Aju tzokpibl cye aj Israel
27
Tuj tkꞌijlalil tzul ctzajel tiꞌn Kman t-spad xobajilxix, maꞌxix ex cyuwxix, ex cbel tkꞌoꞌn tcastiw ju nintz lobaj Leviatán aju cyuwxix ok, ex ju nintz lobaj Leviatán aju ẍcuypiꞌn bet, ex cbel tbyoꞌn ju nintz txcup dragón aju najl tuj mar. 2 Tuj tkꞌijlalil tzul cxel tmaꞌn Kman cyjaꞌ: Che bitzane tiꞌj tkan uva tbanilxix. 3 Akine Dios in chin cwentin tiꞌj ex cocꞌx nnoꞌc waꞌline. Nnoꞌc ncwentine kꞌijl ex konicꞌan tuꞌntzun mi aꞌl jun tuꞌn toc binchante mya baꞌn tiꞌj. 4 Mintiꞌtl in chin kꞌojine tiꞌj. Nokwit at tkan chꞌiꞌx tiꞌj, jaculo chin exe kꞌojlel ex jaculo che baj tzꞌeꞌy cycyakil wuꞌne. 5 Katzun cyajbil aj kꞌoj tuꞌn cyoc ncwentine, e tcyaj cycolin tuꞌn cykꞌojin wiꞌje; axix toc, e tcyaj cycolin tuꞌn cykꞌojin wiꞌje.6 Tuj tkꞌijlalil tzul, che cwiꞌtel ke tiyjil Jacob ic tzaꞌn jun tzeꞌ, ctzajel cyxul aj Israel, cꞌoquel cyxmacal ex cnojel twitz txꞌotxꞌ tuꞌn cywitz. 7 Mintiꞌ cub tkꞌoꞌn Dios cycastiw aj Israel ic tzaꞌn cub tkꞌoꞌn cycastiw keju e cꞌixbisante cye, ex mintiꞌ e cub tbyoꞌn ke aj Israel ic tzaꞌn e cub tbyoꞌn keju e cub byonte cye. 8 Cub tkꞌoꞌn Dios cycastiw ke xjal etzan tuꞌn tej cyxi t-samaꞌn tuj juntl txꞌotxꞌ najchak, e ex tlajoꞌn tuꞌn cykꞌikꞌ xobajilxix, ic tzaꞌn in tzaj xupin cykꞌikꞌ tuj tumlal tjawitz kꞌij. 9 Pero cbel tnajsaꞌn cyil ke tiyjil Jacob, ex atzun jlu cbantel cyuꞌn tuꞌn tnajset cyil; e tbaj tzaꞌjix tcyakil cy-altar jatum in che cꞌulun cywitz cydios, e toc ic tzaꞌn in cub tzaꞌjix ju abj in ajben te txun, ex tuꞌn miꞌn cycyaj ten mastl tzeꞌ akeju nnoꞌc cydiosin, mi ke altar akeju in cub patit storac cyibaj te nimbil cye ke tilbilal.
10 Aju tnam toc muro tiꞌj ma cub xitj, mer ic tzaꞌn jun ja otok cyaj colin, mer ic tzaꞌn jun lugar tzkij txꞌotxꞌ mintiꞌ xjal najl tuj, atzun lugar lu jatum in che waꞌn ke alumaj, jatum in che waꞌn cyiꞌj t-xak tzeꞌ ex axtzun in che cub buneꞌ. 11 Oc in che tzkij ke tkꞌab tzeꞌ in che tzaj tokj; in che pontzun ke xuꞌj chmol tkꞌab tzeꞌ tuꞌn tcꞌant kꞌakꞌ tuꞌn. Aju tnam lu mintiꞌ chꞌin tnabl. Cyjaꞌtzun, aju Chꞌisal te ex aju Binchal te mlay tzaj tzꞌeꞌy tcꞌuꞌj tiꞌj.
12 Tuj tkꞌijlalil tzul, ic cbantel tuꞌn Kman cyiꞌje ic tzaꞌn in cub waban triw tuꞌn tel ttxcꞌomil; ctzajelx keꞌ tuꞌn ttzi nima Éufrates ex tuꞌn tpon baj ttzi nima tmojonil Ejipt, ex teyle junjun cyeye akeye aj Israel, che jawil chmoꞌne tuꞌn Kman. 13 Tuj tkꞌijlalil tzul cꞌoquel kꞌajtzaꞌn nintz chun, ex akeju otok che baj sputj tuj Asiria, ax icx keju otok cheꞌx kꞌiꞌn tuj Ejipt, che tzajel cꞌulul te Kman tuj Jerusalén, twi witz xjan.