Isaías 32

Tzul jun rey tzꞌaklxix tuꞌn tcawin

Cꞌoquel jun rey ccawil tuj tumelxix, ex ke nejenel che cawil tuj tumelxix. 2 Teyle junjun cye che oquel ic tzaꞌn jun lugar te cycolbil cyib xjal oc ttzaj cykꞌikꞌ, ex ic tzaꞌn jun cycolbil cyib te cykꞌikꞌ jbal; ic che oquel ic tzaꞌn jun tbeyil aꞌ in pon te aꞌlbil tuj jun tzkij txꞌotxꞌ ex ic che oquel ic tzaꞌn t-xlecumal jun nintz pic tuj jun lugar tzkij txꞌotxꞌ. 3 Mlay moẍxix cywitz keju in che queꞌyin, ex keju in che bin, cbel cykꞌoꞌn cywiꞌ tiꞌj tuꞌn cybinte ju yol. 4 Mya nok tuꞌn cyex twitz cbantel jun tiꞌxti cyuꞌn, nok oꞌcx cbantel cyuꞌn tucꞌil nabl, ex ke xjal ẍtꞌab che yolin, che yolil clarxix wen. 5 Aju xjal mintiꞌ tnabl, mlay cyma xjal tiꞌj ka mejor tmod, ex mlay cyma xjal ka maꞌ toclen jun xjal jawni twitz tuꞌn tbinchante mya baꞌn. 6 Porque aju xjal mintiꞌ tnabl in yolin tiꞌj ju yol mintiꞌ tnabl ex in cub t-ximan jun ximbetz mya baꞌn; toc tilil tuꞌn tuꞌn tbinchante jun il maꞌxix ex in nicꞌan yol tiꞌj Kman; mintiꞌ in xi tkꞌoꞌn chꞌin twa ju xjal at weꞌyaj tiꞌj ex mintiꞌ in xi tkꞌoꞌn chꞌin tcꞌa aju at txketleꞌn tiꞌj. 7 Aju xjal jawni twitz tuꞌn tbinchante mya baꞌn nim in sbun, ex in baj t-ximan tiꞌj tuꞌn tbinchante mya baꞌn; toc tilil tuꞌn tuꞌn tbinchan mya baꞌn tucꞌil nicꞌaj yol cyiꞌj ke meba xjal; ax icx in tbinchan cyiꞌj ke xjal chꞌin cyoclen, akeju in che kanin tuꞌn t-xi binchaꞌn cyiꞌj. 8 Atzun ke xjal baꞌn cynabl, in baj cynacꞌuꞌn tiꞌj tuꞌn cybinchante ju baꞌn, ex waꞌlxix ke tuj cynabl baꞌn.

Xi kꞌmaꞌn jun yol cye ke xuꞌj mintiꞌ cyaj tiꞌj aju tzul

9 Akeye xuꞌj mintiꞌ cyaje tiꞌj aju tzul, cybintze aju cxel nmaꞌne cyeye: Akeye xuꞌj kꞌukl cycꞌuꞌje, cybintze ke nyole: 10 Jaꞌlo kꞌukl cycꞌuꞌje, pero te tibajxi chꞌintl jun abkꞌi, ctzajel tchiylal cyiꞌje, porque cbajel tkꞌijlalil twitz awal ex mlay che chmone mastl tiꞌj twitz uva. 11 Akeye xuꞌj mintiꞌ cyaje tiꞌj aju tzul ex mintiꞌ chꞌin cybise, che luꞌlune; akeye kꞌukl cycꞌuꞌje, tzajx tchi cyiꞌje, cyiꞌn ele tbanil xbalun toc cyiꞌje ex cykꞌon oque xbalun chꞌiꞌx twitz te jun techal cybise. 12 Cykꞌajtzaꞌn oque ttzi cyxuꞌque tuꞌn taꞌw cꞌixcꞌoj, tuꞌnju che najel ke cojbil tbanilxix ex ke tkan uva in cykꞌoꞌn nim cywitz. 13 Ctzajel chꞌiy tkan chꞌiꞌx ex chcꞌul tuj tnam etzan wuꞌne ex cyuj cycyakil ke ja ateꞌ tuj tnam jatum at nim tzalajbil ex achbil. 14 Cyjel tcolin tja rey, ex ju nintz tnam jatum ateꞌ nim xjal, mintiꞌ xjal cyjel ten tuj, ke ja maꞌ cywaꞌl te cycolbil cyib xjal che cyjel colin te jumajx, ex atzun che tel ke bur te tjakꞌ cꞌul tuj ex cꞌoquel te cywabl alumaj.

15 Pero ctzajel tkꞌoꞌn Kman T-xew tuꞌn tten juntl maj kucꞌil; aju tzkij txꞌotxꞌ cꞌoquel juntl maj te cojbil ex aju cojbil cꞌoquel ic tzaꞌn jun nmak chcꞌul tbanilxix. 16 Tuj tcyakil lugar cbinchetel aju tzꞌaklxix ex aju tuj tumelxix. 17 Octzun tbinchet aju tzꞌaklxix, biꞌx cwebel kꞌoj, che tel xjal tuj tzalajbil ex biꞌx ckebil cycꞌuꞌj te jumajx. 18 Ke xjal etzan tuꞌn Dios che tel tuj txubtxaj, ex che najal cyuj ke ja segurxix te ojlabl. 19 Masque biꞌx ma che baj naj ke tzeꞌ tuj chcꞌul tuꞌn sakbakun ex masque biꞌx ma naj tnam, 20 atzun cyeye che tele tuj tzalajbil, ctel nim aꞌ te aꞌlbil cyawale ex che tzokpetel cyburre ex ke cywacẍe tuꞌn cyxiꞌ waꞌl.