3 Tuj twajxaklajin abkꞌi ttzyetlen tcawin rey Josías, xi samaꞌn Safán tuꞌn tuj tja Kman. Ate Safán tcyꞌajal Azalías ex tal tchman Mesulam, ex toc te aj tzꞌibal. Ex xi tmaꞌn Josías te:

4 —Txiꞌya tucꞌil Hilcías aju tnejel pal, ex kꞌmanxa te tuꞌn tbaj tchmon pwak in pon kꞌiꞌn tuj tja Dios, aju nneꞌl cyiꞌn ke chmol pwak in che cub ten ttzi tja Dios, 5 ex e t-xi tkꞌoꞌn tuj cykꞌab ke nejenel te akꞌuntl tiꞌj tja Dios, tuꞌntzun t-xi cychjoꞌn twi cycꞌuꞌj keju in che akꞌnan tuꞌn t-xi binchet tja Dios, 6 ex ka twi cycꞌuꞌj ke calpinter, ke albañil ex cye mastl akꞌnal; ax icx baꞌn tuꞌn tlakꞌet tzeꞌ cyuꞌn, ex ke xak xpeꞌlimaj cyiꞌj, tuꞌn tajben tuꞌn t-xi binchet tja Dios, chi Josías. 7 Ex kꞌmanxa te tuꞌn miꞌn tkaninjtz tajlal pwak cxel kꞌoꞌn cye, porque cycyakil in che akꞌnan tuj tumelxix.

8 Xi tmaꞌn Hilcías aju tnejel pal, te Safán aju aj tzꞌibal, ka otok cnet ju libro te ley tuꞌn tuj tja Dios; ex xi tkꞌoꞌn libro tuj tkꞌab; atzunte Safán jaw t-schꞌiꞌn. 9 Te tibajxitzun jlu xiꞌ Safán txꞌolbalte te rey tiꞌj libro, ex xi tmaꞌn te:

—Tat Rey, ke tmajena o baj cychmoꞌn pwak at tuj tja Dios, ex o txi cykꞌoꞌn cye ke nejenel tiꞌj akꞌuntl tuꞌn t-xi binchet tja Dios.

10 Ax icx xi tmaꞌntl Safán te rey ka otok tzaj tkꞌoꞌn pal Hilcías jun libro te, ex jaw t-schꞌiꞌn Safán twitz rey. 11 Tejtzun tbinte rey aju in tmaꞌn tuj libro te ley, el t-sbitꞌun t-xbalun toc tiꞌj, tuꞌn tbis, 12 ex xi tmaꞌn te Hilcías, te Ahicam aju tcyꞌajal Safán, te Acbor aju tcyꞌajal Micaías, te Safán aju aj tzꞌibal, ex te Asaías aju maꞌ toclen ttxlaj rey, chi cyjaꞌ:

13 —Cyxiꞌye te nxele ex te cyxel cycyakil tnam xjal aj Judá, tuꞌn t-xi cykanine te Kman tiꞌj tnabl yol tzꞌiban tuj libro ma cnet; porque nimxixlo tkꞌoj Kman ma tzaj kiꞌj, tuꞌnju mintiꞌ xi cyniman ke kxeꞌchel aju yol in tmaꞌn tuj libro, ex mintiꞌ o japun cyuꞌn tcyakilju yol tzꞌiban tuj.

14 E jeꞌxtzun Hilcías, tucꞌix Ahicam, Acbor, Safán, ex Asaías, tuꞌn cypon tucꞌil xuꞌj Hulda aju t-sanjel Dios. Ate Hulda t-xuꞌjil Salum aju tal Ticva, ex tal tchman Harhas, ex ate Salum cwentil te cꞌubl xbalun tuj tja Dios. Atzun najl Hulda tuj tcabin piẍ tnam Jerusalén. Ex tej cyxiꞌ yolin te, 15 tzaj ttzakꞌweꞌn cyjaꞌ:

—Atzun tzakꞌwebl jlu tuꞌn Kman aju Cydios aj Israel: Cymanxe te xjal saj samante cyeye kanilte wucꞌile, 16 chi Kman in tmaꞌn: Ctzajel nsamaꞌne jun mya baꞌn tibaj lugar lu ex cyibaj ke xjal najl tuj, ic tzaꞌnx tcyakilju kꞌmaꞌmaj tuj libro aju ma jaw t-schꞌiꞌn rey te Judá, 17 porque ma tzꞌel cypaꞌn cyib wiꞌje, ex ma cub cypatun storac cywitz junxitl dios; ex tuꞌn tcyakilju cybinchben mya baꞌn ma cybincha ma tzaj nkꞌoje cyuꞌn; cyjaꞌtzun ma tzaj nimxix ntxꞌuꞌjile tiꞌj tnam lu, ex mlayx tzicꞌx tiꞌj wuꞌne, chi Kman. 18 Cymanxe te rey te Judá, aju ma tzaj samante cyeye kanilte te Kman: Ate Kman aju Cydios aj Israel in tmaꞌn cyjaꞌ: Tuꞌnju ma txi tkꞌoꞌn twiꞌya tiꞌj ju ma tbiya, 19 ex tuꞌnju ma tzꞌajtz tiꞌj tanmiya, ex ma cub tmansin tiba tej xtbiya tkanil wuꞌne tuꞌn cynaj ke xjal tuj tnam lu ex tuꞌn tcub cycastiw wuꞌne, ex tuꞌnju ma tzꞌel t-sbitꞌun t-xbaluna ex ma tzꞌoc tena okꞌel nwitze, cyjaꞌtzun icx weye ma tzaj nbiꞌne tyola. Akine Tmana in xi nmaꞌne jlu teya: 20 Tuꞌn tlaj tcyakil jlu, tuj txubtxaj cymela ex cpola cyucꞌil ktzan tchmana, ex mlay tila aju mya baꞌn ctzajel nkꞌoꞌne tibaj lugar lu, chi Dios, chi xuꞌj Hulda.

E ajtz meltzꞌaj ke t-sanjel rey, ex xi cytxꞌolbaꞌn tkanil te rey, aju otok tma xuꞌj Hulda.