3 Tuj twajxakin abkꞌi ttzyetlen tcawin Josías, matok cuꞌxunxtok, tzyet tuꞌn tniman te Dios aju Tdios David aju ktzan t-xeꞌchel. Ex tuj tcablajin abkꞌi ttzyetlen tcawin, el tiꞌn tuj txꞌotxꞌ Judá ex tuj Jerusalén ke tja cydios xjal mya nimal Dios ke, cyucꞌix ke tilbilal xuꞌj dios Asera, cyucꞌix txkantl tilbilal binchaꞌmaj tiꞌj cꞌuxbil nnoꞌcx kꞌoꞌn tuj kꞌakꞌ tuꞌn tcub ulj, 4 ex twitzx e cub xitun ke altar in che ajben cywitz ke tilbilal Baal. Xi tmaꞌn Josías tuꞌn cycub buchit ke ẍlaꞌc cycub cyibaj altar te patbil storac. Ax icx xi tmaꞌn tuꞌn cybaj buchin ke tilbilal xuꞌj dios Asera, cyucꞌix txkantl tilbilal tzeꞌ ex cꞌuxbil; biꞌx e oc tuꞌn te kuk, ex aju tkukil xi tchitun tibaj cypantyón keju otok cheꞌx kꞌonte chojbil cye. 5 Ax icx cub tpatun cybakil ke pal cyibaj altar jatum otok cub cykꞌoꞌn chojbil cye ke tilbilal, ex cyjaꞌtzun tten e el baj tiꞌn cycyakil ke tilbilal tuj txꞌotxꞌ Judá ex tuj Jerusalén. 6 Ax icx tbincha cyuj cytanmi aj Manasés, aj Efraín, aj Simeón ex pon baj cyuj cytanmi aj Neftalí, ax icx cyuj ke lugar otok che baj xitj ateꞌ cyiꞌjele. 7 E cub t-xitun ke altar cyucꞌix ke tilbilal xuꞌj dios Asera ex cyucꞌix txkantl tilbilal; biꞌx e oc tuꞌn te kuk ex e cub t-xitun cycyakil ke altar te patbil storac tuj tcyakil cytxꞌotxꞌ aj Israel. Te tibajxi ajtz meltzꞌaj tuꞌn tul tuj Jerusalén.

8 Tuj twajxaklajin abkꞌi ttzyetlen tcawin rey Josías, tel-lenxi tiꞌn ke tilbilal tuj txꞌotxꞌ Judá tucꞌix tuj tja Dios, xi t-samaꞌn ke xjal lu: Safán aju tcyꞌajal Azalía, Maasías aju gobernador te tnam, ex Joa aju aj tzꞌibal ex tcyꞌajal Joacaz, e jeꞌx t-samaꞌn tuꞌn t-xi cybinchaꞌn tja Kman aju Tdios. 9 E jeꞌxtzun ke jlu tucꞌil tnejel pal Hilcías ex xi cykꞌoꞌn pwak te, aju otok pon kꞌiꞌn tuj tja Dios, aju otok jaw cychmoꞌn ke aj Leví akeju in che xkꞌukin ttzi tja Dios, ex aju pwak otok pon cyiꞌn aj Manasés, aj Efraín ex txkantl aj Israel, ax icx aju pon cyiꞌn cycyakil aj Judá, aj Benjamín ex ke xjal najlke tuj Jerusalén. 10 Ex xi cykꞌoꞌn cye ke nejenel tiꞌj akꞌuntl tiꞌj tja Dios, tuꞌntzun t-xi cychjoꞌn twi cycꞌuꞌj ke akꞌnal in che akꞌnan tuꞌn t-xi cybinchaꞌn tja Dios. 11 Ax icx xi cykꞌoꞌn pwak cye ke calpinter ex cye ke albañil, tuꞌntzun ttzaj cylakꞌoꞌn ke abj xpeꞌlimaj cywitz ex tuꞌn cylakꞌet ke tzeꞌ, tuꞌn cyjax cywiꞌ ke ja otok che naj tuj cycwent ke rey te Judá.

12-13 Ke xinak lu in che akꞌnantok tuj tumelxix, ex akeju nejenel cye aj Leví, atzun ke jlu: Jahat ex Abdías, tiyjil Merari ke, tucꞌix Zacarías ex Mesulam, tiyjil Coat ke. Ax icx ax ke aj Leví cyocsaꞌn te nejenel cyxol ke ikal iktz, ex nejenel ke cyxol cycyakil keju in che akꞌnan tiꞌj akꞌuntl. Cycyakiltok ke aj Leví lu, baꞌn che kꞌajtzan tcyakil txcaj chnab, ex at junjun toc te aj tzꞌibal, junjun toc te caporal ex junjun toc te xkꞌukil ttzi tja Dios.

14 Tej tetz cyiꞌn pwak, aju otok pon kꞌiꞌn tuj tja Dios, oc noj pal Hilcías tiꞌj ju libro jatum tzꞌiban tley Dios, aju otok cyaj ttzꞌiban Moisés, 15 ex xi tmaꞌn te Safán aju aj tzꞌibal: Ma cnet ju libro wuꞌne tuj tja Kman, jatum tzꞌiban ley tuj, chi Hilcías, ex xi tkꞌoꞌn ju libro lu te Safán. 16 Xitzun tiꞌn Safán aju libro lu tucꞌil rey, ex xi tmaꞌn te cyjaꞌ:

—Tat Rey, ma bant cyuꞌn ke ajbel teya tcyakil aju ma txi tkꞌoꞌna tuj cycwent. 17 Ma jatz cyiꞌn aju pwak at tuj tja Dios ex ma txi cykꞌoꞌn cye ke nejenel tiꞌj akꞌuntl ex cye ke akꞌnal.

18 Ax icx xi tmaꞌntl Safán te rey: Ma tzaj kꞌoꞌn jun libro weye tuꞌn pal Hilcías; ex jaw t-schꞌiꞌn Safán twitz rey aju tzꞌiban tuj libro. 19 Tej tbinte rey aju in tmaꞌn tuj libro te ley, el t-sbitꞌun t-xbalun tuꞌn tbis. 20 Txquettzun Hilcías tuꞌn rey, tucꞌix Ahicam aju tcyꞌajal Safán, tucꞌix Abdón aju tcyꞌajal Micaía, tucꞌix Safán aju aj tzꞌibal, ex tucꞌix Asaías aju maꞌ toclen ttxlaj rey, ex xi tmaꞌn cye cyjaꞌ:

21 —Cyxiꞌye ex cykaninxe te Kman alcye tnabl ju libro ma cnet, ex alcye tuꞌn tbant wuꞌne ex cyuꞌn aj Israel ex aj Judá, akeju e cyaj ten ex mintiꞌ e jeꞌx kꞌiꞌn tuj juntl nasyon. Nimxixlo tkꞌoj Kman ma tzaj kiꞌj tuꞌnju mintiꞌ xi cykꞌoꞌn cywiꞌ ktzan kxeꞌchel tiꞌj ju yol in tmaꞌn tuj libro lu, ex mintiꞌ o japun cyuꞌn tcyakil yol tzꞌiban tuj, chi Josías.

22 Xiꞌtzun Hilcías cyucꞌix keju e jeꞌx samaꞌn tuꞌn rey te tucꞌil, tuꞌn cypon tucꞌil ju xuꞌj Hulda aju t-sanjel Dios. Ate Hulda t-xuꞌjil Salum aju tcyꞌajal Ticva ex tal tchman Harhas, ex ate Salum cwentilte cꞌubl xbalun tuj tja Dios. Atzun najl Hulda tuj tcabin pacꞌ tnam Jerusalén, ex tej cyxiꞌ yolin te, 23 tzaj ttzakꞌweꞌn cyjaꞌ: Chi Kman aju Cydios aj Israel in tmaꞌn: Cymanxe teju xjal saj samante cyeye wucꞌile: 24 Akine Dios in chin kꞌmante jlu: Ctzajel nsamaꞌne mya baꞌn tibaj tnam lu ex cyibaj ke xjal najlke tuj, ic tzaꞌnx tcyakilju tzꞌiban tuj libro aju ma jaw schꞌin twitz rey cye aj Judá. 25 Ma tzaj nkꞌoje cyiꞌj tuꞌnju ma tzꞌel cypaꞌn cyib wiꞌje, tuꞌnju ma cub cypatun storac cywitz junxitl dios, ex tuꞌn tlaj tcyakilju mya baꞌn in cybinchaꞌn; cyjaꞌtzun ma tzaj nimxix ntxꞌuꞌjile tiꞌj tnam lu ex mlayx yupj nkꞌoje, chi Kman. 26 Cymanxe te rey cye aj Judá, aju ma tzaj samante cyeye kanilte te Kman: Chi Kman aju Cydios aj Israel ma tma cyjaꞌ: Tuꞌnju ma txi tkꞌoꞌn twiꞌya tiꞌj ju ma tbiya tuj libro, 27 ex tuꞌnju ma tzꞌajtz tiꞌj tanmiya ex ma cub tmansin tiba tej tbinteya tkanil wuꞌne tuꞌn cynaj ke xjal tuj tnam lu, ex tuꞌnju ma tzꞌel t-sbitꞌun t-xbaluna ex ma jaw okꞌa nwitze, cyjaꞌtzun ax icx weye ma tzaj nbiꞌne tyola. Akine Dios in xi nmaꞌne jlu teya. 28 Tuꞌn tlaj tcyakil jlu, tuj txubtxaj cymela ex cpola cyucꞌil ktzan t-xeꞌchela, ex miꞌn tila aju mya baꞌn ctzajel nkꞌoꞌne tibaj tnam lu, chi Dios.

E ajtztzun meltzꞌaj ke sanjel ex xi cytxꞌolban aju tkanil lu te rey. 29 Xitzun tmaꞌn rey tuꞌn cytzaj txquet cycyakil ke cytijil xjal aj Judá ex aj Jerusalén tuꞌn toc cychmon cyib. 30 Atzunte rey cyucꞌix cycyakil xjal aj Judá, cyucꞌix ke xjal najlke tuj Jerusalén, cyucꞌix ke pal ex ke aj Leví, cyucꞌix cycyakil tnam xjal, tzaꞌnx keju chꞌin cyoclen, ax icx keju maꞌ cyoclen, cycyakil e jeꞌx tuj tja Dios, ex atzun jaw t-schꞌiꞌn rey tcyakilju in tmaꞌn tuj libro, aju otok cnet tuj tja Dios, jatum tzꞌiban ju yol otok cyaj bant tiꞌj tuꞌn Dios cyucꞌil aj Israel. 31 Cubtzun weꞌ rey tuj lugar banimaj jatum in che cub weꞌ rey, ex xi ttziyan te Kman tuꞌn tcyakil tanmi tuꞌn t-xi tniman ex tuꞌn cyjapun ke tmandamyent tuꞌn, cyucꞌix ke t-xnakꞌtzbil ex ke tley, ex tuꞌn tjapun tuꞌn aju yol cyaj bant tiꞌj tuꞌn Dios cyucꞌil aj Israel, aju tzꞌiban tuj libro. 32 Ax icx xi tmaꞌn cye cycyakil xjal aj Jerusalén ex aj Benjamín, akeju ateꞌtok tucꞌil, tuꞌn t-xi cytziyan tuꞌn tjapun cyuꞌn. Ex ke xjal aj Jerusalén xi cytziyan tuꞌn tjapun cyuꞌn aju yol cyaj bant tiꞌj tuꞌn Dios cyucꞌil, aju Cydios ktzan cyxeꞌchel. 33 El tiꞌn Josías cycyakil tilbilal in che cꞌuluntok xjal cywitz cyuj cycyakil tnam cyxol aj Israel, ex xi tmaꞌn cye cycyakil aj Israel tuꞌn cycꞌulun twitz Kman aju Cydios. Ex tej itzꞌxtok Josías, mintiꞌ el cypaꞌn cyib xjal tiꞌj Kman aju Cydios ktzan cyxeꞌchel.