Tej tcawin Manasés tuj Judá
33
Toctok Manasés twiꞌ cablaj abkꞌi tej ttzyet tcawin ex o cawin 55 abkꞌi tuj Jerusalén, 2 pero mya baꞌn e ela ke tbinchben tuj twitz Kman, tuꞌnju o tbincha axju mya baꞌn cybincha ke nasyon otok che ex tlajoꞌn Kman cywitz aj Israel. 3 E jaw tbinchaꞌn juntl maj ke ja cywiꞌ ke witz jatum in che cꞌulun xjal mya nimal Dios ke, akeju otok che cub t-xitun Ezequías aju ktzan tman; e jaw tbinchaꞌn ke altar jatum tuꞌn cycꞌulun xjal twitz tilbilal Baal, ex e cub tbinchaꞌn ke tilbilal xuꞌj dios Asera, ax icx o cꞌulun twitz kꞌij, twitz xjaw ex cywitz cycyakil cheꞌw ateꞌ twitz cyaꞌj, 4 ex e jaw tbinchaꞌn ke altar tuj tja Kman jatum otok tma Kman cyjaꞌ: Atzun ctel nbiye tuj te jumajx tuj Jerusalén. 5 Jaw tbinchaꞌn txkantl altar tuj cycabil ttxaꞌn tpeꞌn tja Dios jatum tuꞌn cycꞌulun xjal cywitz cheꞌw, twitz kꞌij ex twitz xjaw.6 Ax icx e cub tpatun ke tcꞌwaꞌl te chojbil tuj chkꞌajlaj Ben-hinom, o bant ttxocon cyiꞌj cyanmi cyimni, o bant tkꞌijin, o bant mañ tuꞌn ex oc ten kanil t-xjel cye ke spiritist ex cye ke xjal baꞌn che cyꞌaꞌn. Jumajx mya baꞌn eꞌla ke tbinchben tuj twitz Kman, cyjaꞌtzun tzaj nim tkꞌoj Kman tiꞌj tuꞌn jlu. 7 Ax icx ocx tkꞌoꞌn tuj tja Dios aju tilbilal otok bant tuꞌn; aju ja lu otok yolin Dios tiꞌj tucꞌil David ex Salomón aju tcyꞌajal cyjaꞌ: Ctel nbiye te jumajx tuj ja lu tuj Jerusalén, aju tnam o jaw nscꞌoꞌne cyxol cycyakil cyiyjil aj Israel. 8 ex mlay cheꞌx nlajoꞌntle ke aj Israel tuj txꞌotxꞌ o txi nkꞌoꞌne cye ktzan cyxeꞌchel, ka ma txi cyniman tcyakilju o txi nmaꞌne cye ex ka ma che japun ke nxnakꞌtzbile, ke nleye ex ke nmandamyente cyuꞌn, aju xi nmaꞌne te Moisés, chi Dios.
9 Baj tzpet cynabl aj Judá ex aj Jerusalén tuꞌn Manasés, ex mas nimxix mya baꞌn o cybincha ic tzaꞌn otok cybincha ke nasyon otok che naj tuꞌn Kman cywitz aj Israel. 10 O yolin Kman tucꞌil Manasés ex cyucꞌil t-xjalil, pero mintiꞌ xi cybiꞌn. 11 Tuꞌntzun jlu e tzaj tiꞌn Kman ke nejenel cye t-soldad rey te Asiria, tzyet Manasés cyuꞌn, oc cykꞌoꞌn cꞌuxbil tkul tkꞌab, baj cycꞌaloꞌn tuꞌn caden kꞌan cꞌuxbil ex xi cyiꞌn tuj Babilonia.
12 Tejtzun tten tuj yajbil oc ten naꞌl Dios, cub tmansinxix tib twitz Dios aju Cydios ktzan t-xeꞌchel, 13 ex tej toc ten naꞌl Dios o tzaj tbiꞌn Dios aju tkanbetz, xi tkꞌoꞌn Kman ambil te tuꞌn taj meltzꞌaj tuj Jerusalén ex tuꞌn tcꞌmonte toclen juntl maj te cawil. Eltzun tnicꞌ Manasés tiꞌj, ate Kman aju Dios axix toc.
14 Tbajlenxi jlu jaw tbinchaꞌn Manasés juntl maj aju muro toc tiꞌjxi tnejel, aju toc tiꞌjele tnam toc tbi Ttanmi David, aju muro xiꞌynix tumlal telex kꞌij teju chkꞌajlaj Gihón tuꞌn tpon tuj tkꞌab xak, tejxi tpon max ttzi pwert Tpwertil Cyiẍ tbi, ex cyaj ten ju tal witz Ofel tujxi muro, ex maꞌxix oc twaꞌl muro tuꞌn. Ax icx e cub tkꞌoꞌn ke nejenel cye soldad cyuj cycyakil ke tnam toc muro cyiꞌj ateꞌ tuj Judá. 15 Ax icx e jeꞌtz tiꞌn tuj tja Kman ke cydios txkantl nasyon, tucꞌixju tilbilal otok cub tbinchaꞌn, ex cyucꞌix cycyakil ke altar otok che jaw tbinchaꞌn te cycꞌulbil xjal twi witz, jatum tcubsaꞌn tja Dios ex tuj tnam Jerusalén, ex e jeꞌx t-xoꞌn tiꞌjxi tnam. 16 Te tibajxi xi tbinchaꞌn aju altar te Kman ex e jeꞌx tkꞌoꞌn ke chojbil te mojbabl tibil tibaj, ex ke chojbil te akꞌbil chjonte, ex xi tmaꞌn cye aj Judá tuꞌn cycꞌulun twitz Kman aju Cydios aj Israel. 17 Masque icju, atzun cye xjal cucx xi cykꞌoꞌn ke chojbil cywiꞌ ke witz jatum in che cꞌuluntok nej cywitz ke tilbilal, pero akeju oyaj lu, te Kman xi cykꞌoꞌn.
18 Aju chꞌintl txꞌolbaben tiꞌj Manasés ex tiꞌj tnaꞌj Dios ex cyiꞌj ke yol cyma ke t-sanjel Dios te, aju tzaj kꞌmaꞌn cye tuꞌn Dios aju Cydios aj Israel, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey cye aj Israel. 19 Aju tnaꞌj Dios ex aju tzakꞌwebl o tcꞌam, cyucꞌix cycyakil ke il o tbincha ex ju tten mya tzꞌaklxix, cyucꞌix ke lugar cywiꞌ ke witz jatum e jaw tbinchaꞌn ke ja te cycꞌulbil xjal mya nimal Dios ke, ex jatum e cub tkꞌoꞌn ke tilbilal xuꞌj dios Asera ex ke mastl tilbilal tej naꞌnxtok tcub tmansin tib twitz Dios, atzun tzꞌiban tcyakil jlu tuj uꞌj tiꞌj txꞌolbaben cyaj cytzꞌiban ke t-sanjel Dios. 20 Tejtzun tcyim Manasés, cuꞌx makuꞌn tuj txꞌotxꞌ twitz tja. Te tibajxi aju o cawin te t-xel, atzun Amón aju tcyꞌajal.
Tej tcawin Amón tuj Judá
21 Toctok Amón twiꞌ 22 abkꞌi tej ttzyet tcawin ex o cawin cab abkꞌi tuj Jerusalén. 22 Ke tbinchben mya baꞌn e eꞌla tuj twitz Kman ic tzaꞌnx ke tbinchben Manasés aju ktzan tman. Cub tkꞌoꞌn chojbil cywitz cycyakil ke tilbilal otok baj tbinchaꞌn Manasés aju ktzan tman, ex o cꞌulun cywitz. 23 Atzun te mintiꞌ cub tmansin tib twitz Dios ic tzaꞌn tbincha Manasés aju ktzan tman, nok oꞌcx oc ten binchal nimxix mya baꞌn.