Cub ticꞌsaꞌn Ezequías Xjan Kꞌij
30
Xi t-samaꞌn Ezequías tkanil cyxol cycyakil aj Israel ex cyxol aj Judá, ax icx xi t-samaꞌn uꞌj cye aj Efraín ex cye aj Manasés tuꞌn cyul tuj tja Dios tuj Jerusalén, tuꞌn tcub icꞌset Xjan Kꞌij te Kman aju Cydios aj Israel. 2 Bant tiꞌj tuꞌn rey cyucꞌil ke xjal at cyoclen ttxlaj ex cyucꞌil cycyakil tnam xjal aj Jerusalén tuꞌn tcub cyicꞌsaꞌn Xjan Kꞌij tuj tcabin xjaw, 3 tuꞌnju mintiꞌ otok cub icꞌset tujxix tkꞌijlalil banimaj tiꞌj, porque mya nimtok pal otok baj cyxjansan cyib, ax icx ke tnam xjal naꞌnxtok toc cychmon cyib tuj Jerusalén. 4 Tzaꞌnx te rey, ax icx cycyakil tnam xjal, baꞌn eꞌla tuj cywitz aju ximbetz lu. 5 Bant tiꞌj cyuꞌn tuꞌn t-xiꞌ jun txocbil cyiꞌj cycyakil aj Israel, tzajx keꞌ tuj tnam Beerseba ex pon baj max tuj tnam Dan, tuꞌn cyul tuj Jerusalén icꞌsalte Xjan Kꞌij te Kman aju Cydios aj Israel, porque otok tzꞌel nim tyemp mintiꞌ in che ul baj cycyakil xjal tuꞌn tcub cyicꞌsaꞌn ic tzaꞌn tzꞌibamaj tuj ley.6 Cyjaꞌtzun e jeꞌx ke sanjel cyxol cycyakil aj Israel ex aj Judá, kꞌiꞌn ke uꞌj cyuꞌn, akeju otok cub ttzꞌiban rey cyucꞌix ke xjal maꞌ cyoclen ateꞌ ttxlaj, tuꞌn t-xi cymaꞌn aju otok tzaj tmaꞌn rey cyjaꞌ: Akeye aj Israel, cyajtz meltzꞌaje tucꞌil Kman aju Tdios Abraham, Tdios Isaac ex Tdios Israel, ex atzun te cꞌajetz meltzꞌaj cyucꞌile, akeye ma che cyaj clet tuj cykꞌab cyrey aj Asiria. 7 Miꞌn che oque ic tzaꞌn ktzan cyxeꞌchele ex ic tzaꞌn ke cyermaniye, el cypaꞌn cyib tiꞌj Kman aju Cydios ktzan cyxeꞌchel, ex tuꞌntzun jlu ate Dios xi kꞌonte cye tuꞌn cynaj, ic tzaꞌn ma cyile. 8 Miꞌn cycyuwsaye cyanmiye ic tzaꞌn cybincha ktzan cyxeꞌchele, cykꞌoꞌncx cyibe tjakꞌ tcawbil Kman ex cytzaje tuj tja, aju o baj t-xjansaꞌn te jumajx. Che ajbene te Kman aju Cydiose, ex atzun te cxel tcolin tuꞌn tkꞌojin cyiꞌje. 9 Ka ma che ajtz meltzꞌaje tucꞌil Kman, ke aj kꞌoj cyiꞌje ctzajel kꞌakꞌan cycꞌuꞌj cyiꞌj ke cyermaniye ex cyiꞌj ke cycyꞌajale, akeju presin cyuꞌn jaꞌlo, ex che tzajel cytzokpiꞌn tuꞌn cyul juntl maj tuj txꞌotxꞌ lu, porque ate Kman aju Cydiose baꞌn tzꞌeꞌy tcꞌuꞌj ex baꞌn kꞌakꞌan tcꞌuꞌj ex mlay che el icꞌune tuꞌn ka ma che ajtz meltzꞌaje tucꞌil, chi rey tuj uꞌj.
10 Atzun cye aj sanjelal baj cybetin tuj tcyakil cytxꞌotxꞌ aj Efraín ex aj Manasés, e jeꞌx tuj teyle junjun tnam tejxi cypon tuj cytxꞌotxꞌ aj Zabulón. Atzun cye xjal nok e jaw tzeꞌn ex e xmayin cyiꞌj. 11 Pero at junjun xinak cyxol aj Aser, aj Manasés ex aj Zabulón cub cymansin cyib twitz Dios ex e ul tuj Jerusalén. 12 Ax icx o yolin Dios tuj cyanmi aj Judá tuꞌn tmojeꞌ cyyol tuꞌn tjapun cyuꞌn aju yol otok tzaj tmaꞌn rey ex ke xjal maꞌ cyoclen ateꞌ ttxlaj, ic tzaꞌnx otok tzaj tmaꞌn Kman.
13 Cyjaꞌtzun nimxix xjal oc cychmon cyib tuj Jerusalén tuj tcabin xjaw, tuꞌn tcub icꞌset ninkꞌij cyiꞌj ke pan mintiꞌ t-samel cyuj tuꞌn tjaw mal cycꞌuꞌj. 14 Eltzun cyiꞌn cycyakil ke altar ex ke lugar jatum in cub patit storac tuj Jerusalén ex xi cyxoꞌn tuj tkꞌab xak Cedrón. 15 Tuj tcyajlajin tajlal tcabin xjaw cub cybyoꞌn aju tal tman ẍneꞌl in xi kꞌot tuj Xjan Kꞌij. Atzun ke pal ex ke aj Leví tzaj cychꞌixwi, baj cyxjansan cyib ex xi cyiꞌn ke alumaj tuj tja Kman tuꞌn t-xi kꞌot aju oyaj patun in cub. 16 Tzyet juntl maj cyakꞌnan ic tzaꞌnx nacꞌumaj tiꞌj tuj tley Moisés aju tmajen Dios. Ake pal in che cub chitunte chicꞌ aju in xi kꞌoꞌn cye cyuꞌn aj Leví. 17 Ex tuꞌnju at nimcu xjal naꞌnxtok tbaj cyxjansan cyib, cyjaꞌtzun xi kꞌoꞌn tuj cycwent ke aj Leví tuꞌn tcub cybyoꞌn ke alumaj in cheꞌx kꞌot tuj Xjan Kꞌij, aju otok tzul cyiꞌn ke xjal naꞌnxtok tbaj cyxjansan cyib, tuꞌntzun cyxjanset ke alumaj. 18 Nimxix xjal cyxol aj Efraín, aj Manasés, aj Isacar ex aj Zabulón e waꞌn tiꞌj wabj te Xjan Kꞌij, pero mintiꞌ japun cyuꞌn ic tzaꞌnx tzꞌiban tuj ley, tuꞌnju mintiꞌ otok baj cyxjansan cyib. Atzunte Ezequías oc ten naꞌl Dios cyiꞌj cyjaꞌ: Aya Nman aju Cydios ktzan kxeꞌchele nimxix t-xtalbila, 19 najsancuya cyil cycyakil keju in che jyon tiꞌja tuꞌn tcyakil cyanmi, masque naꞌnx tbaj cyxjansan cyib ic tzaꞌn in tmaꞌn ley tiꞌj tjaya, chi Ezequías.
20 Atzunte Kman tzaj tbiꞌn aju tkanbetz Ezequías ex cub tnajsaꞌn cyil tnam xjal. 21 Cyjaꞌtzun ke aj Israel, akeju ateꞌtok tuj Jerusalén, cub cyicꞌsaꞌn tucꞌil nim tzalajbil wuk kꞌij ninkꞌij tiꞌj pan mintiꞌ t-samel tuj tuꞌn tjaw mal tcꞌuꞌj, ex atzun ke pal ex ke aj Leví jaw cynimsaꞌn tbi Kman, in che bitzan tcyakil kꞌij tucꞌil tkꞌajkꞌajel cywi chnab cyuwxix wen. 22 Atzunte Ezequías xi tkꞌoꞌn chjonte cye cycyakil aj Leví, tuꞌnju at-xix cynabl tuꞌn cyajben te Kman.
Ex tuj wuk kꞌij e waꞌn tiꞌj wabj bant tuj ninkꞌij, ex xi cykꞌoꞌn ke chojbil te mojbabl tibil, ex jaw cynimsaꞌn tbi Kman aju Cydios ktzan cyxeꞌchel. 23 Cycyakil tnam xjal bant tiꞌj cyuꞌn tuꞌn toc juntl wuk kꞌij ninkꞌij, ex cub cyicꞌsaꞌn tucꞌil nim tzalajbil; 24 xi tkꞌoꞌn Ezequías aju rey cye aj Judá mil tor cye tnam xjal tucꞌix wuk mil ẍneꞌl; ax icx ke nejenel cye xjal xi cykꞌoꞌn mil tor cye tnam xjal tucꞌix laj mil ẍneꞌl. Ex nimcu pal baj cyxjansan cyib. 25 Cycyakil xjal aj Judá o che tzalaj, ax icx ke pal ex ke aj Leví, cyucꞌix cycyakil xjal otok che tzaj tuj Israel, cyucꞌix ke stranjer xjal otok che tzaj tuj Israel ex keju ax najlke tuj Judá. 26 Nimxix e tzalaj ke xjal tuj Jerusalén, porque atxix tuj tkꞌijlalil Salomón aju tcyꞌajal David ex rey cye aj Israel, naꞌnxtok tbant juntl maj icju tuj Jerusalén. 27 Te tibajxi e jaw weꞌ ke pal ex ke aj Leví, e oc ten cyꞌiwlalte cye tnam xjal, e tzaj biꞌn tuꞌn Kman, ex aju cynaꞌj Dios japun max tuj cyaꞌj tucꞌil Dios tuj tnajbil xjan.