2 Te tibajxi jlu, oc ten Ezequías nacꞌulte tiꞌj cyakꞌun pal ex aj Leví, tuꞌn cyakꞌnan tuj cꞌlojin, teylex te junjun tiꞌj takꞌun, tuꞌntzun cyxi kꞌot ke oyaj patun in che cub ex cyucꞌix ke chojbil te mojbabl tibil, tuꞌn t-xi cykꞌoꞌn chjonte te Kman ex tuꞌn tjaw cynimsaꞌn tbi ex tuꞌn cyajben tuj ttxaꞌn tpeꞌn tja Dios. 3 Ax icx xi tkꞌoꞌn rey tiꞌj tex tkꞌinumabl, ke chojbil in cheꞌx kꞌot prim ex kale, ex ke oyaj patun in che cub cyuj ke kꞌij te ojlabl, ex keju in cheꞌx kꞌot tuj ninkꞌij oc ttzaj queꞌyin juntl acꞌaj xjaw, ex cyuj ke ninkꞌij maꞌ cyoclen, ic tzaꞌnx tzꞌiban tuj tley Kman. 4 Ax icx xi tmaꞌn cye xjal najlke tuj Jerusalén tuꞌn t-xi cykꞌoꞌn cye pal ex cye aj Leví aju onbil banin tiꞌj, tuꞌntzun cyajben oꞌcx tuj takꞌun Dios ic tzaꞌn in tmaꞌn tley Kman. 5 Ex tej cybinte aj Israel aju tkanil lu, tuꞌn tcyakil cyanmi tzaj cyiꞌn tnejel twitz triw, taꞌl twitz uva, chibj aseyt, taꞌl cab tbanil ex tnejel twitz tcyakil txcaj awal in tzaj tuj cojbil. Ax icx pon cyiꞌn nimxix tlajiꞌn tiꞌj tcyakil twitz cyawal.

6 Ax icx ke aj Israel ex ke aj Judá, akeju najlke cyuj ke tnam ateꞌ tuj Judá, tzaj cyiꞌn aju tlajiꞌn cyiꞌj ke wacẍ ex cyiꞌj ke ẍneꞌl ex tlajiꞌn cyiꞌj ke tiꞌxti nneꞌl cypaꞌn tuꞌn tajben te Kman aju Cydios. Tcyakil jlu ocx cykꞌoꞌn tuj byujin. 7 Tzyet cyiꞌn tiꞌj tuj toxin xjaw ex weꞌ tuꞌn cypon cyiꞌn tuj twukin xjaw. 8 Ex tej t-xiꞌ Ezequías cyucꞌix ke xjal at cyoclen ttxlaj queꞌyilte aju otok chmet, xi cykꞌoꞌn chjonte te Kman ex cye aj Israel aju tnam etzan tuꞌn. 9 Xitzun tkanin Ezequías cye pal ex cye aj Leví tiꞌj tcyakilju otok chmet. 10 Xi ttzakꞌweꞌn Azarías aju tnejel pal ex tiyjil Sadoc cyjaꞌ: Atxix tej ttzyet tuꞌn tul cyiꞌn xjal cyoyaj tuj tja Kman, at nim kwaye ex malpe sobryin nim; tcyakil jlu ma sobryin, tuꞌnju ma cub tcyꞌiwlaꞌn Kman aju tnam etzan tuꞌn.

11 Cyjaꞌtzun tten xi tmaꞌn Ezequías tuꞌn cybaj binchet ke tal ja ttxlaj tja Kman, tuꞌntzun tocx kꞌot cywitz awal cyuj. Ex tejtzun cybaj bant 12 biꞌx e ocx kꞌoꞌn ke oyaj cyuj, cyucꞌix ke tlajiꞌn otok che pon kꞌoꞌn ex ke oyaj otok che el paꞌn te Kman. Aju oc cykꞌoꞌn te nejenel tiꞌj tcyakil jlu, atzun Conanías aju aj Leví, ex atzunte Simei aju terman oc te tcabin nejenel. 13 Ke xkꞌukil e ten tjakꞌ tcawbil Conanías ex Simei aju terman, atzun ke jlu: Jehiel, Azazías, Nahat, Asael, Jerimot, Jozabad, Eliel, Ismaquías, Mahat ex Benaía. Tuꞌn rey Ezequías oc tkꞌoꞌn cyoclen ex tuꞌn Azarías aju nejenel maꞌxix toclen tuj tja Dios. 14 Ate Coré aju tcyꞌajal Imna, aju aj Leví, atzun tocsaꞌn te xkꞌukil ttzi ja tcub tumlal tjawitz kꞌij, ex tuj tcwent taꞌ tuꞌn cycꞌmet ke oyaj in xi cykꞌoꞌn xjal te Dios tuꞌn cyex cygan, ex tuj tcwent tuꞌn cycub sipet ke oyaj nneꞌl cypaꞌn xjal te Kman. 15 Ke onil te Coré ateꞌ cyuj cytanmi pal, atzun ke jlu: Edén, Miniamín, Jesúa, Semaías, Amarías ex Secanías. Atzun ke e cub sipante oyaj tujxix tumel cyxol ke cyucꞌil ex xi cykꞌoꞌn cye tij xjal ax icx cye cuꞌxun, ic tzaꞌnx takꞌun junjun cꞌloj banimaj tiꞌj. 16 Ax icx xi cykꞌoꞌn cye ke xinak tzꞌiban cybi tuj list ex otok japun ox abkꞌi cyuꞌn ex ka mas, ex cye keju in che ajben tuj tja Dios tcyakil kꞌij, ic tzaꞌnx cyakꞌun junjun cꞌloj banimaj tiꞌj. 17 Ax icx xi cykꞌoꞌn cye ke pal tzꞌiban cybi tuj list ic tzaꞌnx junjun cꞌloj cyiyjil, ex cye aj Leví, akeju otok japun winkin abkꞌi cyuꞌn ex ka mas, ic tzaꞌn cyakꞌun junjun cꞌloj banimaj tiꞌj. 18 Cyaj tzꞌibet cybi cycyakil cyucꞌix ke tal cycꞌwaꞌl, ke cyxuꞌjil, ke cycyꞌajal ex ke cymeꞌjel, tuꞌnju xi cykꞌon cyib te jumajx tuꞌn cyajben tuj tja Dios. 19 Cyuj cycyakil cytanmi pal ateꞌtok ke xinak otok tzꞌoc kꞌoꞌn cyoclen tuꞌn t-xi cysipan cywa pal tiyjil Aarón, ex cywa cycyakil aj Leví tzꞌibamaj cybi, akeju najlke cyuj ke aldey cyiꞌjele cytanmi pal.

20 Atzun jlu o tbincha Ezequías cyuj cycyakil tnam ateꞌ tuj Judá. Baꞌnxix e eꞌla ke tbinchben twitz Kman aju Tdios ex tzꞌaklxix ex axix toc ke. 21 Tcyakil akꞌuntl o tbincha tiꞌj tja Dios, ax icx tuꞌn cyjapun ke tley Kman cyuꞌn xjal ex ke tmandamyent; tuj tcyakil jlu oc tilil tuꞌn tuꞌn tniman te Dios tuꞌn tcyakil tanmi, ex tuꞌntzun jlu baꞌn eꞌla tcyakil aju tbincha.