Xi kꞌmaꞌn cye aj Samaria tuꞌn tcub cycastiw
28
Ay becꞌbil twitz tnam Samaria, aju toc te maꞌ toclen cyuꞌn aj Efraín, jatum puro cꞌal kꞌeꞌn ke xjal; ic tten tnam Samaria ic tzaꞌn ke bech tbanilxix in che tzkij naj, tcubsaꞌn twi witz ex ateꞌ ke tbanil txꞌotxꞌ t-xeꞌyile; ke xjal tuj tnam lu, nim in che cꞌan vin. 2 Pero tzul t-samaꞌn Kman jun xjal nimxix tipun, nim tipumal ic tzaꞌn txkan sakbakun, ic tzaꞌn jun nintz cykꞌikꞌ in baj naj nimcu tuꞌn, ic tzaꞌn txkan jbal nim tuj in ten ex in che naj txꞌotxꞌ tuꞌn aꞌ. Tuꞌnju tipumal xjal lu, cbel t-xoꞌn aju tnam Samaria twitz txꞌotxꞌ, 3 ex cbajel twaban aju nintz tnam toc te maꞌ toclen cyuꞌn aj Efraín, aju tnam cye cꞌal kꞌeꞌn. 4 Ic tten Samaria ic tzaꞌn bech tbanilxix pero jurat naj in tzkij, aju tcubsaꞌn twi witz ex ateꞌ ke chkꞌajlaj tbanil txꞌotxꞌ t-xeꞌyile; ic cꞌoquel ic tzaꞌn twitz higo in tzaj kꞌanax nej, ka ma tzꞌoc queꞌyin tuꞌn jun xjal ex ka ma canun tuj tkꞌab, jurat in xi tloꞌn.5 Tuj tkꞌijlalil tzul cꞌoquel Kman aju Tajaw Tcyakil te maꞌxix toclen ex tbanilxix, ex cꞌoquel te jun mejor adorn te cye ke xjal che cyjel ten cyxol keju etzan tuꞌn, 6 ex a ckꞌmalte tzaꞌn cteꞌla xtis cyuꞌn ke jwes tuj jusgad, tuꞌn t-xi binchet cyiꞌj xjal tuj tumelxix, ex a cxel kꞌonte cyipumal ke soldad tuꞌn tbant cycolin tiꞌj tnam.
Xi kꞌmaꞌn cye aj Jerusalén tuꞌn tcub cycastiw
7 Ax icx at junjuntl in che ẍocpajeꞌ tuꞌn cycꞌa vin ex in che jaw tolj tuꞌn kꞌeꞌn, ex atzun ke jlu: Ke pal ex ke t-sanjel Dios in che ẍocpajeꞌ tuꞌn kꞌeꞌn, ex biꞌx nneꞌl cynabl tuꞌn cycꞌa vin, in che jaw tolj tuꞌn cycꞌaben kꞌeꞌn, in che ẍocpajeꞌ oc in tzaj yecꞌun jun tiꞌxti cye ic tzaꞌn tuj witzicꞌ, ex chyomni cywiꞌ oc tcub cykꞌoꞌn cysentens xjal. 8 Tcyakil twi cymes nojni tuꞌn cyxaꞌw ex misicyer chꞌin sak taꞌ cyuꞌn.
9 In che yolin wiꞌje ex in cymaꞌn: Baka a jlu cxnakꞌtzal ke, ex baka a jlu ckꞌmalte tyol Dios ke. Baka tal cꞌwaꞌl koꞌ ex baka ma in ko el tiꞌj kchꞌuꞌ. 10 Porque elaꞌ maj in tmaꞌn ke ax mandamyent, ax xnakꞌtzbil, ax junjun txol yol, chꞌinak in tzaj t-xnakꞌtzaꞌn ke junjun maj, che chi xjal wiꞌje.
11 Ax baꞌn ka mintiꞌ ma txi cyniman xjal nyole, ate Dios c-yolil cyucꞌil tucꞌil yol t-scun tib ex cyyol junxitl cꞌloj xjal. 12 Porque nej otok tma Dios cye: Lu jun ojlabl lu tuꞌn tojlan ju xjal otok sict, pero mintiꞌ ma txi cybiꞌn. 13 Tuꞌntzun jlu elaꞌ maj cxel tmaꞌn Kman cye ax mandamyent, ax xnakꞌtzbil, ax junjun txol yol, chꞌinak cxel t-xnakꞌtzaꞌn cye junjun maj. Che jawil tolj octzun cyoc ten betel, ttzal cyiꞌj cxel cykꞌaꞌcj twitz txꞌotxꞌ, che cꞌixbajel, che oquel tuj cꞌobil ex biꞌx che tzyetel tuꞌn.
14 Cybintze tyol Kman akeye xjal xmayil in che cawine tuj tnam Jerusalén. 15 In cymaꞌne cyjaꞌ: O cyaj bant tiꞌj jun kyole tucꞌil camic, ex ma bant jun ktrate tucꞌil cynajbil cyimni, tuꞌntzun miꞌn tcanun aju cꞌixbisabl xobajilxix kiꞌje oc tul, porque ma cnet jun kcolbil kibe tuꞌnju nicꞌaj yol ex sbubl.
16 Tuꞌntzun jlu in tmaꞌn Kman cyjaꞌ: Cbel nkꞌoꞌne jun abj tuj tnam Sión, jun abj scꞌoꞌmaj ex wiꞌyilxix, aju cꞌoquel te nimxix tajben ex te t-simyentil ja. Alcye ma tzꞌoc keꞌ tcꞌuꞌj tiꞌj, mlay tzaj baj tcꞌuꞌj. 17 Oc tjaw nbinchaꞌne tnam Sión, cxel nbinchane cyiꞌj xjal tuj tumelxix ex tzꞌaklxix, ic tzaꞌn jun binchal ja in ajben plom tuꞌn, tucꞌix nivel. Atzunju cycolbil cyibe ma cnet cyuꞌne tuꞌn nicꞌaj yol, biꞌx cnajel tuꞌn sakbakun, ex aju lugar te cycolbil cyibe biꞌx cxel ikan tuꞌn aꞌ.
18 Cbel xitj cyyole aju otok cyaj bant tiꞌj cyuꞌne tucꞌil camic, ex aju cytrate o bant tiꞌj tucꞌil cynajbil cyimni cyjel ten mintiꞌ tipun. Oc ttzaj cꞌixbisabl xobajilxix cyiꞌje, biꞌx che bajel wabane twitz txꞌotxꞌ tuꞌn. 19 Teyle junjun maj oc tul, che xel jawoꞌne tuꞌn. Tzul cycyakil prim, tzul kꞌijl ex konicꞌan. Nokpe oꞌcx oc cybinteye tkanil tiꞌj jlu che tzajel luꞌlune tuꞌn. 20 Ic tten ic tzaꞌn in cub tan jun xjal twi twatbil chꞌin tkan, mlay bant tuꞌn t-xi tnukin tib, ex tucꞌil jun ttxoꞌw miꞌn canun tibaj. 21 Tzul Kman kꞌojlel ic tzaꞌn o kꞌojin twi witz Perazim, ex ic tzaꞌn o kꞌojin tuj chkꞌajlaj Gabaón; tzul tuꞌn tbant aju takꞌun junxitl binchben te, tuꞌn tbant aju takꞌun mintiꞌ nneꞌl nicꞌbaj tiꞌj. 22 Cyjaꞌtzun miꞌn che xmayine mastl, tuꞌntzun miꞌn cyoc kitzꞌine mastl tuꞌn caden cꞌaloꞌn keye tuꞌn; porque ma nbiye aju ma bant tiꞌj tuꞌn Kman aju Tajaw Tcyakil, ma tma tuꞌn tbaj t-xitun tcyakil twitz txꞌotxꞌ.
23 Cybintze ex cykꞌoꞌnque cwent tiꞌj aju cxel nmaꞌne, cykꞌontz cywiꞌye cyiꞌj ke nyole: 24 Aju xjal akꞌnal tiꞌj txꞌotxꞌ, mya cycyakil kꞌij in chꞌoquin, ex ka tuꞌn tcub tbajuꞌn kꞌuban, ex ka tuꞌn tbaj tchkꞌajlajin twitz txꞌotxꞌ tuꞌn rastriy. 25 ¿Myapetzun ax toc, tbajlenxi tchkꞌajlajin twitz txꞌotxꞌ cbelex tawaꞌn tiyjil anis tucꞌix culantr, ex cbelex tawaꞌn triw tuj txolin, ex ttziꞌyile txꞌotxꞌ cbelex tawaꞌn sebad tucꞌix avena? 26 Ate Dios in xnakꞌtzante te tzaꞌn ctelba tuꞌn. 27 Porque mintiꞌ in baj wabat twitz anis tuꞌn tel ttxcꞌomil, ax icx twitz culantr mintiꞌ nnicꞌx rwed tibaj aju in ajben te kꞌibl ttxcꞌomil triw; nok oꞌcx in baj bujet twitz anis tucꞌix twitz culantr tuꞌn jun tzeꞌ. 28 In baj wabat triw, pero mya tuꞌn tbaj cheꞌt te jumajx; in che icꞌ ke rwed tibaj tuꞌn tel ttxcꞌomil, pero mya tuꞌn tbaj cꞌaxoꞌn, nok oꞌcx tuꞌn tel kꞌot part aju twitz. 29 Cyjaꞌtzun te Kman aju Tajaw Tcyakil in baj tnacꞌuꞌn cyiꞌj ke t-ximbetz maꞌxix cyoclen, ex in che bant tuꞌn tucꞌil nim tnabl.