Ctzalajel aju lugar mintiꞌ cynajbil xjal tuj, ex aju tzkij txꞌotxꞌ ctzalajel nimxix ex che jawil pokꞌl nim bech twitz, 2 ctzajel tpokꞌsaꞌn nim bech ic tzaꞌn in tzaj pokꞌchaj nim bech lirio, ctzalajel nimxix ex cbitzal tucꞌil tzalajbil. Tbanilxix cꞌoquel tuꞌn Dios, ic tzaꞌn ju witz Líbano tbanilxix queꞌyin, ex ic tzaꞌn ju witz Carmelo tucꞌix chkꞌajlaj Sarón, tbanil txꞌotxꞌ ke. Cycyakil xjal cꞌoquel cyqueꞌyin aju t-spicꞌumal tajwalil Kman Dios. 3 E toc cyipun keju ma che sict ex e toc cyipun keju mintiꞌ cyipun. 4 Cymanxe cyjaꞌ cye keju baꞌn che xob: Cykꞌonc cyipune, miꞌn che xobe, lu Cydiose lu tuꞌn cyclete, ex ke aj kꞌoj cyiꞌje cbel tkꞌoꞌn cycastiw tuꞌntzun t-xelin mya baꞌn o cybincha cyiꞌje. 5 Cjaketel cywitz ke moẍ ex cbantel cybin keju chcyin cywiꞌ, 6 che jawil tꞌicpaj ke cox ic tzaꞌn masat, ex che jawil schꞌin ke men tuꞌn tzalajbil. Che jawitz jlet nim aꞌ tuj lugar mintiꞌ cynajbil xjal tuj, aju tzkij txꞌotxꞌ. 7 Aju tzkij txꞌotxꞌ nim taꞌw cyak tuj, cꞌoquel te jun nintz najab, ex nim twi aꞌ che jawitz jlet tuj tzkij txꞌotxꞌ. Tuj lugar jatum najl ke xoꞌj, ctzajel chꞌiy tkan ajlaj tucꞌix tkan chum in chꞌiy ttzi aꞌ. 8 Cbantel jun ninbe ma chixin ex cꞌoquel tbi: Aju be Xjan. Keju mya txꞌjomaj tuj cyanmi ex keju miban che niman, mlay che bet tuj. 9 Tuj be lu mlay che ten ke balun ex mlay che ul lakꞌeꞌ ke txcup baꞌn che biyun. Oꞌcx che betel tuj be lu ke xjal otok che tzokpet. 10 Che ul meltzꞌaj ke xjal ma che colpet tuꞌn Kman. Che oquex tuj tnam Sión in che bitzan tucꞌil tzalajbil, ex cucx che tel tuj tzalajbil. Cucx che tzalajel ex che tel tuj txubtxaj, mlay che tentl tuj bis ex mlay che ayayantl.