Ay becꞌbil twitz tnam Ariel, aju tnam jatum najan David tuj. E cyicꞌsan ninkꞌij juntl cab ox abkꞌi ic tzaꞌnx in cybinchaꞌn, 2 pero ctzajel nim cꞌixbisabl tiꞌj tnam Ariel wuꞌne ex tuj tnam lu cꞌoquel okꞌel ex che ayil xjal. Cꞌoquel tnam te weye ic tzaꞌn jun altar jatum in che cub patit ke oyaj. 3 Che xel nsamaꞌne ke nsoldadiye tuꞌn tbaj cytxolban cyib tiꞌjele tnam, cꞌoquel nkꞌoꞌne jun peꞌn tiꞌjele ex che jawil nbinchaꞌne ke ja te cycolbil cyib ke soldad, tuꞌntzun cyoc tzokpaj tiꞌj. 4 Che bel numj xjal oc cycyaj paleꞌ twitz txꞌotxꞌ; aju tkꞌajkꞌajel cywiꞌ cꞌoquel ic tzaꞌn tbinx tkꞌajkꞌajel jun lab ex ic tzaꞌn tkꞌajkꞌajel twiꞌ jun xjal in jasun. 5 Ke aj kꞌoj tiꞌj tnam Jerusalén nimxix cybaj che oquel ic tzaꞌn kuk, ke aj kꞌoj tiꞌj nimxix cybaj akeju in che baj yajlante cye xjal, che xel ikan ic tzaꞌn in xi ikan tmuꞌpil triw tuꞌn cykꞌikꞌ minaben, te jurat naj. 6 Cbel cycastiw aj kꞌoj tuꞌn Kman aju Tajaw Tcyakil, tuꞌn tkꞌajkꞌajel twiꞌ kꞌancyok, tuꞌn cyaknajnab, tuꞌn nintz tkꞌajkꞌajel, tuꞌn xcyakinpaẍ cyuwxix wen, tuꞌn cykꞌikꞌ jbal ex tuꞌn kꞌakꞌ in baj tzꞌeꞌy tcyakil tuꞌn. 7 Cycyakil tnam lu miban cyajlanjtz, akeju in che kꞌojin tiꞌj Ariel, cycyakil keju in che kꞌojin tiꞌj ex ma che oc tzokpaj cyiꞌj ke ja maꞌ cywaꞌl te cycolbil cyib, ax icx keju in che yajlan cyiꞌj che oquel ic tzaꞌn jun witzicꞌ, ex ka ic tzaꞌn jun in tzaj yecꞌun te xjal te konicꞌan tuj twitzicꞌ. 8 Che oquel ic tzaꞌn jun xjal nneꞌl tcꞌuꞌj ex ma tzꞌoc twitzicꞌ ex tuj twitz ka in waꞌn, pero oc tul tnabl ttenx tcꞌuꞌj nneꞌl; ex ka ic tzaꞌn jun xjal in txket tiꞌj tcꞌuꞌj ex ma tzꞌoc twitzicꞌ ex tuj twitz ka in cꞌan, pero oc tul tnabl ttenx in txket tiꞌj tcꞌuꞌj ex puro tzkij tuj tkul. Cyjaꞌtzun cbajel cyiꞌj cycyakil tnam miban cyajlanjtz, akeju in che kꞌojin tiꞌj tnam tcub twi witz Sión.