Jun yol cyiꞌj keju in che jyon onbil tuj Ejipt
31
Ay becꞌbil cywitz ke xjal in cheꞌx tuj Ejipt jyolte onbil, keju nnoꞌc keꞌ cycꞌuꞌj cyiꞌj ke chej, keju in keꞌ cycꞌuꞌj tuꞌnju at nim cycarwaj at ma chixin ex tuꞌnju nimxix cyipun ke soldad cyjax cyibaj cychej aj Ejipt. Tuꞌntzun jlu mintiꞌ nnaꞌjtz cyiꞌj tucꞌil ju Dios Xjan cye aj Israel ex mintiꞌ in xi cykanin onbil te Kman. 2 Pero ax icx te Dios nimxix tnabl at, ex jacu tzaj t-samaꞌn ju yajbil, ex oc tmante jun tyol syempr in japun tuꞌn; cbel tkꞌoꞌn cycastiw ke binchal mya baꞌn, cyucꞌix keju onil cye binchal il. 3 Ke aj Ejipt, xjal ke ex mya Dios ke; ke cychej at cychibjal ex mya xewbaj ke. Cbel tkꞌoꞌn Kman cycastiw, tzaꞌnxix ju tnam Ejipt in colin, ax icx ju tnam in clet tuꞌn, junx che najel cycabil.4 Chi Kman tzaj tmaꞌn weye: Ic tzaꞌn jun balun otok cub jun ẍneꞌl tuꞌn, mintiꞌ in tzaj cychi pastor tiꞌj masque baj cychmon cyib cycyakil tuꞌn cyoc ten secꞌpulte te tuꞌn tkꞌajkꞌajel cywiꞌ oc cyjaw schꞌin, cyjaꞌxtzun, oc tul Kman aju Tajaw Tcyakil twi witz Sión, tuꞌn tcolin cyiꞌj ke xjal etzan tuꞌn. 5 Ic tzaꞌn jun chyuꞌj cwentin tkꞌuꞌ tuꞌn ex in lipan tibaj, cyjaꞌxtzun ccolol Kman aju Tajaw Tcyakil tiꞌj tnam Jerusalén; cꞌoquel tcwentin, ccletel tuꞌn, ccolil tiꞌj ex ctzokpetel tuꞌn.
6 Akeye aj Israel, cyajtz meltzꞌaje tucꞌil Dios aju ma tzꞌel cypaꞌn cyibe tiꞌj. 7 Porque tuj tkꞌijlalil tzul cꞌelel cyicꞌune ke tilbilal kꞌan pwak ex sak pwak cytxꞌotxꞌil, akeju tuꞌnx cykꞌabe e bant tuꞌn cybinchane il. 8 Che bel byoꞌn aj Asiria tuꞌn spad, pero mya tuꞌn tipumal jun xjal. Tuj kꞌoj lu che elel ok ke cysoldad aj Asiria, ex ke cuꞌxun nim cyipun tuꞌn cykꞌojin che oquel te majen; 9 tuꞌnju tchiylal lu cꞌelel ok cyrey aj Asiria, ex cyjel cycolin ke capitán cybander oc cyel ok tiꞌj. A jlu a Kman in kꞌmante, ka tuj tnam Jerusalén at jun kꞌakꞌ tuꞌn tcub cycastiw ke aj kꞌoj.