4 Xitzun tkꞌoꞌn rey orden te Hilcías aju tnejel pal, tucꞌix cye txkantl pal ex cye ke xkꞌukil ttzi tja Dios, tuꞌn tetz cyiꞌn tuj tja Dios cycyakil ke macbil in che ajbentok te cꞌulbil twitz Baal, twitz xuꞌj dios Asera, twitz kꞌij, twitz xjaw ex cywitz cycyakil ke cheꞌw. E cub tpatun cycyakil jlu tiꞌjxi tnam Jerusalén tuj cojbil, tuj lugar Cedrón, ex xi tiꞌn cytzaꞌjel max tuj Betel. 5 Te tibajxi el tiꞌn rey cyoclen ke pal, akeju otok che oc kꞌoꞌn cyuꞌn ke rey te Judá, tuꞌn tcub cypatun storac cyuj lugar jatum in che cꞌulun xjal cywiꞌ ke witz, cyuj ke tnam ateꞌ tuj tcwent Judá, cyucꞌix keju ateꞌ tiꞌjele tnam Jerusalén, ex el tiꞌn cyoclen ke pal in cub cypatun storac twitz tilbilal Baal, twitz kꞌij, twitz xjaw, ex cywitz cycyakil ke cheꞌw. 6 Etz tiꞌn tilbilal xuꞌj dios Asera tuj tja Kman, ex xi tiꞌn tiꞌjxi tnam Jerusalén, cub tpatun tuj tkꞌab xak Cedrón, tejxi tcub tzaꞌjix tuꞌn, ex xi tchitun ttzaꞌjil tibaj camposant te tnam. 7 Ax icx e baj t-xitun ke ja jatum najlke xinak in che oc ten tiꞌj juntl xinak, ex in cybinchaꞌn jlu te jun cꞌulbil te cydios tiꞌjele tja Kman, jatum in che chmon xuꞌj tiꞌj xbalun tuꞌn tajben te tilbilal xuꞌj dios Asera.

8 Te tibajxi xi tmaꞌn tuꞌn cytzaj cycyakil ke pal cyuj ke tnam at tuj Judá, ex e oc tkꞌoꞌn te mintiꞌ tajben tcyakil lugar cywiꞌ ke witz jatum in che cꞌulun xjal, tzajx keꞌ tuꞌn tuj tnam Geba ex pon baj max tuj Beerseba; cyujtzun ke lugar lu otok cub cypatun ke pal storac. Ax icx e baj tkꞌuchin ke altar jatum in che cꞌulun ke xjal cywitz tilbilal, akeju cycubsaꞌn ttzi tpwertil tnam aju otok baj tbinchaꞌn Josué aju gobernador te tnam, akeju cycubsaꞌn ttzi tpwertil tnam te cubni. 9 Pero ke pal in che ajbentok cyuj lugar jatum in che cꞌulun ke xjal cywiꞌ ke witz, mintiꞌ xi kꞌoꞌn ambil cye tuꞌn cypon lakꞌeꞌ jatum taꞌ altar te Kman tuj Jerusalén, nok oꞌcx xi kꞌoꞌn ambil cye tuꞌn cywaꞌn pan cyucꞌil mastl pal, aju pan mintiꞌ t-samel tuj tuꞌn tjaw mal tcꞌuꞌj.

10 Ax icx oc tkꞌoꞌn Josías te mintiꞌ tajben aju lugar Tofet tbi, aju in ajben te patbil xjal, aju tcubsaꞌn tuj chkꞌajlaj Ben-Hinom tbi, tuꞌntzun mi jun tuꞌn tcub tpatun tcyꞌajal ex ka tmeꞌjel te chojbil te dios Moloc. 11 Ex e jel tiꞌn ke chej paꞌmaj cyuꞌn ke rey te Judá tuꞌn cyajben te cꞌulbil te kꞌij, ex atzun cycubsaꞌntok ke chej lu nikayin ttzi tpwertil tja Kman, ttxlaj tnajbil xjal Natán-melec tbi, aju cwentil cye cwart ateꞌ tiꞌjele tja Kman; ex cub tpatun carwaj jatum tocx tilbilal kꞌij tuj. 12 Ax icx e cub t-xitun ke altar otok che jaw cybinchaꞌn ke rey te Judá twi tja rey Acaz, ex ke altar otok che jaw tbinchaꞌn Manasés ttxaꞌn tpeꞌn tja Kman; e baj tbuchin ex xi t-xoꞌcj ke ttxꞌakan tuj tkꞌab xak Cedrón.

13 Ax icx oc tkꞌoꞌn rey te mintiꞌ tajben ke lugar jatum in che cꞌulun ke xjal cywiꞌ ke witz; akeju cycubsaꞌn ttxlaj Jerusalén tuj tjawitz kꞌij, xiꞌyni te cubni tjakꞌxi ju witz te xitbil, akeju otok che baj tbinchaꞌn Salomón aju rey cye aj Israel, te cꞌulbil te tilbilal Astoret aju cydios aj Sidón; ex te cꞌulbil te Quemos aju cydios aj Moab; ex te cꞌulbil te Milcom aju cydios aj Amón; akeju tilbilal lu icꞌun ke tuꞌn Dios. 14 Ax icx e baj tbuchin ke tilbilal abj cytxꞌotxꞌil, ex ke tilbilal xuꞌj dios Asera tzeꞌ ke, ex baj tnojsaꞌn ke lugar lu tuꞌn cybakil cyimni, jatum cycubsaꞌntok ke tilbilal lu. 15 Atzunju altar tuj Betel, tucꞌix ju lugar jatum in che cꞌulun ke xjal twi witz, e baj t-xitun Josías tejxi cyoc tuꞌn ic tzaꞌn kuk ex e cub tpatun. Ake jlu otok che cub tbinchaꞌn Jeroboam aju tcyꞌajal Nabat, aju e binchan aj Israel il tuꞌn. Ax icx cub tpatun tilbilal xuꞌj dios Asera.

16 Aj tqueꞌyin Josías tiꞌjxi, ex tej ttil ke pantyón cycubsaꞌn tcꞌuꞌj witz, xi tmaꞌn tuꞌn cyetz kꞌiꞌn ke cybakil cyimni cyuj, ex e cub tpatun tibaj altar tuꞌn toc tkꞌoꞌn te mintiꞌ tajben. Cyjaꞌtzun tten o japun tyol Kman aju o kꞌmanjtz tuꞌn t-sanjel ojtxi, ka tuꞌn tjapun jlu.

17 Xitzun tkanin Josías:

—¿Al e pantyón ma wile ma chixin?

Atzun cye xinak te tnam xi cytzakꞌweꞌn:

—Tat Rey, atzun tpantyón t-sanjel Dios jlu, aju tzaj tuj Judá ex tzaj txꞌolbante ojtxi tiꞌj ju ma bant tuꞌna jaꞌlo tiꞌj altar tuj Betel.

18 Xitzun tmaꞌn Josías cye:

—E tten ic tzaꞌnx tten. Mi aꞌl jun tzꞌoc tkꞌoꞌn tkꞌab tiꞌj tbakil.

Cyjaꞌtzun tten cyaj clet tbakil, tucꞌix tbakil t-sanjel Dios tzaj tuj Samaria.

19 Atzun ke ja ateꞌ tuj Samaria, jatum in che cꞌulun ke xjal cywiꞌ ke witz, akeju otok che jaw binchaꞌn cyuꞌn ke rey cye aj Israel, biꞌx e baj t-xitun Josías, ic e tenba tuꞌn ic tzaꞌnx otok che tenba ke altar tuj Betel, porque nok tuꞌn cylaj ke jlu o tzaj nim tkꞌoj Kman cyiꞌj. 20 Te tibajxitzun jlu, e cub tbyoꞌn cycyakil ke pal cyibaj altar, akeju in che ajben cyuj ke lugar jatum in che cꞌulun ke xjal cywiꞌ ke witz, ex cyibaj ke altar lu e cub tpatun cybakil ke cyimni. Ajtztzun tuꞌn tul tuj Jerusalén.

21 Xi tkꞌoꞌn rey orden cye cycyakil aj Israel tuꞌn tcub cyicꞌsaꞌn Xjan Kꞌij te nimbilte Kman aju Cydios, ic tzaꞌnx tzꞌibamaj tuj libro tiꞌj ju yol cyaj bant tiꞌj tuꞌn Dios cyucꞌil. 22 Bajxtok cub icꞌsaꞌn jun Xjan Kꞌij ic tzaꞌn jlu, atxix tuj tkꞌijlalil tej cyten ke nejenel e cawin cyibaj aj Israel, mi tuj tcyakil tkꞌijlalil tej cyten ke rey te cawil cyibaj aj Israel ex cyibaj aj Judá. 23 Tuj twajxaklajin abkꞌi toclen Josías te rey tej tcub icꞌsaꞌn Xjan Kꞌij te nimbil te Kman tuj Jerusalén.

24 Ax icx e baj naj ke xjal tuꞌn Josías akeju baꞌn mañ cyuꞌn, cyucꞌix ke aj kꞌij, cyucꞌix ke cysant xjal tocx t-xe cyja, ex ke mastl tilbilal in che cꞌulun cywitz, cyucꞌix cycyakil ke macbil puro icꞌbil in che ajben tuj cycꞌulbil xjal tuj Judá ex tuj Jerusalén. O tbincha icju, tuꞌntzun tjapun aju ley tzꞌiban tuj libro aju cnet tuj tja Kman tuꞌn pal Hilcías. 25 Mi aꞌl juntl rey o pon ic tzaꞌn te Josías, mi tej naꞌnxtok toc te rey, mi te tibajxi, porque ate rey lu oc lpeꞌ tiꞌj Kman tuꞌn tcyakil tanmi, ex tuꞌn tcyakil tcꞌuꞌj, ex tuꞌn tcyakil tipumal, ic tzaꞌnx tzꞌibamaj tuj tley Moisés.

26 Pero mi tuꞌn icju, cucx o ten tkꞌoj Kman cyiꞌj, porque nimxix tkꞌoj otok tzaj cyiꞌj aj Judá, tuꞌn tlaj tcyakilju mya baꞌn tbincha Manasés, tuꞌnju otok tzꞌocx cyicꞌleꞌn Dios. 27 Cyjaꞌtzun o tma Kman: Che elex nlajone ke aj Judá tuꞌn miꞌn cytentl nwitze, ic tzaꞌn o nbinchaye cyiꞌj aj Israel, ex cꞌelel wicꞌune tnam Jerusalén aju scꞌoꞌmajtok wuꞌne, ex cꞌelel wicꞌune aju ja jatum otok nmaye cucx tuꞌn ttzaj naꞌn nbiye tuj.

28 Aju chꞌintl txꞌolbaben tiꞌj Josías, tucꞌix tcyakilju o tbincha, atzun tzꞌiban tuj uꞌj jatum taꞌ txꞌolbaben tiꞌj cybinchben ke rey te Judá. 29 Tuj tkꞌijlalil tej tten Josías te rey, at jun rey te Ejipt, Faraón Necao tbi, tzaj tuꞌn tpon ttzi nima Éufrates tuꞌn tonin tiꞌj rey te Asiria. Etztzun rey Josías tuꞌn tkꞌojin tiꞌj Necao; pero tej tqueꞌyinjtz tuꞌn Necao tuj tnam Meguido, cub byoꞌn Josías tuꞌn. 30 Ocxtzun kꞌoꞌn t-ximlal tuj jun carwaj cyuꞌn ke xjal maꞌ cyoclen ttxlaj, ex ajtz cyiꞌn tuj tnam Meguido tuꞌn tul tuj Jerusalén tuꞌn tocx cykꞌoꞌn tuj tpantyón. Atzun cye xjal tzaj cyiꞌn Joacaz aju tcyꞌajal Josías, ex oc cykꞌoꞌn toclen tuꞌn toc te rey te t-xel ktzan tman.

31 Toctok Joacaz twiꞌ 23 abkꞌi tej toc te rey, ex o cawin ox xjaw tuj Jerusalén. Aju ttxuꞌ Joacaz Hamutal tbi, aju aj Libna ex tmeꞌjel Jeremías. 32 Pero mya baꞌn e ela ke tbinchben tuj twitz Kman, ic tzaꞌnx cybinchben ktzan t-xeꞌchel. 33 Ocx presin Joacaz tuꞌn Faraón Necao tuj tnam Ribla tuj txꞌotxꞌ Hamat, tuꞌntzun miꞌn tcawin tuj Jerusalén, ex cub tkꞌoꞌn Necao jun chojenj cyibaj xjal te 75 quintal sak pwak ex 75 libr kꞌan pwak. 34 Oc tkꞌoꞌn Faraón Necao juntl tcyꞌajal Josías, aju Eliaquim tbi, te rey te t-xel ktzan tman, ex baj tchꞌexpun tbi, Joacim juntl tbi oc tkꞌoꞌn. Atzunte Joacaz xi kꞌiꞌn tuj Ejipt ex atzun cyim.

35 Xi tkꞌoꞌn Joacim sak pwak te Necao tucꞌix kꞌan pwak in tkanintok. Tuꞌntzun jlu cub tkꞌoꞌn jun chojenj cyibaj ke xjal najl tuj txꞌotxꞌ, ex teyle junjun xi tkꞌoꞌn sak pwak ex kꞌan pwak ic tzaꞌnxju at te, tuꞌntzun t-xi kꞌot te Faraón Necao.

36 Toctok Joacim twiꞌ 25 abkꞌi tej toc te rey, ex o cawin junlaj abkꞌi tuj Jerusalén. Aju ttxuꞌ Joacim Zebuda tbi, aju aj Ruma, ex tmeꞌjel Pedaías. 37 Pero mya baꞌn e ela ke tbinchben tuj twitz Kman, ic tzaꞌnx cybinchben ktzan t-xeꞌchel.