌn cyuꞌn ke byol xjal.