—Cymanxe te Ezequías aju tkanil lu ma tzaj tmaꞌn aju nintz rey, aju rey cye aj Asiria: ¿Al iꞌj ma tzꞌoc keꞌ tcꞌuꞌja tuꞌnju ma jaw tiꞌn tiba tuꞌn tkꞌojina wiꞌje? 5 Chitzuna in tmaꞌna: At nnable ex at wipune tuꞌn nkꞌojine, pero nok tuꞌn ttziꞌya in tmaꞌna jlu. ¿Al iꞌj ma tzꞌoc keꞌ tcꞌuꞌja tuꞌnju ma jaw tiꞌn tiba tuꞌn tkꞌojina wiꞌje? 6 Baꞌn wuꞌne, a nnoꞌc keꞌ tcꞌuꞌja tiꞌj Ejipt. Pero ic tten Ejipt ic tzaꞌn jun ajlaj potzꞌnaj, oc ttzaj ktzyuꞌn tuꞌn tajben te kcyꞌakoꞌch ex ka ma txi kkꞌoꞌn kalil tibaj, in xi tzꞌupj tuj kkꞌab. Ictzun tten Faraón aju rey te Ejipt te cye cycyakil keju nnoꞌc keꞌ cycꞌuꞌj tiꞌj. 7 Ex ka ma cymaye weye: Keye, atzun nnoꞌc keꞌ kcꞌuꞌje tiꞌj Kmane aju Kdiose, ka che chiye, ¿myapetzun o che baj tkꞌuchin Ezequías ke lugar te cꞌulbil cyucꞌix ke altar teju Dios lu, ex o tma cye xjal ateꞌ tuj Judá ex tuj Jerusalén oꞌcx tuꞌn cycꞌulun twitz junx altar? 8 Binchama tiꞌj jun tyola tucꞌil npatrone aju rey te Asiria: Jacu txi nkꞌoꞌne cab mil chej teya, ka jacu che cnet ke xjal tuꞌna tuꞌn cychejin cyibaj. 9 Balpelo mlay tzꞌel ok jun nejenel cye soldad cye aj Asiria tuꞌna, aju mas chꞌin toclen, ex ¿che cnetelpetzun ke chej tuꞌna cyucꞌix ke xjal baꞌn che chejin tuj Ejipt? 10 ¿Chipetzuna ka nok tuꞌn wexe nnicꞌ ma chin tzaje tzalu tuꞌn woc tzokpaje tiꞌj tnam lu tuꞌn tcub nxitune? Ax toc ax Cydiose ma tzaj kꞌmante weye tuꞌn woc tzokpaje tiꞌj tnam lu tuꞌn tcub nxitune.

11 Xitzun cytzakꞌweꞌn Eliaquim, Sebna ex Joa teju xjal maꞌ toclen cyxol aj Asiria:

—Binchama xtalbil, yolina kucꞌile tuj yol aramey, porque atzun yol nneꞌl knicꞌe tiꞌj. Miꞌn tzaj yolina kucꞌile tuj yol ebrey, porque cycyakil xjal cyjax twi muro in che bin tiꞌj.

12 Atzunte ju xjal maꞌ toclen xi tmaꞌn cye cyjaꞌ:

—Baka tucꞌil cypatrone, ex baka cyucꞌile ẍin tzaj samaꞌne kꞌmalte jlu tuꞌn rey cye aj Asiria. Cyelpe ke xjal ateꞌjx twi muro, porque ake jlu icx che telba ic tzaꞌnx che telba cyeye, cxel cywaꞌn cytxaꞌ ex cxel cycꞌaꞌn cytzꞌaꞌl.

13 Ex cub weꞌ aju xjal maꞌ toclen ex jaw tkꞌajkꞌajel twiꞌ cyuwxix wen tuj yol ebrey ex tma:

—Cybintze aju ma tma ju nintz rey aju rey cye aj Asiria, chi in tmaꞌn cyjaꞌ: 14 Miꞌn txi cykꞌon cyibe tuꞌn cycub sbuꞌne tuꞌn Ezequías; mlay che clete tuꞌn. 15 Ka taj Ezequías tuꞌn tcub tiꞌj cynable tuꞌn, tuꞌn toc keꞌ cycꞌuꞌje tiꞌj Cydiose ex ka ma tma cyeye cyjaꞌ: Ax toc ate Kman Dios clolte ke, ex mlay takꞌ ambil tuꞌn tcub tiꞌj tnam lu tuꞌn tipumal rey te Asiria, ka chi Ezequías, 16 miꞌn txi cybiꞌne tyol. Ma chin tzaj lajoꞌne tuꞌn rey te Asiria kꞌmalte tuꞌn tbant tiꞌj jun kyol, tuꞌn miꞌn tten kꞌoj kxol ex tuꞌn taj cykꞌon cyibe tucꞌil, ex cyjaꞌtzun teyle junjun cyeye jacu nicꞌben tiꞌjx twitz t-uva ex tiꞌjx twitz t-higo, ex jacu che cꞌane aꞌ cyujx ke cyxoche. 17 Te tibajxitzun che xel kꞌiꞌne tuꞌn tuj jun txꞌotxꞌ ic tzaꞌnx cytanmiye, aju txꞌotxꞌ lu at triw ex at tkan uva tuj, jacu bant pan cyuꞌne ex taꞌl twitz uva te cycꞌaye. 18 Ka in tmaꞌn Ezequías cyeye cyjaꞌ: Ko cletel tuꞌn Kman, ka chi, miꞌn txi cykꞌoꞌne ambil te tuꞌn cycub sbuꞌne tuꞌn. Baka o che clet ke txkantl tnam cyuꞌn ke cydios tuj tkꞌab rey te Asiria. 19 ¿Jatum ateꞌ ke cydios aj Sefarvaim? Baka o clet tnam Samaria cyuꞌn tuj tkꞌab rey te Asiria. 20 ¿Alcyetzun cyxol cycyakil ke dios ateꞌ cyuj tnam lu ma che clet ke tnam cyuꞌn tuj tkꞌab rey te Asiria? ¿Tikuꞌn in cub cyximane ka jacu clet tnam Jerusalén tuꞌn Cydiose? Chi ju xjal maꞌ toclen cyxol aj Asiria.

21 Mintiꞌ e kꞌajt ke xjal ex misicyer jun yol xi cytzakꞌweꞌn, porque otok txi kꞌmaꞌn cye tuꞌn rey Ezequías tuꞌn miꞌn t-xi cytzakꞌweꞌn jun yol. 22 Tzajtzun tbis Eliaquim aju mayordom tuj tja rey, tucꞌix Sebna aju aj tzꞌibal te rey, ex tucꞌix Joa aju xjal mas maꞌ toclen ttxlaj rey, el cysbitꞌun cyxbalun ex e jeꞌx txꞌolbalte jlu te Ezequías tiꞌj ju otok tma ju xjal maꞌ toclen cyxol aj Asiria.