—Naꞌnx wuꞌne tej matok kꞌapojxtoka, oꞌcx wiꞌje toc tcꞌuꞌja tej tbant tiꞌj kyol tucꞌila; in tcꞌujlaya ex oc lpeꞌya wiꞌje tuj lugar tzkij txꞌotxꞌ, aju txꞌotxꞌ mintiꞌ nnoꞌc awal tuj.

3 Scꞌoꞌmaj Israel wuꞌne tuꞌn toc te weye, ex ic oc te weye ic tzaꞌn nej twitz awal. Ka at jun oc toc binchante mya baꞌn tiꞌj, in tzaj tcastiw wuꞌne ex in tzaj nsamaꞌne mya baꞌn tibaj.

4 Akeye tiyjil Jacob ex cycyakil cꞌloj aj Israel, cybinxe tyol Kman. 5 Chi Kman, in tmaꞌn cyeye:

—¿Alcye mya baꞌn cnet wiꞌje cyuꞌn ke cyxeꞌchele tej tel cypaꞌn cyib wiꞌje? E oc lpeꞌ cyiꞌj ke dios mintiꞌ cyajben, ax icx cye e oc te mintiꞌ cyajben. 6 Mintiꞌ e jyon wiꞌje masque akine in etz kꞌinte cye tuj Ejipt, ex e tzaj nẍakluꞌne tuj lugar tzkij txꞌotxꞌ nim tkan xak tuj, mintiꞌ aꞌ tuj, puro xobajilxix, mintiꞌ jun xjal najl tuj ex mintiꞌ jun in bet tuj. 7 Wuꞌne e ul wiꞌne tuj txꞌotxꞌ tbanil, tuꞌntzun cynicꞌbene tiꞌj twitz awal in tzaj tkꞌoꞌn, ex tuꞌn cyachine tiꞌj tcyakil tbanil at tuj. Pero tej cyule, ma tzꞌoc cykꞌoꞌne ntxꞌotxꞌe te mya baꞌn, ex tuꞌn tlaj il, ma tzꞌel wicꞌune ntxꞌotxꞌe etzan wuꞌne. 8 Ke pal mintiꞌ cyma: ¿Jatum taꞌ Kman? che chiwt; ex keju at nleye tuj cykꞌab, mintiꞌ ma tzꞌel cynicꞌ wiꞌje; ke nejenel mintiꞌ xi cyniman nyole, keju nnoꞌc cykꞌon cyib te nsanjele ma che pacban tiꞌj tbi Baal, ex ma che oc lpeꞌ cyiꞌj ke tilbilal mintiꞌ cyajben.

9 Cyjaꞌtzun akine Dios in chin kꞌmante jlu: Che oquele tuj xtis wuꞌne, cyucꞌix ke tal cychmane che ul itzꞌj te tibajxi. 10 Cyxiꞌye tuj txꞌotxꞌ Quitim ttziꞌyile mar ex cyqueꞌyin baje; cysamanxe jun xjal tuj txꞌotxꞌ Cedar, tuꞌn toc tkꞌoꞌn tcwent tiꞌj 11 ka at jun nasyon ma che baj tchꞌexpuꞌn ke tdios, masque mya ax toc dios ke. Atzun ke xjal etzan wuꞌne, nok tuꞌn cylaj ke dios mintiꞌ cyajben ma tzꞌel cypaꞌn cyib wiꞌje, akine Cydios maꞌxix woclene. 12 Aya cyaꞌj, tzajx t-xobil tiꞌja tuꞌn tlaj jlu, tzaj luꞌluna tuꞌn jun nintz xobajil. Akine Dios in chin kꞌmante jlu. 13 Ke xjal etzan wuꞌne cabe il ma cybincha: Ma tzꞌel cypaꞌn cyib wiꞌje, akine ic ntene ic tzaꞌn jun twiꞌ aꞌ itzꞌ, ex mer ic tzaꞌn ma baj cybinchaꞌn txkan jul tuꞌn tchmet aꞌ cyuj, pero mintiꞌ in ten aꞌ cyuj, jurat nnaꞌj tzkij tuꞌnju paꞌx ke.

14 Ke aj Israel mya majen ke, ex mya te majen mintiꞌ tzokpibl te ma che ul itzꞌj. ¿Tikuꞌntzun ma tzꞌel kꞌiꞌn tcyakilju at cye cyuꞌn aj kꞌoj? 15 ¿Tikuꞌntzun nnoꞌc kꞌoj cyiꞌj, mer ic tzaꞌn cyuꞌn balun in che tzanun cyuw wen? Aju cytxꞌotxꞌ ma baj naj, ke cytanmi ma che baj tzꞌeꞌy tuꞌn kꞌakꞌ, ex mi jun ma cyaj ten cyuj. 16 Ke xjal aj Menfis ex ke aj Tafnes ma tzꞌel baj cyiꞌn tcyakilju at cyeye. 17 Atzun jlu ma baj cyiꞌje tuꞌnju el cypaꞌn cyibe wiꞌje, akine Cymane aju Cydiose, ex atok kine ucꞌil cyeye tuj cybeye.

18 Atzun jaꞌlo, ¿ti cycambable tiꞌj tuꞌn cyxiꞌye tuj Ejipt ex tuꞌn cycꞌane aꞌ tuj nima Nilo? Ex ¿ti cycambable tiꞌj tuꞌn cyxiꞌye tuj Asiria tuꞌn cycꞌane aꞌ tuj nima Éufrates? 19 Ax cybinchbene mya baꞌn cbel kꞌonte cycastiwoye, ex tuꞌnju ma tzꞌel cypaꞌn cyibe wiꞌje cbel cysentense. Che ximane tiꞌj ex tzꞌelx cynicꞌe tiꞌj, nim mya baꞌn ex yajbil ma tzaj cyibaje tuꞌnju ma tzꞌel cypaꞌn cyibe wiꞌje, ex tuꞌnju mintiꞌ ma chinx cynimane, akine Cymane ex Cydiose. Akine Dios Tajaw tcyakil in chin kꞌmante jlu.

20 Ma bet-xi kꞌij tjawlen cyiꞌn cyibe wiꞌje, ma cub cyxcꞌayin cyibe tuꞌn miꞌn t-xi cynimane nyole ex ma cymaye: Miꞌn kaje tuꞌn kajbene teya, che chiye. Cyibaj cycyakil tal witz ex cyjakꞌ cycyakil tzeꞌ nim cyxak oꞌcx ma tzꞌoc baj cywiꞌye tiꞌj tuꞌn cycꞌulune cywitz junxitl dios, ic tzaꞌn jun xuꞌj jawni twitz cyucꞌil xinak. 21 Ic e oc nkꞌoꞌne ic tzaꞌn jun wiꞌ tkan uva tbanil, e cuꞌx wawaꞌne ic tzaꞌn tkan uva tzajni tiꞌj tbanil iyaj, pero ma baj cychꞌexpun cyibe, ex ic ma che oque ic tzaꞌn tkan uva at tuj cꞌul mintiꞌ tajben. 22 Masque tzꞌel cyjakuꞌn cyiꞌje tuꞌn taꞌl tzaꞌj ex masque tzꞌajben nim jabón cyuꞌne, pero tuj nwitze ttenx cyile, mlay tzꞌel txꞌjet. 23 ¿Tzaꞌn tten in cymaꞌne: Baka ma baj ktzꞌilsan kibe ex baka ma ko cꞌulune cywitz tilbilal Baal? Che ximane tiꞌj tzaꞌn tten e bete tuj chkꞌajlaj, cykꞌoꞌnque cwent tiꞌj tcyakilju o cybinchaye. Ic cytene ic tzaꞌn jun ttxu camey oc in pon t-sakch in bet ticꞌ tuj tcyakil part. 24 Ic cytene ic tzaꞌn jun ttxu bur te tjakꞌ cꞌul ax o chꞌiy tuj lugar mintiꞌ cynajbil xjal tuj, oc teꞌlel t-sakch mlay tzyet, in xi t-skoꞌn cykꞌikꞌ tuꞌn tcnet jun tman bur tuꞌn. Ka ma jyon jun tman chej tiꞌj, mya il tiꞌj tuꞌn t-sict, jurat in cnet tuꞌn porque otok tzꞌeꞌl t-sakch. 25 Akeye aj Israel, miꞌn cycꞌixbisaye cykane tuꞌnju in che ojkelane ocxi tbaj cyxajbiye toc, miꞌn cyakꞌe ambil tuꞌn ttzkij tuj cykule tuꞌnju in che jyone tiꞌj junxitl dios. Pero che chiye in cymaꞌne: Miꞌn, mlay txi knimane tyola; mas cꞌujlaꞌn ke junxitl dios kuꞌne ex ko xel lpeꞌye cyiꞌj, che chiye.

26 Ic tzaꞌn te elekꞌ in cub tchꞌixwi oc tel tuj kꞌanchaꞌl, icxtzun cbel cychꞌixwi cycyakil aj Israel, cyucꞌix ke cyrey, ke nejenel cye, ke pal ex ke nsanjele ateꞌ cyxol; 27 porque in cymaꞌn te jun piẍ tzeꞌ: Aya kmane, ex in cymaꞌn te jun abj: Aya ktxuꞌye. Atzun weye nok ttzal cyiꞌj in tzaj cykꞌoꞌn nwitze, pero oc in tzaj mya baꞌn cyiꞌj, jurat naj in tzaj cymaꞌn weye: Tzaja colol kiꞌje.

28 ¿Jatum ateꞌ ke cydiose e baj cybinchane? akeye aj Judá. E cytzaj ka jacu che clete cyuꞌn oc ttzaj mya baꞌn cyibaje. Nimcu cyajlal cydiose at. Ic tzaꞌn cyajlal cytanmiye, ictzun cyajlal cydiose. 29 ¿Tikuꞌn in che yoline mya baꞌn wiꞌje? Cycyakile miban che nimane weye. Akine Dios in chin kꞌmante jlu. 30 Nok gan cub cycastiwoye wuꞌne, mintiꞌ o tzꞌajben jlu te xnakꞌtzbil cyeye. E cub cybyoꞌne ke nsanjele ic tzaꞌn jun balun in baj ttzakun tcanb. 31 Akeye aj Israel ateꞌye tuj tkꞌijlalil jaꞌlo, cybintze nyole, akine Dios. ¿Icpetzun kine te cyeye ic tzaꞌn jun tzkij txꞌotxꞌ ex ka ic tzaꞌn jun lugar puro klolj tuj? Akeye xjal etzan wuꞌne, ¿tikuꞌn in cymaꞌne: Tzokpiꞌn koꞌye ex mlay ko aje juntl maj tucꞌila? Che chiye. 32 ¿Jacupe tzicꞌ tnaꞌl xmulkꞌabaj ex ka uwj tuꞌn jun xuꞌj, aju otok tcꞌam tuꞌn tchmil, tucꞌix t-xbalun tej tmojeꞌ? Atzun cyeye, akeye etzan wuꞌne, ma tzꞌel nim kꞌij ticꞌlen nnaꞌnjtze cyuꞌne.

33 Ojtzkimaj be cyuꞌne tuꞌn cyjyonteye junxitl cydiose. Ma che oque te xnakꞌtzal tiꞌj mya baꞌn. 34 Nojni tiꞌj cyxbalune tuꞌn cychcꞌel ke meba xjal ex tuꞌn cychcꞌel ke xjal mintiꞌ cypaltil, akeju mintiꞌ jun cyil o cnet cyuꞌne. 35 Ex masque in cybinchaꞌne tcyakil jlu, in cymaꞌne: Mintiꞌ ke kil ex mintiꞌ in kꞌojin Dios kucꞌile, che chiye. Che oquele tuj xjel wuꞌne tuꞌn tcub cycastiwoye, porque in cymaꞌne ka mintiꞌ cyile. 36 ¿Tikuꞌn jurat naj in chꞌexpaj cynable tuꞌnju nok jachak in cheꞌxe jyolte juntl colol cyiꞌje? Cꞌelel cychꞌixwiye cyuꞌn aj Ejipt, ic tzaꞌn el cychꞌixwiye cyuꞌn aj Asiria. 37 Che ajetz meltzꞌaje tuj Ejipt in che chꞌixwiye wen, porque akeju kꞌukl cycꞌuꞌje cyiꞌj icꞌun ke wuꞌne, ex mintiꞌ jun oc cycambaꞌye tuꞌnju kꞌukl cycꞌuꞌje cyiꞌj.