El cypaꞌn cyib aj Israel tiꞌj Kman
3
Chi Kman in tmaꞌn: Ka at jun xinak ma cub tpaꞌn tib tucꞌil t-xuꞌjil ex ka ma mojeꞌ xuꞌj lu tucꞌil juntl xinak, ¿jacupe mojeꞌ juntl maj tnejel chmilbaj tucꞌil xuꞌj lu? ¿Myapetzun tuꞌn jlu jacu tzꞌilix cytanmiye? Akeye aj Israel, ma cnet nim cyyaẍe, ex atzun jaꞌlo ¿maj cyaje tuꞌn cyajtze juntl maj wucꞌile? Chi Kman. 2 Cyqueꞌyinxe cywiꞌ ke tal witz, ¿alcye jun lugar naꞌnx cyyaẍine tuj? Kꞌukl keye ttxlaj be ic tzaꞌn ke aj Árabe tuj tzkij txꞌotxꞌ in che ayon tiꞌj jun betin xjal tuꞌn tel cyelkꞌaꞌn aju at te, icxtzun cyeye e cub keꞌye tuꞌn cyayone cyiꞌj cyyaẍe. Ma baj cytzꞌilsaꞌne cytanmiye tuꞌnju yaẍbil in bant cyuꞌne ex tuꞌnju cybinchbene mya baꞌn. 3 Cyjaꞌtzun mintiꞌ ma tzaj jbal tuj tkꞌijlalil ttzi jbalil. Ic cytene ic tzaꞌn jun xuꞌj jawni twitz cyucꞌil xinak, ex mintiꞌ ma tzaj cychꞌixwiye. 4 Atzun jaꞌlo in cymaꞌne weye: Aya Kman, aya at kucꞌile atxix tuj kcuꞌxumale. 5 ¿Cucxpe ctzajel tloꞌch tcꞌuꞌja kiꞌje? ¿Te jumajxpe ctel tkꞌoja? Che chiye. Tej in cymaꞌntoke weye icju, lu keye cucx cybinchanteye tcyakil mya baꞌn.In tmaꞌn Kman tuꞌn tajtz tiꞌj cyanmi aj Israel ex aj Judá
6 Tuj tkꞌijlalil tej tten rey Josías tzaj tmaꞌn Kman weye: ¿Mape tila aju in cybinchaꞌn aj Israel? Ma tzꞌel cypaꞌn cyib wiꞌje. In cheꞌx cywiꞌ ke witz maꞌ cywaꞌl ex cyjakꞌ ke tzeꞌ nim cyxak, ex atzun in che yaẍin. 7 Tuj nximbetze kape che ajetz meltzꞌaj wucꞌile tbajlenxi cybinchaꞌn tcyakil jlu, pero mintiꞌ e ajtz meltzꞌaj. Ex e ilwaj cyuꞌn ke cyerman akeju aj Judá, akeju otok tzꞌel cypaꞌn cyib wiꞌje. 8 Ax icx o cyil aj Judá ka otok cub npaꞌn wibe cyucꞌil aj Israel ex otok che cyaj ncoline, nok tuꞌn tlaj el cypaꞌn cyib wiꞌje ex tuꞌn tlaj otok cybincha aj pajil. Pero ke aj Judá el cypaꞌn cyib wiꞌje ic tzaꞌn otok cybincha aj Israel akeju cyerman; mintiꞌ tzaj chꞌin cyxobil, ax icx cye cybincha aj pajil. 9 Tuꞌnju mintiꞌ ma tzaj cyxobil tiꞌj il in cybinchaꞌn, cyjaꞌtzun ma tzꞌilix cytanmi cyuꞌn; ma tzꞌel cypaꞌn cyib wiꞌje ex ma che oc ten cꞌulul cywitz ke tilbilal binchamaj cyiꞌj tzeꞌ ex abj. 10 Masque icju, ke aj Judá, akeju otok tzꞌel cypaꞌn cyib wiꞌje, mintiꞌ ma che ajtz meltzꞌaj wucꞌile tuꞌn tcyakil cyanmi; in cymaꞌn ka ma che ajtz meltzꞌaj wucꞌile, pero nok tten cyuꞌn. Akine Dios in chin kꞌmante jlu.
11 Tzaj tmaꞌn Kman weye: Masque ma tzꞌel cypaꞌn cyib aj Israel wiꞌje, pero mas chꞌin cye il ma cybincha cywitz aj Judá. 12 Chux txiꞌya ex kꞌmanxa tkanil lu tuj txꞌotxꞌ tuj tbankꞌab kꞌij: Cyajtz meltzꞌaje wucꞌile akeye aj Israel cypaꞌn cyibe wiꞌje. Mlay tzaj mastl nkꞌoje cyiꞌje, ex mya cucx chin kꞌojile cyiꞌje, porque at tkꞌakꞌbil ncꞌuꞌje. Akine Dios in chin kꞌmante jlu. 13 Tzꞌelx cynicꞌe tiꞌj ju mya baꞌn ma cybinchaye. Ma che oque miban che nimane weye, akine Cymane ex Cydiose, in che cꞌulune cywitz ke dios cye mastl nasyon cyjakꞌ cycyakil ke tzeꞌ nim cyxak, ex mintiꞌ ma txi cybiꞌne nyole. Akine Dios in chin kꞌmante jlu.
14 Chi Kman in tmaꞌn: Cyajtz meltzꞌaje wucꞌile akeye ncꞌwaꞌl miban che nimane, akine cyajwile. Ctzajel wiꞌne jun cyeye tuj teyle junjun tnam, ex cabca te junjun cꞌloj cyiyjile akeju at cyxilene cyucꞌil, ex che ajel meltzꞌaj wuꞌne tuꞌn cypon tuj tnam Sión. 15 Che oquel nkꞌoꞌne ke cawil cyxole, akeju in chin tzalaje cyiꞌj, ex atzun ke che cawil cyibaje tucꞌil nabl ex tucꞌil ojtzkibl. 16 Octzun tchmet cybaje tuj cytanmiye ex oc tchmet cybaj cycꞌwaꞌle, mi jun c-yolil juntl maj tiꞌj cax cꞌubl tley Dios, mi jun cximal tiꞌj, ex mi jun tzul naꞌnte te, ya mintiꞌtl tajben te cye, ex mlay cub cybinchaꞌn juntl acꞌaj. Akine Dios in chin kꞌmante jlu. 17 Ex aju tnam Jerusalén cꞌoquel tbi Tkꞌukbil Kman jatum in cawin, ex atzun cꞌoquel cychmon cyib cycyakil nasyon tuꞌn tjaw cynimsaꞌn nbiye, ex mlay che oc lpeꞌ tiꞌj cyex cyximbetz mya baꞌn. 18 Octzun tpon tkꞌijlalil lu, cꞌoquel cyjunin cyib aj Judá cyucꞌil aj Israel, ex junxtzun che ajetz meltzꞌaj tuj txꞌotxꞌ tuj tbankꞌab kꞌij, tuꞌn cypon tuj txꞌotxꞌ xi nkꞌoꞌne te cyetzbil ktzan cyxeꞌchel.
E cꞌulun aj Israel cywitz ke tilbilal
19 Akeye aj Israel, otok cub nximane tuꞌn cycꞌmete wuꞌne ic tzaꞌn ncꞌwaꞌle ex tuꞌn t-xi nkꞌoꞌne jun cytxꞌotxꞌe tbanilxix; aju txꞌotxꞌ lu mas tbanilxix twitz tcyakil mastl txꞌotxꞌ. Tuj nximbetze ka tuꞌn woc cykꞌoꞌne te cymane ex ka mintiꞌ tuꞌn tel cypaꞌn cyibe wiꞌje. 20 Pero ic tzaꞌn jun xuꞌj in cyaj tcolin tchmil ex in xi lpeꞌ tiꞌj juntl, cyjaꞌxtzun cyeye o chin cyaj cycoline. Akine Dios in chin kꞌmante jlu. 21 In binjtz tkꞌajkꞌajel cywi xjal cywiꞌ ke witz tzꞌlaꞌj cyiꞌj; atzun ke aj Israel in che okꞌ ex in che cubsan nwitze tuꞌnju ma che el tzpet tiꞌj be jikun tiꞌj ex ma tzicꞌ nnaꞌnjtze cyuꞌn, akine Cyman ex Cydios. 22 Cyajtz meltzꞌaje wucꞌile akeye ncꞌwaꞌl miban che nimane, jacu cub nnajsaꞌne cyile tuꞌntzun cyoque baꞌn che nimane.
Tzakꞌwebl cyuꞌn aj Israel te Kman
Che chi aj Israel cyma: Lu koꞌye lu, ma ko ule tucꞌila, porque aya Kmane aju Kdiose. 23 Mintiꞌ chꞌin tajben ke tuꞌn kxiꞌ cꞌulul cywitz ke tilbilal cywiꞌ ke tal witz, ex tuꞌn kjaw schꞌin cywiꞌ ke nmak witz; nok oꞌcx tucꞌil Kman aju Kdios jacu cnet colbil ke. 24 Tej matok cꞌwaꞌlx koꞌ, o kil nimcu at cyucꞌil ktzan kman: attok cyẍneꞌl, cywacẍ, cycyꞌajal, cymeꞌjel, pero tcyakil o baj naj tuꞌn cylaj ke tilbilal nnoꞌc kdiosin. 25 Kmansin cub kib jaꞌlo, ex e ttzaj kchꞌixwi, porque tej cꞌwaꞌlxtok koꞌ, icx jaꞌlo, in ko binchan il twitz Kman aju Kdios, ic tzaꞌn o cybincha ktzan kxeꞌchel, ex mintiꞌ in xi kniman tyol.