2 Tej ttil Ezequías otok pon Senaquerib tuꞌn toc tzokpaj tiꞌj tnam Jerusalén, 3 xi tkanin cye aj sanjelal ex cye nejenel cye soldad ka baꞌn tuj cywitz tuꞌn tcub makset cyibaj ke twi aꞌ ateꞌ tiꞌjxi tnam, ex atzun cye baꞌn eꞌla tuj cywitz. 4 E chmettzun nimxix xjal ex cub cymaksiꞌn cyibaj cycyakil ke twi aꞌ, tucꞌix twi aꞌ nneꞌx ttxlaj tnam, tuꞌntzun miꞌn tcnet aꞌ tuꞌn rey cye aj Asiria oc tpon.

5 O tcyuwsa tcꞌuꞌj Ezequías ex jaw tbinchaꞌn muro toc tiꞌjele tnam, ax icx e jaw tbinchaꞌn ke ja maꞌ cywaꞌl tibaj muro ex jaw tbinchaꞌn juntl muro tiꞌjxi ju tnejel. Ax icx oc tkꞌoꞌn muro tiꞌj lugar Milo tuj tnam toc tbi Ttanmi David, ex e baj tbinchaꞌn nimxix lans ex makbil in che ajben tuj kꞌoj. 6 E oc tkꞌoꞌn ke nejenel cye soldad tuꞌn cycawin cyibaj xjal, e oc tchmoꞌn tuj chkꞌajlaj tcub ttzi tpwertil tnam ex xi tcyuwsaꞌn cycꞌuꞌj, xi tmaꞌn cye cyjaꞌ: 7 Cykꞌoꞌnc cyipune ex cyuwx cycꞌuꞌje. Miꞌn che xobe ex miꞌn baj cycꞌuꞌje twitz rey te Asiria ex mi cywitz cycyakil soldad nimxix cyajlal ucꞌin tuꞌn, porque aju ke at kucꞌil mas nim tipumal twitzju cye at cyucꞌil. 8 Ate jlu kꞌukl tcꞌuꞌj tiꞌj cyipun ke xinak, atzun ke, at Kman Dios kucꞌil tuꞌn tonin kiꞌj oc toc kꞌoj kuꞌn, chi Ezequías. Tejtzun cybinte tnam xjal aju tyol rey Ezequías, o keꞌ cycꞌuꞌj.

9 Te tibajxi jlu, tej matok in kꞌojin Senaquerib aju rey cye aj Asiria tiꞌj tnam Laquis, cyucꞌix cycyakil ke t-soldad, e jeꞌx t-samaꞌn tuj Jerusalén junjun xjal at cyoclen ttxlaj, tuꞌn t-xi cymaꞌn te Ezequías aju rey cye aj Judá, ex cye cycyakil xjal najlke tuj Jerusalén aju tkanil lu:

10 Atzun jlu in tmaꞌn Senaquerib cyeye, aju rey te Asiria: ¿Al iꞌj nnoꞌc keꞌ cycꞌuꞌje tuꞌnju cucx in che cyaj tene tuj Jerusalén, ex txolin cyiꞌje cyuꞌn ke soldad? 11 Ka in tmaꞌn Ezequías cyeye cyjaꞌ: Ate Kman Dios ccolol kiꞌj tuꞌn miꞌn tcub kiꞌj tuꞌn rey te Asiria, ka chi, nok in che cub sbuꞌne tuꞌn, ex tuꞌn jlu jacu che naje tuꞌn weꞌyaj ex tuꞌn txketleꞌn. 12 ¿Myapetzun o che baj tkꞌuchin Ezequías ke lugar te cꞌulbil cywiꞌ ke witz, cyucꞌix ke altar teju Dios lu, ex o tma cye aj Judá ex cye aj Jerusalén tuꞌn cycꞌulun twitz junx altar, ex oꞌcx tibaj tuꞌn tcub cypatun storac? 13 ¿Mintiꞌpetzun baꞌn cyuꞌne aju o nbinchaye ex o cybincha ktzan nxeꞌchele cyiꞌj cycyakil tnam cyuj txkantl nasyon? ¿Baka e clet ke nasyon lu cyuꞌn ke cydios tuꞌn miꞌn tcub cyiꞌj wuꞌne? 14 Cyxol cycyakil cydios ke nasyon e cub cyxitun ktzan nxeꞌchele ¿atpe jun o clonte cye tnam tuꞌn miꞌn tcub cyiꞌj wuꞌne? ¿Tzaꞌntzun tten tuꞌn cyclet cyeye tuꞌn Cydiose tuꞌn miꞌn tcub cyiꞌje wuꞌne? 15 Cyjaꞌtzun miꞌn cyakꞌe ambil tuꞌn cycub sbuꞌne tuꞌn Ezequías ex miꞌn cub tiꞌj cynable tuꞌn, ex miꞌn txi cynimane, porque ka mi jun dios cye ke nasyon lu o xcyeꞌ tuꞌn cyclet ke xjal tuꞌn tuj nkꞌabe, ex tuj cykꞌab ktzan nxeꞌchele, pyortzunlo aju cyeye Cydios, mlay che clete tuꞌn tuj nkꞌabe, chi Senaquerib, che chi xjal.

16 Ke xjal at cyoclen ttxlaj rey te Asiria xi cymaꞌn nimcutl yol mya baꞌn tiꞌj Kman Dios ex tiꞌj Ezequías aju tmajen. 17 Ax icx e cub ttzꞌiban Senaquerib ke uꞌj in yolin mya baꞌn tiꞌj Kman aju Cydios aj Israel, in cymaꞌn cyjaꞌ: Ic tzaꞌn ke cydios txkantl nasyon mintiꞌ ma che xcyeꞌ tuꞌn cyclet ke xjal cyuꞌn tuj nkꞌabe, ax icxtzun aju Tdios Ezequías, mlay clet tuꞌn tuj nkꞌabe aju tnam jatum in cawin.

18 Atzun cye xjal at cyoclen ttxlaj Senaquerib e yolin cyuwxix tuj yol Hebrey cye ke xjal ateꞌjx twi muro te Jerusalén, tuꞌntzun cyjaw secꞌpaj xjal ex tuꞌn ttzaj cyxobil, tuꞌntzun tcub tiꞌj tnam cyuꞌn. 19 E yolin mya baꞌn tiꞌj Cydios aj Jerusalén, ic tzaꞌnx otok che yolin cyiꞌj cydios txkantl nasyon, akeju binchaꞌn in che cub cyuꞌn xjal.

20 Atzunte rey Ezequías, tucꞌix Isaías aju t-sanjel Dios ex tcyꞌajal Amoz, e oc ten naꞌl Dios, ex xi cykanin onbil te Dios aju at tuj cyaꞌj. 21 Tzajtzun t-samaꞌn Kman jun anjel tuj cycampament ke t-soldad rey Senaquerib ex e naj cycyakil tuꞌn, cyucꞌix ke capitán ex ke nejenel; atzunte rey aj meltzꞌaj tuj ttanmi otok tzaj tchꞌixwi, ex tej tocx tuj tja tdios, axtzun cub byoꞌn tuꞌn spad cyuꞌnx ke tcyꞌajal.

22 Cyjaꞌtzun tten clet Ezequías tuꞌn Dios, cyucꞌix ke xjal najlke tuj Jerusalén; mintiꞌ cub cyiꞌj tuꞌn Senaquerib aju rey te Asiria, ex mintiꞌ cub cyiꞌj cyuꞌn txkantl aj kꞌoj cyiꞌj, ex mintiꞌ e kꞌojl txkantl nasyon cyiꞌj, akeju cyvesin cyib cyucꞌil. 23 Nimcu xjal xi cyiꞌn cyoyaj te Kman tuj Jerusalén ex xi cyiꞌn ke oyaj wiꞌyilxix te Ezequías aju rey cye aj Judá. Ex tbajlenxi jlu, oc kꞌoꞌn Ezequías te maꞌxix toclen cyuꞌn cycyakil nasyon.

24 Tuj tkꞌijlalil lu tzaj jun tyabil Ezequías cyuwxix wen, oc ten naꞌl Dios ex tzaj tzakꞌweꞌn tuꞌn Dios tucꞌil jun techal maꞌxix t-xilen, 25 pero ate Ezequías nok oꞌcx jaw tniman tib, mintiꞌ xi tkꞌoꞌn chjonte tiꞌj ju baꞌn otok tcꞌam, ex tuꞌntzun jlu tzaj tkꞌoj Kman tiꞌj, ax icx cyiꞌj aj Judá ex cyiꞌj aj Jerusalén.

26 Masque jaw tniman tib Ezequías, pero te tibajxi cub tmansin tib, ax icx cybincha ke xjal najlke tuj Jerusalén, ex tuꞌntzun jlu mintiꞌ tzaj tkꞌoj Kman cyiꞌj tej itzꞌxtok Ezequías.

27 O ten nimxix tkꞌinumabl Ezequías ex nimxix nimbilte. O chmet nim sak pwak tucꞌil, tucꞌix kꞌan pwak, cyucꞌix ke tal abj tbanilxix, tucꞌix perjum, cyucꞌix ke makbil in che ajben tuj kꞌoj ex tcyakil txcaj tiꞌxti wiꞌyilxix. 28 Ax icx e jaw tbinchaꞌn ke ja tuꞌn cyocx cꞌuꞌt twitz awal cyuj, tucꞌix taꞌl twitz uva ex chibj aseyt, ex e jaw tbinchaꞌn ke ja tuꞌn cyajben cye cycyakil txcaj wacẍ ex ke cypeꞌn ẍneꞌl. 29 Ax icx e jaw tbinchaꞌn ke tnam, ex o ten nimxix twacẍ ex nimxix t-ẍneꞌl, porque tzaj tkꞌoꞌn Dios nimxix tkꞌinumabl.

30 Ex ax Ezequías o kꞌmante tuꞌn tcub makset tibaj twi aꞌ Gihón, ex tkꞌoꞌn tbeyil tjakꞌ txꞌotxꞌ tuꞌn tpon tuj tumlal telex kꞌij tuj tnam toc tbi Ttanmi David. Cyjaꞌtzun tcyakil aju tbincha Ezequías baꞌn eꞌla.

31 Tej ttzaj cysamaꞌn ke xjal maꞌ cyoclen tuj Babilonia junjun sanjel visitaril Ezequías, ex kanilte tiꞌj ju binchben nim tipumal otok bant tuj txꞌotxꞌ jatum in cawin, cyaj kꞌoꞌn Ezequías tjunal tuꞌn Dios, tuꞌntzun ticꞌ twitz tiꞌj ex tuꞌn tel tnicꞌ tiꞌj tcyakil aju at tuj tanmi.

32 Aju chꞌintl txꞌolbaben tiꞌj Ezequías ex cyiꞌj ke tbinchben tzꞌaklxix, atzun tzꞌiban tuj uꞌj cub ttzꞌiban Isaías aju t-sanjel Dios ex tcyꞌajal Amoz, ex tuj uꞌj jatum taꞌ tcyakil txꞌolbaben cyiꞌj ke rey cye aj Judá ex aj Israel. 33 Tej tcyim Ezequías ocx makuꞌn tuj jun pantyón tjax tibajxi cypantyón ke tiyjil David. Cycyakil aj Judá cyucꞌix ke xjal najlke tuj Jerusalén xi cykꞌoꞌn nimbil te tej tcyim, ex aju o cawin te t-xel, atzun Manasés aju tcyꞌajal.