Tej tcawin Ezequías tuj Judá
29
Otok japun Ezequías twiꞌ 25 abkꞌi tej ttzyet tcawin ex o cawin 29 abkꞌi tuj Jerusalén. Aju ttxuꞌ, Abías tbi aju tmeꞌjel Zacarías. 2 Ke tbinchben Ezequías baꞌn e eꞌla tuj twitz Kman, ic tzaꞌnx otok tbincha David aju ktzan t-xeꞌchel. 3 Tuj tnejel xjaw te tnejel abkꞌi ttzyetlen tcawin Ezequías o jaket tja Dios tuꞌn ex e baj t-saksaꞌn ke tlamel. 4 E tzaj ttxcoꞌn ke pal cyucꞌix ke aj Leví, ex atzun e oc tchmoꞌn tuj ttxaꞌn peꞌn twitz tja Dios tuj tjawitz kꞌij, 5 ex xi tmaꞌn cye: Akeye aj Leví chin cybintze: Cyxjansan baj cyibe jaꞌlo, ax icx cyxjansame tja Kman aju Cydios kxeꞌchel. Cyiꞌn etze tcyakilju mya baꞌn at tuj tja Kman. 6 Porque o che binchan ktzan kxeꞌchel il; aju cybinchben mya baꞌn e eꞌla tuj twitz Kman, o cyaj cycolin aju Kdios, ya mintiꞌtl cyaj tiꞌj tja Kman ex o tzꞌel cypaꞌn cyib tiꞌj Dios. 7 Cyaj cylamoꞌn ke tlamel tja Dios, cuꞌx cyyupun ke candil, xi cycolin tuꞌn tcub cypatun storac ex tuꞌn t-xi cykꞌoꞌn ke chojbil patun in che cub twitz tja Dios aju Cydios aj Israel. 8 Cyjaꞌtzun tzaj tkꞌoj Kman cyiꞌj aj Judá ex cyiꞌj aj Jerusalén, ex tuꞌn Kman in che labin xjal cyiꞌj, in che xmayin cyiꞌj ex ma che jaw secꞌpaj cyiꞌj, ic tzaꞌnx ma cyile tuꞌn cywitze. 9 Cyjaꞌtzun ma che cyim ke ktzan kman tuj kꞌoj, atzun ke kcyꞌajal ex ke kmeꞌjel cyucꞌix ke kxuꞌjil ma cheꞌx kꞌiꞌn pres. 10 Cyjaꞌtzun ma cub nximane tuꞌn tbant tiꞌj jun yol wuꞌne tucꞌil Kman aju Cydios aj Israel, tuꞌntzun miꞌn cucx tkꞌojintl Kman kiꞌj. 11 Atzun jaꞌlo akeye ncꞌwaꞌl, japunx cyuꞌne, porque ma che jaw scꞌoꞌne tuꞌn Kman tuꞌn cytene twitz, tuꞌn cyajbene te, ex tuꞌn tcub cypatune storac twitz, chi Ezequías.12 Ke aj Leví, akeju biꞌx tzyet cyakꞌnan, atzun ke jlu: Cyxol tiyjil Coat, atzun Mahat aju tcyꞌajal Amasai tucꞌix Joel aju tcyꞌajal Azarías; cyxol tiyjil Merari, atzun Cis aju tcyꞌajal Abdi tucꞌix Azarías aju tcyꞌajal Jehalelel; cyxol tiyjil Gersón, atzun Joa aju tcyꞌajal Zima ex tucꞌix Edén aju tcyꞌajal Joa; 13 cyxol tiyjil Elizafán, atzun Simri tucꞌix Jeiel; cyxol tiyjil Asaf, atzun Zacarías tucꞌix Matanías; 14 cyxol tiyjil Hemán, atzun Jehiel tucꞌix Simei, ex cyxol tiyjil Jedutún, atzun Semaías tucꞌix Uziel. 15 Ake jlu nej e oc cychmoꞌn ke cyerman ex baj cyxjansan cyib cycyakil; ex e ocxtzun tuj tja Dios tuꞌn tbaj cysaksaꞌn, ic tzaꞌnx ju orden otok txi tkꞌoꞌn rey ex ic tzaꞌnx otok tma Kman.
16 Te tibajxi e ocx ke pal tuj tja Dios tuꞌn tbaj cysaksaꞌn. Etz cyiꞌn tcyakil ttzꞌilil tocx tuj, ex cub cykꞌoꞌn ttxaꞌn peꞌn, ex atzun cye aj Leví xi cyiꞌn tuꞌn tpon tuj tkꞌab xak Cedrón. 17 Tzyet cysaksante ttxaꞌn tpeꞌn tja Dios tuj tnejel kꞌij te tnejel xjaw, ex tuj twajxakin kꞌij e pon canun ttzi tja Dios. Tuj wajxak kꞌijtl baj cysaksaꞌn tuj tja Dios ex tuj tkaklajin kꞌij baj bant tcyakil cyuꞌn. 18 Te tibajxi jlu e jeꞌx kꞌmalte te rey Ezequías cyjaꞌ: Ma baj ksaksaꞌne tcyakil tja Dios tucꞌix altar te patbil chojbil, cyucꞌix cycyakil ke macbil in che ajben tiꞌj, tucꞌix ju mes jatum in che cub txolbet ke pan cyꞌiwlaꞌmaj tibaj ex cyucꞌix cycyakil ke macbil in che ajben tiꞌj. 19 Ax icx ma baj kbinchaꞌne cyten ex ma che baj ksaksaꞌne cycyakil ke macbil otok che ex tiꞌn rey Acaz tej tel tpaꞌn tib tiꞌj Kman. Lu ma che cub ten juntl maj junx tucꞌil altar te Kman, che chi pal.
20 Primxix jaw weꞌ rey Ezequías, e oc tchmoꞌn ke aj sanjelal te tnam ex xiꞌ tuj tja Kman. 21 Xi cyiꞌn wuk tor, wuk tman ẍneꞌl, wuk tal tman ẍneꞌl ex wuk tman chip te jun chojbil tuꞌn tnajset til rey cyucꞌix keju ateꞌ tuj tja, ex cyil aj Judá, ex tuꞌn t-xjanset tja Dios. Xi tmaꞌn rey cye ke pal akeju tiyjil Aarón tuꞌn t-xi cykꞌoꞌn jlu te chojbil tibaj altar te Kman. 22 Cubtzun cybyoꞌn pal ke tor, tzaj cyiꞌn cychcꞌel ex xi cytxꞌitpuꞌn tibaj altar. Ax icx cybincha cyiꞌj ke tman ẍneꞌl ex cyiꞌj ke tal tman ẍneꞌl.
23 Te tibajxi e pon kꞌiꞌn ke tman chip twitz rey ex cywitz cycyakil tnam xjal te jun chojbil tuꞌn tnajset cyil, ex atzun cye cub cykꞌoꞌn cykꞌab cyibaj. 24 Cubtzun cybyoꞌn pal ke tman chip ex cub cykoꞌn cychcꞌel tibaj altar tuꞌn tnajset cyil aj Israel, porque xi tmaꞌn rey tuꞌn t-xi kꞌot chojbil patun in cub tuꞌn tnajset cyil cycyakil aj Israel.
25 Ax icx e cub tkꞌoꞌn Ezequías ke aj Leví tuj tja Kman, kꞌiꞌn ke lak cꞌuxbil cyuꞌn, cyucꞌix ke chnab arpa ex quitar. O bant jlu ic tzaꞌn otok cyaj cymaꞌn David tucꞌix Gad aju baꞌn nabin tuꞌn Dios, aju ajben ttxlaj David, ex tucꞌix Natán aju t-sanjel Dios, porque aju orden lu tuꞌn Kman otok tzaj tmaꞌn cye ke t-sanjel.
26 Waꞌltok ke aj Leví, kꞌiꞌntok ke chnab cyuꞌn, akeju otok che cyaj tkꞌoꞌn David, ex atzun cye pal kꞌiꞌntok ke chun cyuꞌn. 27 Xitzun tmaꞌn Ezequías tuꞌn t-xi kꞌot aju oyaj patun in cub tibaj altar. Ex tejtzun t-xi kꞌot oyaj, ax icx tzyet cybitzan te nimbil te Kman, cyucꞌix ke chun e oc kꞌajtzaꞌn, junx cyucꞌil ke chnab otok che cyaj tkꞌoꞌn David. 28 Atzun ke tnam xjal e cub mocꞌeꞌ te jun nimbil te Kman tej in che bitzantok ke bitzal, ex atzun ke pal in che kꞌajtzaꞌntok chun. Tcyakil jlu cucx o ten tejxi tcub baj tzꞌeꞌy oyaj patun in cub. 29 Tejtzun tbaj jlu, ate rey cyucꞌix cycyakil keju ateꞌtok tucꞌil e cub ẍmejeꞌ ex e cꞌulun te Kman. 30 Te tibajxi, ate rey Ezequías cyucꞌix ke xjal at cyoclen ttxlaj, xi cymaꞌn cye aj Leví tuꞌn tjaw cynimsaꞌn tbi Kman cyuꞌn ke salmo e cyaj ttzꞌiban David, ex keju e cyaj ttzꞌiban Asaf aju baꞌn nabin tuꞌn Dios. E octzun ten bitzal tucꞌil nim tzalajbil, ax icx e cub ẍmejeꞌ ex e cꞌulun te Kman.
31 Xitzun tmaꞌn Ezequías cye xjal: Tuꞌnju ma baj cyxjansan cyibe jaꞌlo twitz Kman, che lakꞌetztzune ex cyiꞌntze ke chojbil ex ke oyaj te akꞌbil chjonte tuj tja Kman. Xitzun cyiꞌn tnam xjal ke chojbil ex ke oyaj te akꞌbil chjonte, ex akeju o cyajbe tuꞌn t-xi cykꞌoꞌn ke oyaj patun in che cub, xi cykꞌoꞌn tuꞌn cyex cygan. 32 Ke alumaj pon cyiꞌn tnam xjal te chojbil patun in cub, 70 tor, jun syent tman ẍneꞌl ex cab syent tal tman ẍneꞌl. Tcyakil jlu ajben tuꞌn t-xi kꞌot te jun chojbil patun in cub twitz Kman. 33 Ex aju cyajlal alumaj xi cykꞌoꞌn te oyaj, japun kak syent wacẍ ex ox mil ẍneꞌl.
34 Ex tuꞌnju mya nim pal ateꞌ, mintiꞌ e canun tuꞌn tel cyiꞌn cytzꞌumal cycyakil alumaj te chojbil, cyjaꞌtzun e onin ke aj Leví cyiꞌj, akeju at cyxilen cyucꞌil, tuꞌn tbaj bant naj akꞌuntl, acux in baj cyxjansan cyib txkantl pal, porque ke aj Leví masxix cygan tuꞌn tbaj cyxjansan naj cyib cywitz ke pal. 35 Xitzun cykꞌoꞌn nim chojbil patun in cub, tucꞌix cysebyil ke chojbil te mojbabl tibil ex ju oyaj taꞌl twitz uva te cymoj oyaj patun in che cub.