Jun yol cyiꞌj keju in keꞌ cycꞌuꞌj tuꞌn cyclet cyuꞌn aj Ejipt
30
Chi Kman in tmaꞌn: Ay becꞌbil cywitz ke cꞌwaꞌlbaj miban che bin, in cub cyximan alcye tuꞌn tbant cyuꞌn, pero mintiꞌ in tzaj cykanin weye ex in mojeꞌ jun cyyol cyucꞌil mastl xjal mintiꞌ o txi nmaꞌne cye tuꞌn cybinchante, ex tuꞌntzun jlu in chmet nimxix il cyuꞌn. 2 Jurat naj in cheꞌx tuj Ejipt ex mintiꞌ in tzaj cykanin weye, in che jyon colbil cye tucꞌil rey Faraón ex in keꞌ cycꞌuꞌj tiꞌj tnam Ejipt tuꞌn cyclet. 3 Pero aju colbil cyeye tucꞌil rey Faraón mlay japun, ex aju nnoꞌc keꞌ cycꞌuꞌje cyiꞌj aj Ejipt, cꞌajbel te jun xitbil cyeye. 4 Masque otok cheꞌx cysamaꞌn ke xjal maꞌ cyoclen tuꞌn cyyolin cyucꞌil aj Ejipt max tuj tnam Zoán ex Hanes, 5 cycyakil cbel cychꞌixwi tuꞌn tnam lu aju mintiꞌ tajben ex mintiꞌ onbil tuꞌn, ax icx mintiꞌ jun baꞌn cbinchanjtzel cyeye tuꞌn, nok oꞌcx bis ex chꞌixbajil tzul tkꞌoꞌn cyiꞌje.6 Jun yol tzaj kꞌmaꞌn cyiꞌj ke txcup tuj txꞌotxꞌ Néguev: In che bet xjal tuj jun lugar xobajil jatum in che tzanun ke balun, ex jatum ateꞌ ke lobaj kꞌantiꞌ ex ke lobaj baꞌn che lipan, in xi cyiꞌn xjal cypwak ex cykꞌinumabl ttzal cyiꞌj ke chej bur ex cyibaj ke chej camey tuꞌn tpon cyiꞌn tuj Ejipt, aju tnam mintiꞌ tajben cye, 7 mintiꞌ tipumal ex mlay bant tuꞌn tkꞌonte onbil. Tuꞌntzun jlu ma tzꞌoc nkꞌoꞌne tbi cyjaꞌ: Jun maꞌ txcup in tzanun wen, pero mintiꞌ chꞌin in bant tuꞌn. 8 Ttzaja jaꞌlo ex tzꞌibancuya twitz jun tzꞌlom, kꞌon cuꞌxa tuj jun libro, tuꞌntzun tcyaj ten tuꞌn tajben te tibajxi ic tzaꞌn jun yol mintiꞌ bajsbil te. 9 Ke xjal lu miban che bin, mintiꞌ in japun ju yol cyuꞌn ex mintiꞌ cyaj tuꞌn t-xi cybiꞌn aju xnakꞌtzbil tuꞌn Kman. 10 In xi cymaꞌn cye ke xjal baꞌn che nabin: Cuchiwt miꞌn tzaj yecꞌun jun tiꞌxti cyeye ic tzaꞌn tuj witzicꞌ, che chi, ex in xi cymaꞌn cye cyjaꞌ: Miꞌn tzaj cytxꞌolbaꞌne ju yol ax toc keye; cymantze jun yol in ko tzalaje tiꞌj ex miꞌn tzaj cymaꞌne jun yol axix toc. 11 Cypaꞌn el cyibe tiꞌj ju be ex miꞌn che bettle tuj be ax toc, miꞌn che yoline mastl tiꞌj ju Dios Xjan cye aj Israel, porque miꞌn kajtle ko bine tiꞌj, che chi xjal. 12 Tuꞌntzun jlu in tmaꞌn aju Dios Xjan cye aj Israel: Nneꞌl cyicꞌune aju yol in xi kꞌmaꞌn cyeye ex nnoꞌc keꞌ cycꞌuꞌje tiꞌj pwak nneꞌl cyxcꞌayine cyiꞌj xjal, tucꞌix tiꞌj ju mya baꞌn in cybinchaꞌne, ex cyiꞌjtzun jlu nnoꞌc keꞌ cycꞌuꞌje; 13 cyjaꞌtzun akeye at cyile tuꞌn tlaj jlu. Ic cytene ic tzaꞌn jun muro o txi pax ex minaben jacu cub tilj; 14 che najele ic tzaꞌn in cub buchj jun cꞌil, biꞌx in cub buchj tcyakil ex misicyer jun piẍ ttxꞌakan in cyaj ten tuꞌn tajben tuꞌn tetz kꞌit xkꞌaꞌl tuj kꞌakꞌ, ex ka tuꞌn tjatz palut chꞌin aꞌ tuj xoch.
15 Chi Kman aju Dios Xjan cye aj Israel: Ka ma che ajtz meltzꞌaje wucꞌile ex ka ma che cub txuleye, octzun che cletele. Ka ma che cub txuleye ex ka ma keꞌ cycꞌuꞌje wiꞌje, octzun cycꞌmaꞌye cyipumale. Atzun cyeye mintiꞌ in cub tuj cywitze, 16 ex o cymaye cyjaꞌ: Miꞌn, mas baꞌn tuꞌn kxi oke cyibaj chej, che chiye. Baꞌn, il tiꞌj tuꞌn cyel oke. Ex cymatle: Ko elex oke cyibaj ke chej cyuw che bet. Baꞌn, pero ax cyuw che bet keju che oquel lpeꞌ cyiꞌje tuꞌn tcub cyiꞌje cyuꞌn. 17 Jun mil cybete cꞌelel ok tuꞌn jun xjal in xobtzan cyiꞌje, ex cycyakile che elel oke cyuꞌn jweꞌ ocxi cycyaj tene mya nim cybete, ic tzaꞌn in cyaj ten jun tzeꞌ twi witz ex ka ic tzaꞌn in cub kꞌoꞌn jun bander twiꞌ jun tal witz.
Xi ttziyan Kman jun yol cye aj Israel, tuꞌn ttzaj kꞌakꞌan tcꞌuꞌj cyiꞌj
18 Cyjaꞌtzun in ayon Kman cyiꞌje tuꞌn ttzaj kꞌakꞌan tcꞌuꞌj cyiꞌje, ex nimxix tajbil tuꞌn t-xi tyecꞌun tcꞌujlalil cyeye, porque ate Kman jun Dios tzꞌaklxix. At nim tzalajbil cye cycyakil keju in keꞌ cycꞌuꞌj tiꞌj.
19 Akeye aj Sión najlkeye tuj Jerusalén: Mlay che okꞌe mastl. Ctzajel tzꞌeꞌy tcꞌuꞌj Kman cyiꞌje oc tbinte in che schꞌine ex in che kanine onbil, ex oꞌcx oc cybinjtze tuꞌn, che tzajel tzakꞌweꞌne tuꞌn. 20 Ex masque tzaj tkꞌoꞌn Kman cyeye aju cꞌixbisabl ex yajbil, mlay txi tewan mastl tib cywitze aju xnakꞌtzal cyeye, ex oc cyilaꞌye cyuꞌn ke tbakꞌ cywitze. 21 Ex ka ma cheꞌxe tuj be, ka tuj bankꞌabaj ex ka tuj nayaj, oc cybiꞌye jun tkꞌajkꞌajel cyiꞌjtzeye in tmaꞌn cyjaꞌ: Lu ju be lu, cyxiꞌye tuj. 22 Ex cꞌelel cyicꞌune ke tilbilal nnoꞌc cydiosine, cꞌoquel cykꞌoꞌne te tzꞌil ex cꞌelex cyxoꞌne, ic tzaꞌn tzꞌis. 23 Ctzajel tkꞌoꞌn Kman jbal tibaj cyiyaje ma cuꞌx cyawaꞌne ex ctzajel tchꞌisan txꞌotxꞌ nimxix triw ex tbanilxix. Tuj tkꞌijlalil lu ctel nim lugar cye cyalune jatum tuꞌn cywaꞌn tuj. 24 Cyucꞌix ke wacẍ ex ke chej bur, akeju in che chꞌoquin tuj cycojbile, ctel cywa tbanilxix ex cheba binchamaj. 25 Oc tpon tkꞌijlalil tuꞌn cybyet nim xjal ex oc cycub xitj ke ja maꞌ cywaꞌl te cycolbil cyib xjal, che jawil jlet ke nima ex cbetel nimxix aꞌ cyuj tkꞌab xak cywiꞌ ke nmak witz ex cywiꞌ ke tal witz. 26 Cꞌoquel tpotzin Kman ẍil toc cyiꞌj ke xjal etzan tuꞌn ex cꞌoquel tkꞌanan aju ẍil tuꞌnx oc tkꞌoꞌn. Aju t-spicꞌumal xjaw cꞌoquel ic tzaꞌn t-spicꞌumal kꞌij, ex aju kꞌij oc tkꞌaꞌ t-spicꞌumal nimxix wen ic tzaꞌn tuꞌn tcꞌant t-spicꞌumal wuk kꞌij junx.
Aju castiw tzul cyibaj aj Asiria
27 Cyqueꞌyinxe, twitzel Kman cyjaꞌ ttzaj najchak tucꞌil nimxix tkꞌoj, ic tzaꞌn txkan sib nimxix wen, in yolin tucꞌil nim ttxꞌuꞌjil, aju tyol mer ic tzaꞌn jun kꞌakꞌ in baj tzꞌeꞌy tcyakil tuꞌn, 28 aju t-xew mer ic tzaꞌn jun nima in chꞌiy nimxix ex in japun max tjakꞌ tkul jun xjal; tzul tuꞌn cybaj tchitoꞌn ke nasyon ic tzaꞌn tuꞌn sarand, tuꞌntzun cynaj ex tuꞌn tocx tkꞌoꞌn jun pren tuj cytziꞌ ke xjal tuj nimcu tnam, tuꞌn cyel tzpet tuꞌn. 29 Atzun cyeye, che bitzale ic tzaꞌn tuj jun ninkꞌij xjan te konicꞌan; ctzalajel cyanmiye ic tzaꞌn jun xjal in bet tucꞌil tkꞌajkꞌajel twi xux tuꞌn t-xiꞌ twi witz etzan tuꞌn Kman, jatum in che clet aj Israel. 30 Ckꞌajtel Kman tuꞌn tbinjtz tkꞌajkꞌajel twiꞌ maꞌxix t-xilen, ex ctzajel tyecꞌun tipumal tucꞌil ttxꞌuꞌjil xobajilxix, tucꞌil kꞌakꞌ aju in baj tzꞌeꞌy tcyakil tuꞌn, tucꞌil tkan kꞌancyok, ex tucꞌil jbal ex sakbakun. 31 Porque oc cybinte aj Asiria tkꞌajkꞌajel twi Kman ex oc tcub cycastiw, ctzajel nimxix cyxobil, 32 ex teyle junjun maj, oc tcub tkꞌoꞌn Kman cycastiw, che oquel kꞌajtzaꞌn ke tampor ex ke chnab arpa. Cyuwxix cꞌoquel ten Kman kꞌojlel cyiꞌj. 33 Ma bant-xi nim tyemp banimaj jun lugar te cyrey aj Asiria in cꞌant tuj tuꞌn nimxix siꞌ, maꞌ twitz ex maꞌxix t-xeꞌ, cjawil t-xupin Kman tuꞌn tcꞌant ic tzaꞌn txkan asufre in cꞌant ex in bet ic tzaꞌn jun nima.