2 Nman, ttzaj tzꞌeꞌy tcꞌuꞌja kiꞌje, porque oꞌcx in ko ayone tiꞌj colbil tuꞌna. Cuchiwt tzꞌonina keye tcyakil prim ex colina kiꞌje tuj tkꞌijlalil yajbil. 3 Oc tbinjtz tkꞌajkꞌajel twiꞌya cyuwxix te xobtzabl, che elel ok ke tnam; ex oc toc tzokpaja cyiꞌj ke nasyon, cbajel cysputin cyib ke xjal ateꞌ cyuj. 4 Ke aj kꞌoj mer ic tzaꞌn txkan ẍplon, in che tzaj tuꞌn cyoc tzokpaj cyiꞌj ke nasyon ex in xi cyiꞌn cykꞌinumabl keju otok cub cyiꞌj cyuꞌn. 5 Maꞌxix toclen Kman, ex atzun taꞌ tnajbil tuj cyaꞌj; ke xjal ateꞌ tuj tnam Sión ma che oc te tzꞌaklxix tuꞌn ex tuj tumelxix in cybinchaꞌn jun tiꞌxti, 6 ex segurxix che oquel tcwentin. Aju nabl ex aju ojtzkibl ic cyten ic tzaꞌn jun kꞌinumabl in che clet xjal tuꞌn; ex aju tuꞌn kxob twitz Kman jun kkꞌinumabl jlu.

7 Cybinxe, ke xjal cyuw cycꞌuꞌj tuj kꞌoj in che schꞌin tuj cay tuꞌn cybis, ex lu nnoꞌc okꞌel cyuꞌn ke xjal e jeꞌx samaꞌn kꞌolte tkanil tuꞌn tweꞌ kꞌoj. 8 Ma che cyaj colin ke be ex misicyer jun xjal in bet cyuj. Ma cub xitj ju yol ex ju trat cyaj bant tiꞌj, ex mi jun xjal in niman te juntl. 9 Aju txꞌotxꞌ puro bis taꞌ ex ke tzeꞌ twi witz Líbano ya ma tzkij cyxak ex tuj chꞌixbajil ateꞌ; aju chkꞌajlaj Sarón ma tzꞌoc ic tzaꞌn tzkij txꞌotxꞌ, ex ke tzeꞌ tuj txꞌotxꞌ Basán cyucꞌix keju ateꞌ twi witz Carmelo, ma cub baj tilj cyxak.

10 Chi Kman cyjaꞌ: Chin jawil weꞌye jaꞌlo tuꞌn t-xi nyecꞌune tcyakilju woclene maꞌxix ex ju wajwalile. 11 Aju ximbetz ma baj cynacꞌuꞌne tiꞌj tuꞌn tbant cyuꞌne, cꞌoquel ic tzaꞌn chꞌim ex ic tzaꞌn tzꞌis; ax cyxewe nneꞌtz tuj cytziꞌye cꞌoquel ic tzaꞌn kꞌakꞌ tuꞌn cynaje tuꞌn. 12 Ke tnam che oquel te tzaꞌj oc cynaj tuꞌn kꞌakꞌ, ic che oquel ic tzaꞌn tkan chꞌiꞌx in jaw txꞌemit ex nnoꞌcx kꞌot tuj kꞌakꞌ tuꞌn tcꞌant. 13 Akeye xjal najchak ateꞌye, cybintze aju o nbinchaye, ex akeye nikayin ateꞌye, tzꞌelx cynicꞌe tiꞌj wipumale.

14 Ke xjal aj il tuj tnam Sión nimxix cyxobil ma tzaj, ex ke xjal binchal mya baꞌn ma che jaw luꞌlun ex in cymaꞌn: ¿Alcye jun ke jacu cyaj ankꞌin tuj jun kꞌakꞌ in baj naj tcyakil tuꞌn? ¿Alcye jun ke jacu cyaj ankꞌin tuj jun kꞌakꞌ in cꞌant te jumajx? 15 Aju xjal in bet tuj tumelxix, ex in yolin axix toc, ex mya tuꞌn pwak nneꞌl tiꞌn te juntl xjal nnoꞌc te kꞌinun, ex mintiꞌ in tkanin oyaj tuꞌn t-xi tbinchaꞌn cyiꞌj xjal, ex mintiꞌ in xi tbiꞌn cyyol ke xjal cyaj tuꞌn tcub cybyoꞌn juntl xjal, ex mintiꞌ nnoꞌc tkꞌoꞌn twitz tiꞌj ju mya baꞌn, 16 cꞌankꞌil tuj txubtxaj ex mi aꞌl jun clabtel tiꞌj, cnetel jun tcolbil tib cywiꞌ ke matij pic, ex cucx cnetel twa ex tcꞌa.

17 Oc cyilaꞌye aju rey tuj tajwalil, ex najchak cpol baj tmojonil txꞌotxꞌ. 18 Oc ttzaj cynaꞌne aju tchiylal icꞌ cyiꞌje, oc cymaꞌye cyjaꞌ: ¿Jatum taꞌ aju kꞌil tajlal ke chojbil? ¿Jatum taꞌ aju malol pwak ka cabal taꞌ? ¿Jatum taꞌ aju kꞌil cyajlal ke ja maꞌ cywaꞌl te cycolbil cyib xjal? Che chiloye. 19 Mlay tzꞌoc cyqueꞌyintle ke aj kꞌoj jawni cywitz, akeju mintiꞌ nneꞌl knicꞌ tiꞌj cyyol, jun yol t-scun tib ex misicyer jun nneꞌl tnicꞌ tiꞌj. 20 Cyqueꞌyinxe aju tnam Sión, jatum in nicꞌset kninkꞌij, cꞌoquel cyqueꞌyine aju tnam Jerusalén tuj txubtxaj taꞌ; ic cꞌoquel ic tzaꞌn jun xbalun ja mlay tzicꞌ yucut, mlay che jatz baket ke stac te tzuybil te ex mlay che tzakj ke cꞌalbil te. 21 Atzun tzul tyecꞌun tib Kman ke tucꞌil tajwalil. Tuj lugar lu ateꞌ ke nima maꞌ cywitz, mlayx che pon lakꞌeꞌ aj kꞌoj cyucꞌil cybarc, mi keju cyuꞌnx in xi cyjawoꞌn cybarc cyuꞌn txkan palet, ex mi ke barc matij. 22 Porque ate Kman cꞌoquel te kjwes, a ckꞌolte ley ke, a cꞌoquel te krey ex a colol kiꞌj. 23 Mintiꞌ ma tzyet ju tzeꞌ tcub tuj cymij ke nmak barc cyuꞌn ke takꞌal, ex aju xbalun jatum nnoꞌc cykꞌikꞌ te lamobl cye barc mintiꞌ ma bant tlicꞌet. Nimxix kꞌinumabl cꞌelel kꞌiꞌn cyiꞌj aj kꞌoj, ex cyucꞌix ke cox che oquel ten kꞌilte kꞌinumabl. 24 Mi jun xjal najl tuj tnam oc tmaꞌ cyjaꞌ: Yab kine, chiwt, porque cbel tnajsaꞌn Dios aju cyil aj Sión.