Che lakꞌetze bil akeye tnam, akeye nasyon cykꞌontz cywiꞌye tiꞌj. Baꞌn tuꞌn ttzaj tbiꞌn txꞌotxꞌ cyucꞌix keju ateꞌ twitz, baꞌn tuꞌn ttzaj tbiꞌn enter txꞌotxꞌ ex cycyakil keju in che tzaj chꞌiy twitz. 2 Porque ma tzaj tkꞌoj Kman cyiꞌj cycyakil nasyon ex cyiꞌj cycyakil ke cysoldad, ex ma cub cysentens tuꞌn cycub xitj ex tuꞌn cycyim. 3 Akeju che cymel cyxol, cucx che cyjel paleꞌ, cbajel noj twitz txꞌotxꞌ tuꞌn ttzuwil cyximlal ex cnojel twi witz tuꞌn cychcꞌel. 4 Cycyakil ke cheꞌw ateꞌ twitz cyaꞌj che bajel ulj, cjawil balkꞌiꞌn cyaꞌj ic tzaꞌn in jaw balkꞌit jun uꞌj, ex cycyakil ke cheꞌw che tzajel tzꞌak ic tzaꞌn in tzaj tzꞌak t-xak uva ex ka t-xak higo. 5 Ax toc, oc tbaj naj twitz cyaꞌj tuꞌn t-spad Kman, cbeletz cyibaj aj Edom tuꞌn tcub tcastiw ju tnam banin tiꞌj tuꞌn tnaj. 6 Cbajel noj tiꞌj t-spad Kman tuꞌn chicꞌ ex tuꞌn sebo, ic tzaꞌn in che cub byet ke tal tman ẍneꞌl ex ke tman chip te chojbil. Aju chojbil lu cbantel tuꞌn Kman tuj tnam Bosra ex nim xjal che bel byoꞌn tuj Edom. 7 Che bel byoꞌn ke xjal ic tzaꞌn in che cub byoꞌn ke wacẍ te tjakꞌ cꞌul, ke tal tman wacẍ ex ke tor; cbajel noj tuj cytanmi tuꞌn chicꞌ ex cnojel tkukil txꞌotxꞌ tuꞌn cysebyil cyimni. 8 Ax toc atzun kꞌij tuꞌn t-xelin tuꞌn Kman, atzun abkꞌi lu tuꞌn t-xelin tuꞌn Kman tiꞌj cybinchben ke aj Edom tiꞌj tnam Sión. 9 Ke tkꞌab xak ateꞌ tuj Edom che oquel ic tzaꞌn kꞌol in cꞌant, ex aju tkukil txꞌotxꞌ cꞌoquel ic tzaꞌn asufre; aju txꞌotxꞌ ccꞌantel ic tzaꞌn kꞌol in cꞌant. 10 Mlay cuꞌx yupj kꞌijl ex konicꞌan; cucx cjawil t-sibel. Tuj tcyakil tabkꞌiyil cyjel colin ex mi aꞌl jun xjal cbetel ma chixin. 11 Atzun che tel ke ẍin ex ke tol; cbajel cybinchaꞌn ke joj ex ke xitxꞌ cykꞌuꞌ tuj. Cꞌoquel txꞌotxꞌ lu tuꞌn Kman te jun lugar mintiꞌ ttxolil ex mi jun xjal cnajal tuj. 12 Mlay ten juntl maj jun cyrey tuꞌn tcawin cyibaj tnam, cycyakil ke nejenel cyxol che bel naj. 13 Tuj cyja ke cyrey che tzajel chꞌiy ke chꞌiꞌx, ex cyuj ke ja maꞌ cywaꞌl te cycolbil cyib che tzajel chꞌiy ke tkan la tucꞌix chꞌiꞌx cꞌul. Cꞌoquel te cynajbil wech ex te cyewbil cyib ke chyuꞌj avestrús. 14 Cꞌoquel cyucꞌin cyib ke jil najl tuj tzkij txꞌotxꞌ cyucꞌil ke xoꞌj, ex ke chip te tjakꞌ cꞌul ctzajel cytxcoꞌn ke cyucꞌil. Atzun cnajal ju lab in xobtzan konicꞌan ex cnetel jun lugar tuꞌn jatum tuꞌn tojlan. 15 Atzun cbantel cykꞌuꞌ ẍin, cbel cyjos, che jawil pokꞌl ke cyal ex che oquel cychmoꞌn tuꞌn cyoc cycwentin. Ex ax cꞌoquel cychmon cyib ke kꞌanjan, jun tman ex jun ttxuꞌ. 16 Cyqueꞌyincxe tuj libro te Kman ex cyschꞌiꞌn jawe: Mi jun cyxol ke jil lu cyjel naj ex mintiꞌ jun ctel mintiꞌ tmoj, porque axte Kman ma cub ximante te ex tuꞌn T-xew che bajel tchmoꞌn. 17 Ex teyle junjun ma txi tkꞌoꞌn tlugar jatum tuꞌn tten tuj, axte ma cub echante cytxꞌotxꞌ ex te jumajx che najal tuj; tuj tcyakil tabkꞌiyil te jumajx che najal tuj.